Azaya 48 - Ika

Isi Nke Ẹsatọ Kwasị Ọgụnnaị Ndị Izrẹlụ Wụ Ndị Nnupụ-isi

¹ Ebọn Jekọpụ, gọn ni ntịn, ụnụ ndị w'a kpọ Izrẹlụ, ụnụ ndị ẹbozo Juda; ụnụ ndị e kun ẹfan Osolobuẹ, a kpọku Chuku Izrẹlụ — kanị ụnụ ara gi ezioku lẹ ezi-omumẹ mẹ ẹ;

² ụnụ ndị a kpọ enwẹn ụnụ ụmụ-di-alị Obodo nsọ wụ Jerusalẹm, a sị nị Chuku Izrẹlụ kẹ ụnụ gi dọn ẹnya — Onyẹ ẹfan a wụ Osolobuẹ ihiẹn ile rị okpuru ẹ!

³ Mbụ-mbụ, m kutọsọnmẹ ihiẹn jẹnkọ d'e mẹni, ọnụ m kẹ wẹ gha pụha, mmẹ mẹ wẹ marịn wẹ; m nọ nwan mẹ ihiẹn m mẹ idẹnmizi, wẹ nọ nwan mẹzu.

⁴ Makẹni a marịnghọ m kẹ ụnụ mẹhan ndị isi-ikẹn, nị olu ụnụ wụ igwe ghalẹni a nị e gbegi; nị ezimezi ihun ụnụ ze kẹ igwe-bronzu.

⁵ Ịya haịn m gi gwatọ ụnụ ihiẹn ndịnị kete-kete, ku ẹ kete-kete, amamgbe y'a sị, “Mmọn ndị hụn m kpụ mẹ wẹ; mmọn m gi osisi pịn lẹ hụn m gi ụzụn kpụ sị wẹ mẹ.”

⁶ Y'a nụgụọ ihiẹn ndịnị; lekpọ wẹ nwan; y'e kukọ nị ezioku rọ? Gha kikẹnni jẹnmẹ, m k'a gwama ị nwan ihiẹn ọhụn, gwama ị ihiẹn zuerini hụn ị marịnlẹni.

⁷ Wẹ wụchanrịn ihiẹn ọhụn, arị w'a mbụ-mbụ: y'a nụtuni ukwere wẹ wezụka tannị. Ya wụ nwan nị y'a sakọ ẹka sị, “Ẹghẹẹ, a marịngụọlẹ m wẹ.”

⁸ Y'a nụtuni ihiẹn, y'a ghọtatuni ihiẹn; onwọntuni ogẹn ntịn ị gi rị oghe. Amarịnghọ m kẹ i mẹhan onyẹ ghẹrẹ-ghẹrẹ-ghẹrẹ; onyẹ nnupụ-isi kẹ wẹ a kpọ ị kete wẹ mụlẹ i.

⁹ Ẹfan m haịn m gi e bie d'e gi olulu mẹ i ihiẹn; achọnị m nị m wiwi ẹfan m haịn m gi e kwọndọn ọnụma m, amamgbe m'e gbupụ ị.

¹⁰ A chanchangụọ m'ị nwan, kanị ẹlẹ nke siliva mmaka; e gigụọ m afụnfụn chanchan ị kẹ ọkụn dọn a chanchan ihiẹn.

¹¹ Ufiri m kẹ m gi mẹ ihiẹnni, ufiri mmẹ lẹ enwẹn m. Nanị kẹ m'e dọn nị wẹ wiwi ẹfan m? Anịkọ m onyẹ ọzọ weri ọghọ runi m.

Izrẹlụ K'e Weri Enwẹn Ẹ Okpuru Babilọnụ

¹² Euu Jekọpụ, gọn m ntịn! Izrẹlụ hụn m kpọ: mmẹ wụ Chuku; mmẹ wụ Ibuzọ lẹ Ikpanzụụn.

¹³ Ẹka m gbe iyetọ ụwa, ẹka-nni m shịshịapụ igwere; m kpọ wẹ, a pụha wẹ.

¹⁴ Kokomẹ ni d'e gọn ntịn, ụnụ ile: Ele mmọn gwatu ụnụ ihiẹn ndịnị ushin? Onyẹ ahụn Osolobuẹ họrị, k'e mẹ Babilọnụ ihiẹn Osolobuẹ chọ; o k'e mẹshin'ẹ ndị Babilọnụ ikẹn.

¹⁵ Mmẹ ku ẹ, mmẹ lẹ enwẹn m; ẹghẹẹ, a kpọgụọ m'a; m k'e wẹhẹ ẹ; ọrụn a k'a gha.

¹⁶ “Nọzụnhan nị ị nụ ọnwan: Anọtuni m nzuzue ku oku; o ruzikwọ ogẹn o gi e mẹ, m hụ ebahụn. Di-nwọnni-ẹnyi wụ Osolobuẹ zi m ghahanị Mmọn a.

¹⁷ Lee ihiẹn Osolobuẹ ku — ihiẹn Onyẹ-mgbapụha ị, Onyẹ-nsọ Izrẹlụ, ku: ‘Mmẹ wụ Osolobuẹ, Chuku ụnụ, hụn a kuzi ụnụ kẹ n'ọ rịnị ụnụ mma; hụn a ghọsị ụnụ ụzọ ụnụ k'a gha.

¹⁸ Omẹni ụnụ te gi oku m dọn, nkẹ udọn hụ e huni ụnụ kẹ mirin iyi, nkẹ ezi-omumẹ ụnụ hụ a kpọshi elu kẹ mirin ohimin.

¹⁹ Nkẹ ebọn ụnụ a nọ kẹ ẹjan rị alị, nkẹ ụmụ ụnụ e bu ọda kẹ ẹjan wẹ ghalẹni a s'ẹka a gụn; m'e ke wepụ ẹfan wẹ ẹnịna, mọbụ tikpọpụ wẹ ẹnịna ebe m rị.’

²⁰ Gha nị Babilọnụ pụ, gbapụnị nị ndị Babilọnụ gini ụnụ! Gi oro ịghọghọ hị ọnwan — ku ẹ nị ịhịan ile nụ; ku ẹ n'ọ ghagbarị ụwa ile; sị, ‘Osolobuẹ a gbapụhagụọ odibo ẹ wụ Jekọpụ!’

²¹ Ẹgụn-mirin agụnị wẹ ogẹn ahụn o gi we wẹ gha alị ọkpọ-nkụn; o mẹ mirin gha ọmụma hụ hupụhanị wẹ; o tiwa ọmụma hụ, mirin nọ hupụha.”

²² Osolobuẹ sị, “Obi erukọ onyẹ-njọ alị.”