Azaya 50 - Ika

Isi Nke Iri Kwasị Ọgụnnaị Njọ Sehẹni Ndị Juda Ụya

¹ Osolobuẹ sị ndị Izrẹlụ, “Elee ẹkụkwọ-mkpechan kẹ m ye nnẹ ụnụ wụ alị Izrẹlụ, omẹni mkpechan kẹ m kpechan a? Onyẹ kẹ m re ụnụ ye gi kụ ụgwọ — omẹni orire kẹ m re ụnụ? Njọ ụnụ haịn wẹ gi re ụnụ; eje-obibi ụnụ haịn wẹ gi chụpụ nnẹ ụnụ.

² Kẹ m bịa, kị haịn o gilẹni nwọn onyẹ rịn'a? Kẹ m kpọ oku, kị haịn o gilẹni nwọn onyẹ zanị? Ẹka m e mẹkẹ nkpụrụ nị asa m ẹka zụọpụha ụnụ ra enwọn m ndụn m'e gi zụọpụha ụnụ? Bụ ọjụgbọ mmaka kẹ m gi e mẹ ohimin a tahị, e mẹ iyi ichẹn-ichẹn e họnrin alị ọkpọ-nkụn azụn rị imẹ wẹ a nwụnhụn, shinkpo, makẹni mirin arịa; ẹgụn-mirin e gbu wẹ!

³ Mmẹ e mẹ igwere e gitọ, ọ nọ kẹ ihiẹn wẹ gi ẹkwa-ogi kpumẹ.”

Odibo Osolobuẹ Hụn E Humẹ-isi

⁴ Di-nwọnni-ẹnyi wụ Osolobuẹ e yegụọ m ire onyẹ wẹ zụn hụn m gi a marịn oku m'e gi gba onyẹ ndụn gụ umẹ. Ụtụntụn ọwụlẹ k'o gi a kpọtiẹn m, a shịapụ ntịn m — kẹni m gọn ntịn kẹ onyẹ wẹ rị a kuzi ihiẹn.

⁵ Onyẹ-nwọnni-ẹnyi wụ Osolobuẹ a shịapụgụọ m ntịn, efeni m isi, arụnị m isi ye imẹ.

⁶ E budẹ m ụgba-azụụn zinmẹni wẹ ebe wẹ rị a fịan m ihiẹn, la nti tọnị ndị rị e huepụ m ẹtu; egini m ifẹnrẹn zueri makẹ ẹmụ wẹ rị a mụ m lẹ ẹsọn wẹ rị a jụkpu m.

⁷ Makẹni Di-nwọnni-ẹnyi wụ Osolobuẹ hụ e yeni m ẹka, afanị m. Elekọ m ẹnya azụụn; a marịnghọ m nị afakọ m.

⁸ Onyẹ hụn e kuni m ọnụ m rị m nsue. Onyẹ jẹnkọ nwan d'a ma m ikpe? Nị ẹnyi kinmẹ nwan! Onyẹ rị e kpe m? Ya ku ihiẹn m mẹ!

⁹ Di-nwọnni-ẹnyi wụ Osolobuẹ wụ onyẹ e yeni m ẹka, onyẹ k'a hangbu m nwan eṅẹn? Wẹ jẹnkọ d'a fahị kẹ ẹkwa; ẹkịka k'e ripụ wẹ.

¹⁰ Onyẹ imẹ ụnụ ile a tụ egun Osolobuẹ, e mẹ ihiẹn odibo Osolobuẹ sị a mẹ? Onyẹ hụn rị a gha imẹ ishi, onyẹ hụn nwọnlẹni ukpẹ, hụnyẹ ya gi ẹfan Osolobuẹ dọn ẹnya, ya tụkwasị Chuku ẹ obi.

¹¹ Kanị, ụnụ ile hụn a mụyeni enwẹn ụnụ ọkụn, a mụyeni enwẹn ụnụ ukpẹ-ọwa, gi ni nwan ọkụn ndị ahụn ụnụ mụye ghama, ya lẹ ukpẹ-ọwa ndị hụ ụnụ mụye. Kanị, ihiẹn ụnụ jẹnkọ d'e nwọnhẹn ẹka m wụ ọnwan: ọnụ jẹnkọ d'e dinẹtọ imẹ eje-afụnfụn.