Azaya 46 - Ika

Isi Nke Isin Kwasị Ọgụnnaị Ẹmụ Osolobuẹ Rị A Mụ Mmọn Ndị Babilọnụ

¹ Bẹlụ wụ mmọn ndị Babilọnụ e gbugụọ osekpu! Nebo wụzị mmọn wẹ e hulụagụọ alị! E gi wẹ anyịnyan lẹ efin buru mmọn wẹ — ibu nwẹn hụ a nyịn, a nyịngbu anyịnyan ndị ahụn buni wẹ.

² Mmọn ndị ahụn e hulụagụọ, e sekpugụọ wẹ; a sa wẹ ẹka zụọpụha wẹ kẹ wẹ bukọ wẹ; wẹ ile kẹ wẹ kpọnkọ alị ọzọ.

³ Gọn ni m ntịn-o, ebọn Jekọpụ — ụnụ ile ndị họdụ ezi-lẹ-ụlọ Izrẹlụ. Mmẹ bu ụnụ kete w'a tụlẹ imẹ ụnụ; mmẹ bu ụnụ kete ụnụ banlẹ imẹ ẹfọ.

⁴ D'e rudẹ ni ụnụ a ka ẹgẹdi, pu ẹwọ, mmẹ rọzị, mmẹ k'e dọnmẹ ụnụ ndụn. Mmẹ ke ụnụ, m k'a pa ụnụ, m k'e dọnmẹ ụnụ ndụn, m k'a gbapụha ụnụ.

⁵ Onyẹ kẹ y'e gi jeni m mọbụ sị nị mmẹ lẹ ịya han? Onyẹ k'i ro n'ọ nọ kẹ mmẹ hụn y'e gi jeni m?

⁶ Ndị hụn e hupụha goru rị imẹ ẹkpa-goru, a mapụha siliva; a kpọ wẹ ọkpụ-goru n'o gi ẹ kpụ mmọn — a kụnị wẹ mmọn hụ isi alị, fe ẹ.

⁷ O ru, e bu w'ẹ che uvun, buru ẹ d'e tumẹ ebe o k'a nọdị, ọ nọdị ebẹhụ, ọ s'ẹka gha ebẹhụ pụ. Ịhịan kpọku ẹ, ọ sakọ ẹka za; ọ sakọ ẹka zụọpụha ịhịan imẹ nsọngbu.

⁸ Nyanhankwọ nị ihiẹnni; bun'ẹ che obi, e ron'ẹ, ụnụ ndị nnupụ-isi.

⁹ Nyanhan nị ihiẹn ndị hụn mẹni, ihiẹn ndị hụn mẹ mbụ-mbụ; mmẹ wụ Osolobuẹ, ọzọ arịa. Mmẹ wụ Osolobuẹ, onwọnni onyẹ nọ kẹ mmẹ.

¹⁰ M'a nọ mbidọn e ku ọgụgụ, e mẹ ndị mbụ-mbụ a marịn ihiẹn rị ihun. M sị: “Ihiẹn hụn m bu obi k'e mẹrịrị; m k'e mẹchanrịn ihiẹn ile m chọ nị m mẹ.”

¹¹ M'a gha ẹbamịn ọwụwa-ẹnyanwụn a kpọha nnụnụ e ri anụ; m'a gha alị hụn tegbu enwẹn ẹ a kpọha okẹnnyẹ hụn k'e mẹ ihiẹn m bu obi. Ihiẹn hụn m ku, m k'e mẹzurịrị a, ihiẹn hụn m romẹ, m k'e mẹrịrị a.

¹² Gọn ni m ntịn, ụnụ ndị isi-ikẹn, hụn o mẹni ihiẹn hụ rị mma arị wẹ nsue:

¹³ M wela nwan ihiẹn ahụn rị mma; ọ rịgụọ nsue; nzụọpụha m rọ, o biekọ d'a bịa. M k'e ye Zayọnụ nzụọpụha; bu ọghọ m che Izrẹlụ ẹhụ.