Azaya 56 - Ika

Isi Nke Mmisin Kwasị Ọgụnnaị Osolobuẹ K'a Zụọpụhazịkwọ Ndị Alị Ọzọ

¹ Osolobuẹ sị, “A kwadọn ni ezioku, e mẹ ni ihiẹn furuni, makẹni m'e d'a bịa d'a zụọpụha ụnụ, m'e d'a bịa d'a tụnị ụnụ ụya pụha ifọn.

² O jẹnkọ d'a rịnị onyẹ e mẹ ihiẹnni mma — onyẹ hụn e mẹ ẹ e mẹsọnmẹ: onyẹ hụn e dọnmẹ Ụhụọhịn Ezumikẹn nsọ, rịlẹni e mẹrụ a; onyẹ hụn ghalẹni e bu ẹka e che eje-ihiẹn.

³ Onyẹ alị ọzọ gi enwẹn ẹ kwanị Osolobuẹ y'a sịkwọlẹ enwẹn ẹ, ‘Osolobuẹ agụnkọ m yeni ndị nke ẹ wụ ndị Izrẹlụ.’ Onyẹ rị e feni m hụn gilẹni nwunyẹ lẹ ụmụ y'a sịkwọlẹ, ‘Osisi kpọ nkụn kẹ m wụhụ.’

⁴ Makẹni, Osolobuẹ sị, ‘Ndị ahụn rị e feni m hụn gilẹni nwunyẹ lẹ ụmụ bụ wẹ hụ e dọnmẹ iwu Ezumikẹn m rị ichẹn-ichẹn, a họrị ihiẹn a sụọnị m e mẹ, e kwọnkẹnmẹ iwu m,

⁵ uwẹ kẹ m sikọ d'e ye ọghọ imẹ Ụlọ-nsọ m ile lẹ ebe ile mgbọn ẹ ru, e mẹ m wẹ a nyanhansọnmẹ wẹ, e ye m wẹ ezigbo ẹfan hụn kadẹ ụmụ-ikpoho lẹ ụmụ-ikẹnnyẹ; m k'e ye wẹ ẹfan itẹbitẹ, hụn jẹnkọlẹni d'a gụ.

⁶ O mẹ nke ndị alị ọzọ hụn we enwẹn wẹ kwanị Osolobuẹ — kẹni wẹ hụn ụzọ a rụnn'a ọrụn, a wụ ndị ẹfan Osolobuẹ a sụọ ụsụọ, e fe ẹ ofufe, ndị ile hụn e dọnmẹchanrịn Ụhụọhịn Ezumikẹn nsọ, e kwọnkẹnmẹ iwu m,

⁷ m k'e wẹhẹ wẹ Ugu nsọ m, ye wẹ ịghọghọ imẹ Ụlọ m wẹ nọ e mẹ ekpere. M k'a narịn kẹ oyiye wẹ kpọ ọkụn kẹ ẹjan ndị ọzọ ile hụn wẹ k'e wẹhẹ elu ukpo nchụn-ẹjan m; makẹni wẹ k'a kpọ Ụlọ m Ụlọ alị ile a nọ e mẹ ekpere.’ ”

⁸ Di-nwọnni-ẹnyi wụ Osolobuẹ, onyẹ hụn rị e welụa ndị Izrẹlụ wẹ kpụnshi alị ndị ọzọ, sị, “M k'e welụazị ndị ọzọ cheni wẹ, cheni ndị m welụagụ.

Ikpe Chuku Ma Ndị Eje-omumẹ

⁹ “Anụ ile rị ọfịa, bịa nị; anụ ile rị ẹgboko, d'e ri ni!

¹⁰ Ndị-nche Izrẹlụ wụ ndị ẹnya-ishi, amarịn wẹ ihiẹn, nkitẹ odin a gba nkịtịn kẹ wẹ ile wụ w'a ra saẹka a gbọ, w'e dinẹsọnmẹhụ, a rọ nrọ — ụran a sụọka wẹ.

¹¹ Nkitẹ okẹn ihiẹn-oriri kẹ wẹ wụ, ẹfọ ara jun wẹ! Ndị-ndu nwọnlẹni nghọta kẹ wẹ wụ; wẹ ile e mẹsọnmẹ ihiẹn sụọnị wẹ, onyẹ-onyẹ hụ a chọ nke-ẹ nke-ẹ.”

¹² Onyẹ-onyẹ hụ a sị, “Bịa nị, nị ẹnyi ra manya! Nị ẹnyi gi manya e nwunye ẹnya rajungụdẹ ẹfọ! N'o nwọnni ihiẹn k'e mẹni — ekile k'a nọzị kẹ tannị, mọbụ kadẹ tannị mma!”