Azaya 49 - Ika

Isi Nke Itenẹi Kwasị Ọgụnnaị Izrẹlụ Wụ Odibo Osolobuẹ

¹ Gọn ni m ntịn, alị ndị teni rị ohimin; nụ nị ihiẹnni, alị ile teni: M rị imẹ ẹfọ kẹ Osolobuẹ kpọ m; m rị ẹfọ nnẹ m k'ọ kpọma ẹfan m.

² O mẹ ọnụ m a tụ kẹ ọpịa wẹ sụọn, gi ẹka a kpumẹ m, zuemẹ; o mẹ m wụrụ ọbara-ụta wẹ kwọ udẹn, rụ m ye imẹ ẹkpa-ọbara a.

³ Ọ sị m, “Odibo m kẹ ị wụ, Izrẹlụ, hụn m k'e gi ghọsị ọghọ m.”

⁴ Kanị, mmẹ nwẹn hụ a sị, “A rụngụọ m ọrụn ọlaliwi; a rụngbugụọ m enwẹn m mmaka. Kanị, a marịnghọ m nị Osolobuẹ k'e ye m ihiẹn runi m, nị Chuku m k'a kụ m ụgwọ-ọrụn.”

⁵ Lee nwan ihiẹn Osolobuẹ ku, Osolobuẹ hụn mẹmẹ m imẹ ẹfọ nnẹ m nị m wụrụ odibo ẹ kẹni m wekinhẹnn'ẹ ebọn Jekọpụ lẹn'ọ hụn ụzọ wegbama ndị Izrẹlụ ebe ọ rị, makẹni Osolobuẹ e yegụọ m ọghọ ebe ọ rị, Chuku m hụ e ye m ikẹn ogẹnni ile —

⁶ ọ sị: “Onwọnni ihiẹn ọ wụ n'ị wụhụ odibo m hụn k'e wekinhẹn ebọn Jekọpụ ọnọdị wẹ, hụn k'e wekinhẹn ndị Izrẹlụ m dọnmẹ ndụn; m k'e mẹzi i wụrụnị alị ndị ọzọ ile ukpẹ, kẹni i we nzụọpụha m ru ebe ile ụwa ru.”

⁷ Lee ihiẹn Osolobuẹ ku, Osolobuẹ, Onyẹ-mgbapụha lẹ Onyẹ-nsọ Izrẹlụ: ọ rị a gwa onyẹ hụn alịnị ile legberi, jụ, onyẹ hụn wụ igbọn ndị-nze: ọ sị, “Ndị-nze k'a hụn ị, lihin'i ọtọ; ndị-ọkịkị k'a hụn ị, kụn'ị isi alị, makẹni Osolobuẹ hụn furu wẹ gi e dọn ẹnya k'e mẹ ẹ, Onyẹ-nsọ Izrẹlụ hụn họrịn'ị k'e mẹ ẹ.”

Osolobuẹ K'e Dọnzi Izrẹlụ

⁸ Lee ihiẹn Osolobuẹ ku, “Ogẹn m k'e gi mẹ ọhụnma, m k'a za ị oku; ụhụọhịn m'e gi zụọpụha ị, m k'e yeni i ẹka. M k'e dọnmẹ i, gi i mẹzu nkwa m kwe ndị alị, kẹni i dọnzi alị, keyesọnmẹzi wẹ alị wẹ hụn te gba okpokoro

⁹ kẹni i sị ndị wẹ gi, ‘Pụha nị,’ sị ndị rị imẹ ishi, ‘Weri ni enwẹn ụnụ!’ Wẹ k'a rị a nọdẹ mkpẹnrẹn ụzọ e ri ihiẹn-oriri, a hụn ezigbo ẹfịfịa anụ e ri elu òke te kpọpụ nkụn.

¹⁰ Ẹgụn agụnkọ wẹ, ẹkpịrị akpọkọ wẹ nkụn, uwowo alị ọkpọ-nkụn emẹkọ wẹ, anwụn amakọ wẹ. Osolobuẹ hụn k'e mẹni wẹ omikẹn k'e du wẹ, du wẹ ghasọnmẹ ebe isi-mirin rị.

¹¹ M k'e mẹ ugu m ile riẹnpụ, họnrin ụzọ, a rụntọsọnmẹ m ụzọ.

¹² Lee ẹ, ndị nke m k'a ghasọnmẹ ebe teni kinhẹn: ụfọdụ k'a gha ẹbamịn-ugu kinhẹn, ụfọdụ a gha ẹbamịn ọdịdan-ẹnyanwụn, ụfọdụ a ghaha ẹgbẹrẹ Aswanị rị alị Ijiptu.

