Azaya 41 - Ika

Isi Nke Ohu Kwasị Ọgụnnaị “Ụwa Ile, Gọn Ni Osolobuẹ Ntịn!”

¹ Gba nị nkịtịn, gọn m ntịn, alị ndị rị nfetu ohimin! Ndị alị ichẹn-ichẹn wẹ kọnrin pụha! Wẹ pụha nwan d'e kin; nị ẹnyi zuni ọgwa d'e kin.

Saịrọsị, Onyẹ Osolobuẹ K'e Gi Rụn Ọrụn

² Chuku sị, “Onyẹ kpọli onyẹ hụn gha ẹbamịn ọwụwa-ẹnyanwụn lala? Onyẹ kpọ a ọkpụkpọnị furuni d'a rụnn'a ọrụn? Ọ hụ e we ndị alị ichẹn-ichẹn e che ẹ ẹka e mẹri, e bu ndị-nze e che okpuru ẹ. Ya nwẹn hụ e gi ọpịa a e gbu wẹ a la iwi lekẹ uzunzun, e gi ụta e gbupụ wẹ kẹ ẹfịfịa-ọkpọnkụn ufere bukọ.

³ Ọ chụsọnmẹ wẹ, onwọnni ihiẹn e mẹn'ẹ — ọsụọn'a nị ụzọ ọ ghatulẹni k'ọ nọ a chụ wẹ.

⁴ Onyẹ wụ onyẹ hụn mẹ ihiẹnni, mẹ ẹ ru alị? A gha isi mbidọn a kpọtọ agbọ ndị rị ihun? Mmẹ wụ Osolobuẹ rọ — mmẹ lẹ ndị ibuzọ rị, mmẹ lẹ ndị ikpanzụụn rịzịkwọ.”

Ndị Gi Mmọn Dọn Ẹnya

⁵ Alị ndị rịdẹ mkpẹnrẹn ohimin a hụngụọ a, egun hụ a tụ wẹ; ndị rị ebe ile ụwa ru hụ a ma piripiri. Wẹ hụ e jẹnpụha, a kịgbama;

⁶ onyẹ-onyẹ hụ e yeni ibe ẹ ẹka, a sị nwẹnẹ ẹ, “Jikẹnmẹ!”

⁷ Hụn a pịn mmọn hụ a kasị hụn a kpụ goru rịn'a obi; hụn e tipịa goru hụ ye hụn a kpụchanrịnn'a ndu. Ọ hụ a sị, “A gbaka w'a ọhụnma.” Ọ kpọma mmọn ahụn ye alị makẹ ọ gha dan.

Ndị Gi Osolobuẹ Dọn Ẹnya

⁸ “Kanị, Izrẹlụ hụn wụ odibo m, ebọn Jekọpụ hụn m họrị, ẹbozo Ebraham ọwụ m,

⁹ mmẹ gha njẹndemẹ ụwa weri i; nkọ kachanrịn e te kẹ m gha kpọ ị; mmẹ sị, ‘Odibo m k'ị wụ’; a họrịgụọ m'ị, ajụnị m'ị tọ.

¹⁰ Atụlẹ nwan egun, nị mmẹ lẹ yụ wị; anịlẹ obi nahịn ị, nị mmẹ wụ Chuku i. M jẹnkọ d'a gba ị umẹ, yeni i ẹka; m k'e gi ẹka-nni m rị ọchan kwọndọn i.

¹¹ Ndị ile rị e bun'i olulu, k'a farịrị, ifẹnrẹn e mẹgbu wẹ; ndị ile rị e bunụmanị ị k'a nọ kẹ ihiẹn mmaka, a la wẹ iwi.

¹² Ị k'a chọdẹ ndị-iṅẹnrẹn i, y'a hụnkọ wẹ. Ndị ile a lụsọn i ọgụn awụkọzị ihiẹn ọwụlẹ.

¹³ Makẹni mmẹ wụ Osolobuẹ, Chuku i, hụn e kwọndọn i ẹka-nni, a sị ị atụlẹ egun; m jẹnkọ d'e yeni i ẹka.

¹⁴ Jekọpụ, ndidọn zelẹni, atụlẹ egun — Izrẹlụ ụjọ! Makẹni mmẹ lẹ enwẹn m k'e yeni i ẹka ya kẹ mmẹ wụ Osolobuẹ ku — mmẹ, Onyẹ a gbapụhan'ị, Onyẹ-nsọ Izrẹlụ.

¹⁵ Lee ẹ, m jẹnkọ d'e gi i họnrin ihiẹn wẹ gi a kụkpọ ọka — nke ọhụn tụ nkọ hụn nwọn eze bu ọda. Ị k'a kụkpọ ugu ichẹn-ichẹn kẹ ọka, gweriẹn wẹ, mẹ òke ichẹn-ichẹn jẹn elu wụrụsọnmẹ ẹfịfịa-ọka.

