Azaya 39 - Ika

Isi Nke Ohu-arịa Ọgụnnaị Ẹhụ Hụn Tụ Hezikaya, Wiwi Ihiẹn

¹ Ogẹn hụ, eze ndị Babilọnụ wụ Mẹrodaki-Baladanị nwa Baladanị nọ zi wẹ we ẹkụkwọ-ozi lẹ ihiẹn o buye wẹ jẹnni Hezikaya, gi kele ẹ makẹni ọ nụ nị emu kụ a lẹni ọ dịnhịngụọ.

² Hezikaya nọ shịapụchanrịn ẹfọ nabanhan wẹ, ghọsịsọnmẹ wẹ ihiẹn ile o dọnmẹ: kẹ siliva kẹ goru; kẹ ihiẹn ichẹn-ichẹn e shin ọhụnma kẹ udẹn kẹ ezigbo ofugbọn-olivu; kẹ ihiẹn-ọgụn alị Juda ile — ihiẹn Juda ile rị a ẹka lekẹ eze. Onwọnni ihiẹn rị obi-eze ẹ lẹ alị-eze ẹ hụn ọ ghọsịlẹni wẹ.

³ Omẹgụ, onyẹ-amụma wụ Azaya nọ buru eze wụ Hezikaya, sị a, “Kịnị kẹ ikẹnnyẹ ndịnị ku? Elebe kẹ wẹ gha bịa?” Hezikaya nọ sị a, “Wẹ gha alị teni bịa, alị Babilọnụ kẹ wẹ ghakwọrị bịa d'a hụn m.”

⁴ Azaya nọ sị a, “Kị wẹ hụn imẹ obi-eze i?” Hezikaya nọ sị a, “Wẹ hụnchanrịn ihiẹn ile rị obi-eze m. Onwọnni ihiẹn ọwụlẹ m dọnmẹ hụn m ghọsịlẹni wẹ.”

⁵ Ya kẹ Azaya nọ sị Hezikaya, “Lee ihiẹn Osolobuẹ ihiẹn ile rị okpuru ẹ ku, ọ sị:

⁶ ‘Ogẹn lala hụn wẹ jẹnkọ d'e gi burukwama ihiẹn ile rị obi-eze i lẹ ihiẹn ile ndị nẹdi i wẹ dọnmẹ d'e ru tannị, buru wẹ shi alị Babilọnụ; onwọnni ihiẹn ọwụlẹ k'a họdụnị. Ya kẹ Osolobuẹ ku!

⁷ Wẹ k'e weridẹ ndị wẹ k'e weri imẹ ụmụ ị kẹti-kẹti, wara wẹ gi wẹ họnrin ndị ọrụn-eze imẹ obi-eze eze Babilọnụ.’ ”

⁸ Hezikaya nọ sị Azaya, “Ihiẹnni ị sị nị ya kẹ Osolobuẹ ku hụ mma.” Hezikaya za ẹnịna makẹni ọ sị enwẹn ẹ “Ya wụ nị udọn lẹ ndọnkwa jẹnkọ d'a rị ogẹn nke m.”