¹³ Euu igwere, yimẹ oro ịghọghọ! Elu-ụwa, ghọghọma nwan! Ugu, kwankpọma nị nwan ẹbụ! Makẹni Osolobuẹ rị a rọkọ ndị nke ẹ obi, omikẹn ndị nke ẹ wẹ rị e mẹshi ikẹn rị e mẹ ẹ.

¹⁴ Kanị Zayọnụ sị, ‘Osolobuẹ agbakịtọgụọ m azụụn, Di-nwọnni-ẹnyi a zọgụọ m.’

¹⁵ Nị okpoho zọ nwa ọ rị e ye ẹran, o mẹni omikẹn nwa ẹfọ a? Ọsụọn'a nị okpoho k'a s'ẹka zọ nwa a, azọkọ m'ị!

¹⁶ Lee ẹ, e segụọ m'ị ye ọbẹka m ẹbụbụọ sechanrịn; mgbọn i aghanị m ẹnya pụ.

¹⁷ Mmụ ị kinkọ ozigbo-ozigbo, kanị ndị hụn tikpọ ị la iwi k'a pụnị ị.

¹⁸ Weshi ẹnya elu, lehunmẹ: mmụ ị a gbakikomẹgụọ, wẹ lala d'e kunrun i.” Osolobuẹ sị, “Ma isi m, i k'e yiri wẹ ile kẹ ihiẹn-mma, nọkẹ ihiẹn nwagbọọ rị a gba ẹkụkwọ gi kọn ekikẹn.

¹⁹ Ọsụọn'a nị wẹ te mẹ alị ị la iwi, mẹ ẹ gba okpokoro, tikpọ a la iwi, yụ wụ alị Izrẹlụ ezukọzị nwan ndị nke i bi, ndị te bu i ri arịkọzị ị nsue.

²⁰ I k'e gi ntịn ị nụ kẹ ụmụ ị wẹ mụ ogẹn ahụn umẹ gi mẹ i rị a sị, ‘Alịnị erukọ ẹnyi, yecheni ẹnyi alị ẹnyi k'e bi.’

²¹ Ogẹn ahụn, ị k'a sị enwẹn i, ‘Onyẹ mụnị m ụmụ ndịnị wẹ?! Wẹ te gbunarịn ụmụ m ile, m nọ gbarị ẹka; wẹ te kpụnshi m alị ọzọ, jụ m. Onyẹ zụn nwan ndịnị wẹ? Mmẹ sụọ te họdụ. Elebe kẹ ndịnị wẹ gha nwan bịa?’ ”

²² Di-nwọnni-ẹnyi wụ Osolobuẹ sị, “Lee ẹ, m jẹnkọ d'e fe ndị alị ọzọ ẹka; m k'e weshini ndị alị ichẹn-ichẹn ẹkwa-ahịma m; wẹ k'a palụa ụmụ-ị-ikẹnnyẹ, parị ụmụ-ị-ikpoho uvun palụa.

²³ Ndị-nze k'a mụrụn ị kẹ nwa; inyẹnmẹ ndị-nze e mẹn'i kẹ nnẹ. Wẹ k'a kụn'ị isi alị, wẹ k'a rachan uzunzun rị ị ụkụ. Ogẹn hụ kẹ y'e gi marịn nị mmẹ wụ Osolobuẹ; nị ifẹnrẹn emẹkọ ndị gi m dọn ẹnya.”

²⁴ Onyẹ k'a s'ẹka napụha dikẹn ihiẹn o kpụnrụn mọbụ zụọpụha ịhịan ẹka onyẹ zegbu enwẹn ẹ?

²⁵ Kanị, Osolobuẹ sị nwan, “Wẹ sikọ d'a napụhadẹ dikẹn onyẹ hụn ọ kpụnrụn, zụọpụhadẹ ịhịan ẹka onyẹ zegbu enwẹn ẹ; mmẹ lẹ ndị rị a lụsọn i ọgụn k'a lụ ọgụn, a zụọpụha m ụmụ ị.

²⁶ M k'e mẹ ndị rị e mẹjan'ị ri uru ẹhụ wẹ lẹ enwẹn wẹ; wẹ k'a ra ẹdeke enwẹn wẹ, ọ tụ wẹ kẹ manya. Ogẹn ahụn, ịhịan ile rị ụwa k'a marịn nị mmẹ hụn wụ Osolobuẹ wụ Onyẹ-nzụọpụha ị, Onyẹ-mgbapụha ị, Dikẹn ebọn Jekọpụ.”