Azaya 47 - Ika

Isi Nke Ẹsa Kwasị Ọgụnnaị Kẹ Osolobuẹ Dọn Wetu Babilọnụ Alị

¹ Osolobuẹ sị, “Hidan n'ị nọdị akpakalị, Nwagbọọ wụ obodo Babilọnụ; nọdị akpakalị nị ukpo-eze arịzịa, ịyụ, nwagbọọ ndị Babilọnụ. Akpọkọzị wẹ i onyẹ-alụlụa mọbụ onyẹ w'a pụpọma.

² Weri ọlọ n'ị kwọmadẹ ọka; wepụ ẹkwa ahụn i gi kpumẹ ihun; gbụpụ ẹbulukun n'ị la ụkụ tọ oghe; gi ụkụ fetusọnmẹ iyi.

³ Wẹ k'a hụn ọtọ ị, a hụnchanrịn wẹ ẹhụ ị, ifẹnrẹn e mẹ i. M k'e mẹgwarị; ahatukọ m onyẹ ọwụlẹ.”

⁴ Onyẹ-mgbapụha ẹnyi hụn ẹfan a wụ Osolobuẹ ihiẹn ile rị okpuru ẹ, ịya wụ Onyẹ-nsọ Izrẹlụ.

⁵ “Nọdị alị gba nkịtịn, shi imẹ ishi d'a nọdị; obodoni hụn wụ nwagbọọ ndị Babilọnụ, akpọkọzị wẹ i ‘okpoho hụn wụ eze alị-eze ichẹn-ichẹn.’

⁶ M te rị e busọn ndị nke m olulu; ya m nọ gi olulu hụ mẹrụdẹ ihiẹn m; e mẹ m wẹ ban ị ẹka, y'e mẹni ni wẹ omikẹn kaka — kẹ ndị ẹgẹdi rị imẹ wẹ k'i buye ibu nyịnnị.

⁷ I te sị enwẹn i, ‘M k'a kị jẹnrin ejẹn — eze-okpoho itẹbitẹ kẹ m wụ!’ Bụ y'e rokpọnị ihiẹn ndịnị mọbụ rodẹ ihiẹn o k'e buhẹ.

⁸ Gọn nwan ntịn, yụ wụ Babilọnụ, okpoho hụn e mẹsọnmẹ ihiẹn o gi a la ẹnya, ị hụ a danchanpụ makẹni ẹhụ fu i, a sị enwẹn i, ‘Mmẹ rọ, onyẹ ọzọ arịa. Di anwụnnahịnkọ m, ụmụ anwụnhịnkọ m.’

⁹ Kanị ihiẹn ẹbụbụọ ahụn k'e kunrun i — imẹ njube-ẹnya ohu, akpọhịn ohu — ụmụ a nwụnnahịn ị, di a nwụnnahịn ị! Wẹ k'e rukpumẹ i ọhụnma-ọhụnma; kẹ y'a gwọlẹ ọgụn ru, kẹ y'e buhanlẹ nshi.

¹⁰ Y'e gigụọ eje-omumẹ i dọn ẹnya, a sị enwẹn i, ‘Onwọnni onyẹ a hụnnị m.’ Uche lẹ amamihiẹn i nwọn e dufiegụọ ị — ebe i nọ sị enwẹn i, ‘Mmẹ rọ, onyẹ ọzọ arịa.’

¹¹ Eje-ihiẹn k'e kunrun i, y'a marịnkọ ọgụn y'e gi gwọpụ a; ọdakin k'e kunrun i, y'a sakọ ẹka gi ihiẹn ọwụlẹ gbarị isi i; okẹn eje-ihiẹn ị tụlẹni ẹnya a k'e kunrun i idẹnmizi.

¹² Busọnmẹ ni nwan nshi ụnụ, gwọsọnmẹ ọgụn ile ụnụ a gwọ — wẹ ile kẹ ụnụ e mẹ gha ẹhụ nwa-ndu lala. Ikẹnkwọ n'ọ ghaghọnị ụnụ, ikẹnkwọ nị wẹ gighọ wẹ tụ egun ụnụ.

¹³ Okẹn ndụnmọdụn hụ ile nwọnlẹni isi wẹ ye ụnụ a gụgụọ ụnụ ndụn! Ndị gi kokisẹ a gbanị ụnụ ẹfa wẹ pụha nwan d'e yeni ụnụ ẹka — ndị ahụn e lee okokisẹ wẹ bumẹni ụnụ amụma ifọn-ifọn, wẹ zụọpụha nwan ụnụ imẹ eje-ihiẹn lalanị nị ụnụ!

¹⁴ E Lee ẹ, wẹ nọ nwan kẹ irurue ọkpọ-nkụn; ọkụn k'a dụnpụ wẹ! Asakọdẹ wẹ ẹka zụọpụha enwẹn wẹ imẹ ọkụn. Ọnwan ẹlẹkwọ ikeke-ọkụn ịhịan gi a chụ oyi, ọnwan ẹlẹkwọ ọkụn w'a nyan.

¹⁵ Ẹrịra kẹ ụnụ k'a dọn fa makẹ ndị ụnụ gi dọn ẹnya — ndị ahụn ụnụ lẹ wẹ gba a rụn, e mẹgbama oku ẹfa gha alị lala. Onyẹ-onyẹ imẹ wẹ k'a kpahu, kpashi ebe ọ kpakọ; onwọnni onyẹ k'a sa ẹka zụọpụha ụnụ.”