¹⁶ Ị k'a fụchanchanrịn wẹ kẹ ọka, ufere e buru wẹ, okẹn ufere a kpọhuhu wẹ — y'e gi ufiri Osolobuẹ a ghọghọ, y'e gi Onyẹ-nsọ Izrẹlụ a ghọghọ a dụ ẹka obi.

¹⁷ Ndị igbẹnnyẹ lẹ ndị elu rị a fụ hụ a chọ mirin wẹ k'a ra, kanị w'a ra hụn; ẹkpịrị hụ a kpọ wẹ nkụn yeni ẹgụn-mirin. Kanị mmẹ wụ Osolobuẹ jẹnkọ d'a za wẹ oku — mmẹ wụ Chuku ndị Izrẹlụ alatọkọ wẹ.

¹⁸ M k'e mẹ iyi jun elu ugu ọkpọ-nkụn, mẹ isi-mirin jun ọdanmgbugbu ichẹn-ichẹn; E mẹ m ọgọdọ-mirin jun imẹ atụ, mẹ isi-mirin jun alị ọkpọ-nkụn.

¹⁹ M k'e mẹ atụ họnrin ẹgboko mẹ okẹn-osisi sida lẹ akashịa lẹ mẹtụlụ lẹ olivu suemẹ ebẹhụ; mẹ osisi-paịnị jun alị ọkpọ-nkụn, ya lẹ osisi fẹ lẹ saịprẹsị,

²⁰ kẹni ịhịan ile hụn a, marịn — e ro w'ẹ, ghọta — nị ẹka Osolobuẹ mẹ ihiẹnni, nị Onyẹ-nsọ Izrẹlụ ke ẹ.”

Mmọn Eruni W'e Fe

²¹ Osolobuẹ sị mmọn ndị w'e fe, “D'e kin ni nwan.” Eze Jekọpụ sị, “D'e kin ni ihiẹn ile ụnụ ma kin.”

²² Wẹ nọzụnhan; wẹ d'a gwa ẹnyi ihiẹn k'e mẹ ihun. Kọwa nị nị ẹnyi ihiẹn ndị mẹgụnị, kẹni ẹnyi lele nkọwa ndị ahụn, marịn kẹ wẹ dọn mẹ mọbụ ụnụ a gwa ẹnyi ihiẹn jẹnkọ d'e mẹ ihun.

²³ Gwa nị ẹnyi nwan ihiẹn jẹnkọ d'e mẹ ihun kẹni ẹnyi marịn nị ụnụ wụ mmọn nke-esi. Mẹ ni nwan ihiẹn ọwụlẹ k'a tụ ẹnyi ẹnya — ọsụọn'a mma, ọsụọn'a njọ — kẹni ndụn gụ ẹnyi, kẹni egun tụ ẹnyi.

²⁴ Lee n'ẹ nwan n'o nwọnni ihiẹn ụnụ wụ, ọrụn ụnụ enwọn isi; onyẹ hụn sị nị ụnụ k'o k'e fe rụ arụ.

Osolobuẹ Kẹ Wẹ E Gi Dọn Ẹnya

²⁵ A kpọligụọ m onyẹ ohu rị ẹbamịn-ugu; ọ lala, onyẹ ohu hụn rị ẹbamịn ọwụwa-ẹnyanwụn — hụn a kpọku ẹfan m. Ọ zọ ndị-ọkịkị ụkụ nọkẹ sị wẹ wụ ụrụa, nọkẹ ọkpụ-ite rị a zọ ụrụa o gi a kpụ ite.

²⁶ Onyẹ ku oku ihiẹnni isi mbidọn kẹni ẹnyi marịn mọbụ gwatọ ịhịan ya n'o d'e mẹ kẹni ẹnyi sị, “O kughọ a”? Onwọnni onyẹ ọwụlẹ ku oku ihiẹnni; onwọnni onyẹ gwatọ ịhịan ya, onwọnni onyẹ nụ ihiẹn ọwụlẹ ọnụ ụnụ.

²⁷ Mmẹ bu ụzọ sị Zayọnụ, “Lee ẹ, a bịagụọ wẹ!” Mmẹ zi Jerusalẹm ozi rị mma.

²⁸ E lee m ẹnya, onwọnni mmọn rịnị — onwọnni hụn ọwụlẹ k'a s'ẹka dụn ọdụn, onwọnni hụn k'a s'ẹka za m ajụjụ.

²⁹ Lee nwan nị ẹlẹ wẹ ezigbo ẹ! Ihiẹn ile wẹ rụn enwọn isi; mmọn ile wẹ kpụ wụhụ ufere lẹ isusu.