Azaya 52 - Ika

Isi Nke Ẹbụọ Kwasị Ọgụnnaị Osolobuẹ Lala D'a Gbapụha Jerusalẹm

¹ Tẹnhin! Tẹnhin! Zayọnụ, tẹnhin! Jeri ikẹn lekẹ ẹkwa. Obodo nsọ wụ Jerusalẹm, yiri ẹwuru ọma ị; ndị ahụn wẹ kwalẹni ugun, ndị ahụn rịlẹni ụchan, abanhankọzị imẹ i.

² Jerusalẹm, zinzinpụ ẹjan rị ị ẹhụ. Lihi ọtọ, n'ị nọdị elu ukpo-eze. Zayọnụ hụn rị ẹgbụn, tọpụ ẹgbụn ahụn rị ị olu!

³ Makẹni Osolobuẹ sị: “Ọfẹ kẹ m re i, ya wụ, egikọ m egho gbarị ị.”

⁴ Di-nwọnni-ẹnyi wụ Osolobuẹ sị, Alị Ijiptu kẹ ndị nke m bu ụzọ lashi d'e biri nọkẹ itumunyẹ; ikpanzụụnnị, alị Asiria a bịangbuzighọ wẹ. Osolobuẹ sị,

⁵ “Kịnị kẹ m rịzị nwan a hụn ihiẹnni: e werigụọ wẹ ndị nke m mmakalaka, ndị gini wẹ hụ a gan wẹ.” Ya kẹ Osolobuẹ ku. “Wẹ hụ e lelịa ẹfan m uhinhin lẹ efinaị.

⁶ Ndị nke m jẹnkọ nwan d'a hụn ihiẹn ẹfan m wụ — m mẹgụ ihiẹn m k'e mẹ a marịn wẹ nị mmẹ ku ẹ. Ẹghẹẹ, mmẹ rọ.”

⁷ Ụkụ ndịnị fetula ugu arịka mma-o! Ụkụ ndị ahụn wela ozi rị mma! Ndị bịa d'e ku ni ihiẹn a rịgụọ mma, ndị wẹhẹ ozi rị mma, ndị rị a hị nị nzụọpụha a bịagụọ, ndị rị a sị ndị Zayọnụ, “Chuku ụnụ wụ eze!”

⁸ Gọn nị ntịn-o! Nụ nị kẹ ndị-nche ụnụ rị e yi oro, wẹ ile hụ a bụ ẹbụ-ịghọghọ — makẹni e gigụọ wẹ ẹnya wẹ hụn kẹ Osolobuẹ kinla Zayọnụ!

⁹ Mkpọkọ-ụlọ ile rị Jerusalẹm, bụye ni ẹbụ, makẹni Osolobuẹ a rọkọgụọ ndị nke ẹ obi; ọ gbapụhagụọ Jerusalẹm!

¹⁰ Osolobuẹ sikọ d'a ghọsị ẹka a rị nsọ idẹnya alị ndị ọzọ ile, elu-ụwa ile a hụn kẹ Chuku ẹnyi dọn a zụọpụha.

¹¹ Gha nị ebẹhụ pụ! Gha nị Babilọnụ pụ! Emẹtụkwọlẹ ni ihiẹn ọwụlẹ rụnị ẹka! Pụha nị ebẹhụ, dọnmẹ ni enwẹn ụnụ ụchan — ụnụ ndị e bu ihiẹn-nsọ Osolobuẹ.

¹² Kanị ẹlẹ hụn ụnụ k'e gi hụhụ pụ, ẹlẹ hụn ụnụ e gi gi ọsọ pụ. Makẹni, Osolobuẹ sikọ d'e buruni ụnụ ụzọ; Osolobuẹ wụ Chuku Izrẹlụ sikọ d'a kpanrịnzịkwọnị ụnụ azụụn.

Odibo Osolobuẹ K'a Tagụ Afụnfụn, Nwẹrin ọghọ

¹³ Osolobuẹ sị, lee ẹ, ihiẹn jẹnkọ d'a ghanị odibo m; o k'e nwọn ọghọ, wụrụ onyẹ rị mkpa; o k'a wụ onyẹ rị mkpa ọda-ọda

¹⁴ Kẹ ụya ọ rị imẹ ẹ dọn tụ ndị bu ọda ẹnya — makẹni ọ nọzịnị kẹ ịhịan yeni ihiẹn ẹnya hụn a, makẹni o yizini ịhịan yeni ẹhụ wẹ rụsọnmẹ ẹ —

¹⁵ ẹrịra kẹ ọghọ a k'a tụzị alị ichẹn-ichẹn ẹnya — ndị-nze k'a nụdẹ oku ẹ kpumẹ ọnụ. Makẹni, wẹ k'e gi ẹnya wẹ hụn ihiẹn wẹ gwatulẹni wẹ oku ẹ; wẹ k'a ghọta ihiẹn wẹ nụtulẹni ukwere ẹ.