Azaya 54 - Ika

Isi Nke Mmẹnọ Kwasị Ọgụnnaị Ezigbo Ihiẹn Hụn Rị E Che Jerusalẹm

¹ Ịyụ wụ agan, bụma ẹbụ — ịyụ hụn mụtulẹni nwa! Bụma ẹbụ, yimẹ oro ịghọghọ, ịyụ hụn imẹ mẹtulẹni! Makẹni, ụmụ okpoho nwẹn wẹ latọ jẹnkọ nwan d'e bu ọda karị nke okpoho ya lẹ di ẹ rịchanrịn. Ya kẹ Osolobuẹ ku.

² Tụnshịa ebe i bi, behẹzidẹ ẹkwa-ọnụmụzọ lẹ ẹkwa-windo; elekwọlẹ ẹnya azụụn, behẹzi ụdọ cheni ndị i gi limẹ ọdụ ị;

³ makẹni, i jẹnkọ d'a bashi ẹka-nni, bashi ẹka-ekpẹn; ụmụ ị k'e mẹrisọnmẹ ndị alị ọzọ weri obodo ndị wẹ gbatọsọnmẹ biri.

⁴ Atụlẹ egun, ifẹnrẹn emẹkọ ị. Atụlẹ egun ịfa — y'a fakọ. I k'a zọdẹ ifẹnrẹn hụn mẹn'i kẹ ị rị nwagbọọ; y'a nyanhankọzị ụya i ri kẹ m la ị tọ rịkẹ onyẹ di nwụnnahịn.

⁵ Makẹni Chuku hụn ken'i, ịya wụ di i — ẹfan a wụ Osolobuẹ ihiẹn ile rị okpuru ẹ; ẹghẹẹ, Onyẹ-nsọ alị Izrẹlụ wụ onyẹ a gbapụhan'ị; Chuku ụwa ile kẹ wẹ a kpọ a.

⁶ Osolobuẹ k'a kpọkinhẹn i lekẹ nwunyẹ wẹ jụ obi rị a gbawa, nwunyẹ wẹ lụ nke ọhụn hụn wẹ jụ. Ya kẹ Chuku i ku.

⁷ M jụ ị hụ ẹkẹrẹ ogẹn, kanị m jẹnkọ d'e gi okẹn omikẹn wekinhẹn i.

⁸ Okẹn ọnụma hụn kpọ kẹ ẹbi kẹ m gi bupụ ị ihun ẹkẹrẹ, kanị okẹn ẹfọma hụn k'a rịsọnmẹni kẹ m k'e gi mẹn'i omikẹn. Ịya kẹ Osolobuẹ Onyẹ a gbapụhan'ị ku.

⁹ Ogẹnni rị m hụ kẹ ogẹn Nụa, m kun enwẹn m ogẹn Nụa nị mirin e rukpumẹkọzị ụwa. Ẹrịra kẹ m dọn nwan kun enwẹn m nị ebukọzịnị m'i olulu nị ajụgbọkọzị m'ị.

¹⁰ Ọsụọn'a nị wẹ mẹhunmẹ ugu ile, Ọsụọn'a nị wẹ wepụ òke ile — enwọnbehikọ m ihiẹn-ọsụsụọ ị hụn m kwe nkwa a, alatọkọ m nkwa m kwe i hụn ihiẹn gi a rịn'ị mma. Ịya kẹ Osolobuẹ hụn e mẹn'i omikẹn ku.

¹¹ Euu obodo hụnjungụ ẹnya, ẹbi rị a kpọ, obodo wẹ rọkọlẹni obi! M jẹnkọ nwan d'e gi ọmụma-ọma wụ tọkwọịzị tụn ị, gi ọmụma-ọma wụ safaya gbe iyetọ ị.

¹² M k'e gi ọmụma wụ rubi tụnhunmẹ i ibe elu, gi ọmụma rị e be nwaịn-nwaịn rụnsọnmẹn'i ọnụ-mgbọn, gi ọmụma rị mkpa tụn mgbọn i ile.

¹³ Osolobuẹ kẹ ụmụ ị jẹnkọ d'a mụnarịn, ihiẹn jẹnkọ d'a rịnị mmụ ị mma ọda-ọda.

¹⁴ I k'e gi ezi-omumẹ turu: Onwọnni onyẹ k'a kịgbun'i, onwọnni ihiẹn i k'a tụ egun ẹ. Ihiẹn k'a tụ ị okẹn egun anọkunmẹkọ ị kaka; ọ nọkunmẹkọ ị.

¹⁵ Onyẹ maye i, ẹlẹ mmẹ zi ẹ; onyẹ ọwụlẹ hụn mayen'i k'e gi ufiri i dan.

¹⁶ Lee ẹ, mmẹ ke ọkpụ-ụzụn — hụn gi ekọn a fụnwun ọkụn a, a kpụ ihiẹn-ọgụn ichẹn-ichẹn; mmẹ kezikwọ onyẹ e tikpọnị n'ọ hụn ụzọ e wiwi ihiẹn —

¹⁷ mmẹ rị a sị ị nị onwọnni ihiẹn-ọgụn ọwụlẹ wẹ rụntọn'ị k'e ru i ẹhụ, ọnụ ị k'e gburi ọnụ ọwụlẹ yụ lẹ ịya k'e kin ikpe. Ọnwan wụ ukuu idibo Osolobuẹ, hụnnị kẹ m gi a tụnị wẹ ụya. Ya kẹ Osolobuẹ ku.