Azaya 53 - Ika

Isi Nke Mmẹtọ Kwasị Ọgụnnaị

¹ Onyẹ kweri nwan ozi ẹnyi? Onyẹ kẹ Osolobuẹ ghọsị ihiẹnni Osolobuẹ mẹ?

² Ẹka Osolobuẹ kẹ odibo ẹ nọ sue nọkẹ osisi pupụhanị, nọkẹ mkpọgụn rị alị-ọkpọnkụn. Onwọnni mma mọbụ ọghọ rị a ẹhụ a lanị ẹnyi ẹnya; onwọnni ihiẹn rị a ẹhụ hụn a sụọ ịhịan.

³ Wẹ lelịa a elelịa, jụ a; nsọngbu-nsọngbu lẹ afụnfụn wẹ gi a gbanị ịhịan ọsọ k'ọ hụnsọnmẹ. Wẹ legberi ẹ elegberi; onwọndẹni ihiẹn ẹnyi kpọ a.

⁴ Eziẹ, nsọngbu ẹnyi k'o buru; afụnfụn nkẹ ẹnyi a ta k'ọ ta — kanị ẹnyi weri ẹ nị Osolobuẹ rị e ye ẹ afụnfụn ihiẹn o mẹ, nị ịya rị a fịan a ihiẹn, e mẹshi ẹ ikẹn.

⁵ Mba. Isi ẹnyi nupụ haịn wẹ gi dụn ẹ ihiẹn, njọ ẹnyi haịn wẹ gi mẹshi ẹ ikẹn; afụnfụn hụn ọ ta kẹ ihiẹn gi rịnị ẹnyi mma; ẹhụ wẹ rụsọnmẹ ẹ kẹ wẹ gi zụọ ẹnyi.

⁶ Ẹnyi ile a kpahugụọ nọkẹ atụnrụn; onyẹ-onyẹ a warị ẹbụ a — Osolobuẹ e bukwasị a njọ ẹnyi ile.

⁷ E mẹshi w'ẹ ikẹn, mẹ ẹ ta afụnfụn, kanị ọ gba nkịtịn; e duru w'ẹ nọkẹ nwa-atụnrụn wẹ wekọ d'e gbu, kẹ onyẹnyẹ-atụnrụn wẹ rị a kọrị ẹṅẹnrẹn dọn a gba nkịtịn — ẹrịra k'ọ gba nkịtịn.

⁸ E kingụ w'a ikpe zinrinlẹni, wẹ nọ weri ẹ d'e gbu. Onyẹ k'e kumẹzi nwan oku ụmụ a? Wẹ gbuchu ẹ egbuchu elu-ụwanị; wẹ gi ufiri nnupụ-isi ndị nke m mẹ ẹ ihiẹn.

⁹ Wẹ te k'e li ẹ nọkẹ ndị-ejẹ — kanị ili ọdanfịn kẹ wẹ liye ẹ nwan k'ọ nwụnhụn — makẹni onwọnni eje-ihiẹn o mẹ, onwọnzikwọnị ntụ wẹ nụ a ọnụ,

¹⁰ kanị ọ sụọ Osolobuẹ n'o mẹshi ẹ ikẹn, mẹ ẹ ta afụnfụn. Ọsụọn'a n'o gi ndụn a chụn ẹjan-njọ, ọ k'a hụn ụmụ a; o k'a tọ. Uche Osolobuẹ k'a nọ ẹka a gha ihun.

¹¹ Ọ tagụ afụnfụn, nwụnhụn, ọ k'a hụn ihiẹn ọ rụn, ẹfọ e jun ẹ. Odibo m k'e mẹ wẹ hatu ndị bu ọda ikpe ma hụn sikọ d'a marịnn'a — o k'e buru njọ wẹ.

¹² M k'e mẹ ẹ nwan rị ndị uku; ihiẹn wẹ bulụa agha hụn e ru ndị dikẹn ẹka k'e ru ẹ ẹka — makẹni o kweri we enwẹn ẹ ye wẹ gbu, a gụn w'a yeni ndị mmẹfie. O buru njọ ndị bu ọda; ọ rịọdọnni ndị nnupụ-isi.