Azaya 57 - Ika

Isi Nke Mmẹsa Kwasị Ọgụnnaị Ọnwụn Ndị Ezi-omumẹ Lẹ Ọnwụn Ndị-njọ

¹ Ndị ezi-omumẹ hụ a nwụn, onwọnni onyẹ e ron'ẹ; wẹ hụ e weri ndị gi obi wẹ ile e fe Osolobuẹ, onwọnni onyẹ a ghọtanị nị w'e weri ndị ezi-omumẹ makẹ eje-ihiẹn gha e kunrun wẹ;

² wẹ rị a lashi ebe obi a nọ ru wẹ alị, e dinẹ wẹ, e zu wẹ ikẹn; ẹrịra k'ọ rị ndị e bighanị.

³ “Ụnụ nwẹn — bịa nị ebeni, ụmụ ndị igbomẹ! Ụmụ ikpoho zọ ụkụ ye ọfịa lẹ ndị ịgbaraja!

⁴ Onyẹ kẹ ụnụ rị a mụ ẹmụ? Onyẹ kẹ ụnụ rị e ru imi, a sị ‘ọṅọịn!’ Ẹlẹ ndị nnupụ-isi kẹ ụnụ wụ? Ẹlẹ mmụ ndị-ntụ kẹ ụnụ wụ?

⁵ Ụnụ ile hụn rị a kpasu enwẹn ụnụ lekẹ ịgbaraja ebe lẹ ebe osisi okuu duni jun lẹ okpuru osisi ọwụlẹ duni — ebe ụnụ rị a rụa mmọn; ụnụ ndị rị e gi mmụ ụnụ a chụn ẹjan imẹ ọdanmgbugbu lẹ oghe rịsọnmẹ mkpọnụnụ ugu.

⁶ Ọmụma riẹnni hụn jun ọdanmgbugbu iyi udu-mirin kẹ ụnụ gi dọn ẹnya; uwẹ kẹ ụnụ hanrịn. Ẹghẹẹ, ụnụ hụ e huyeni wẹ oyiye-manya e ye wẹ oyiye-ọka. Nị m hụngụ ihiẹn ndịnị ile etikpọnị m ụnụ?

⁷ Y'a gbagụọ ịgbaraja elu ugu ile jẹn elu, ebahụn ị nọ a kwa ese.

⁸ Kẹ azụụn ẹkwe ọnụmụzọ kẹ amaran-ọnụmụzọ rị azụụnnị lẹ azụụnnị, k'ị buchesọnmẹ ahịma mmọn ị. Y'a jụ mmẹ wụ di i, gbamanị ndị ọzọ bẹdi shịanị; y'e nyinrin ẹ, sị wẹ banhan; y'e wegụọ enwẹn i kwanị ndị hụ elu-ukpo wẹ a sụọ ị, ị hụ e lee ọtọ wẹ.

⁹ Y'e we udẹn-olivu jẹnni mmọn wụ Molẹkị, e mẹmẹ sẹnti i ọda-ọda, e wejẹnn'ẹ. Ị hụ a hanjẹn ndị ụkọ ị ebe teni, e jẹndẹ alị-mmọn lẹ enwẹn ẹ d'a chọ eyemẹka!

¹⁰ Ijẹnni i rị e jẹn e te rọgụọ ị ẹhụ, kanị y'e kwerini sị, ‘Ihiẹn nwọnlẹni isi rọ.’ Ị hụ a hụn ihiẹn ị gi a kasị enwẹn i obi, ya haịn i gilẹni sọhị.

¹¹ Onyẹ k'i rị a manị piripiri, a tụ egun ẹ hụnnị ile — i gi a tụ m ntụ ẹnịna; i gilẹni a nyanhan m mọbụ e rodẹ ihiẹn rị e mẹni? Ẹlẹ nkịtịnnị m gbabie haịn i gilẹni a tụ egun m?

¹² M jẹnkọ d'e wepụha ‘ezigbo ihiẹn’ i ahụn ifọn ya lẹ ihiẹn ị rị a rụn; abankọnị wẹ i erere.

¹³ Ogẹn ụnụ e gi kwanma, a chọ eyemẹka, mmọn lẹ iyi ndị hụ ụnụ kpọntọ wẹ bịakwọ d'a zụọ ụnụ! Ufere k'e bupụ wẹ, uzun mmaka kẹ wẹ e gi buhuhudẹ wẹ. Kanị, onyẹ hụn gbaburuni m k'e nwọnrin alịnị, nwọnrinzikwọ Ugu nsọ m.”

Chuku Jẹnkọ D'e Dọnzichanrịn Ihiẹn

¹⁴ O ru ogẹn ahụn, wẹ k'a sị, “Rụndọnzi n'ẹ, rụndọnzi n'ẹ! Dọnzi ni ụzọ! Wepụnị nị ndị nke m ihiẹn rịsọnmẹ ụzọ.”

¹⁵ Makẹni, Onyẹ hụ kachanrịnnị hụn rị ebe kachanrịnnị, Onyẹ hụn rị ndụn jẹnrin ejẹn, hụn ẹfan a rị nsọ, sị, “M bi ebe jẹn elu, ebe rị nsọ kanị mmẹ lẹ onyẹ ọwụlẹ hụn gi akpakalị obi ẹ rogharị bizikwọ, onyẹ ọwụlẹ hụn e welụa enwẹn ẹ alị — kẹni m hụn ụzọ mẹ ndụn banzị ndị welụa enwẹn wẹ alị, mẹ ndụn banzị ndị gi akpakalị obi wẹ rogharị.

¹⁶ Esọnkọ m ịhịan kpe jẹnrin ejẹn, atọkọ m olulu e bu, makẹni o ru ndụn m a gụchanrịn ịhịan — umẹ-ndụn ịhịan hụn m ke.

¹⁷ Iwe te we m makẹ njọ ẹnya-uku ẹ, e ye m'ẹ afụnfụn, gi olulu bupụ ihun, kanị ọ tọkwọ isi-ikẹn e bu.

¹⁸ A hụngụọ m eje-agụngụn a, kanị m sikọ d'a zụọ a emu; m k'e du ẹ, mẹzi ẹhụ fu ẹ,

¹⁹ gi ẹ mẹ ndị rị a kwan ụya ghọghọma. Ya rịnị wẹ mma-o! Ya rịnị wẹ mma-o! Kẹ ndị rị nsue kẹ ndị rị ebe teni! M jẹnkọ d'a zụọ wẹ emu.” Ịya kẹ Osolobuẹ ku.

²⁰ “Kanị, ndị eje-omumẹ nọhụ kẹ mirin ohimin ẹbi rị a kpọ, hụn ghalẹni e zu ikẹn — a kpọ ẹbi, e hupụha ịkpọtọ.

²¹ Ọ rịkọnị onyẹ-njọ mma.” Ya kẹ Chuku m ku.