Azaya 38 - Ika

Isi Nke Ẹbụọ-arịa Ọgụnnaị Emu Hụn Kụ Hezikaya

¹ Ogẹn hụ, emu nọ kụma Hezikaya nke wụ nị o d'a nwụn. Onyẹ amụma wụ Azaya nwa Emọzụ nọ bịa d'e kunrun ẹ, sị a, “Osolobuẹ sị, ‘Dọnkwama ezi-lẹ-ụlọ ị, makẹni i jẹnkọ d'a nwụnhụn; ẹlẹ ị k'a dịnhịn.’ ”

² Ya kẹ Hezikaya nọ bu ihun zinmẹ ẹhụ-ẹjan, mẹ ekpere, kpọku Osolobuẹ, sị a,

³ “Euu Osolobuẹ, nyanhankwọ kẹ m dọn e bichanrịnnị ịyụ sụọ, e gi obi m ile e fe i, e mẹ ihiẹn rị ị mma ẹnya.” Hezikaya nọ kwan ezigbo ẹkwan.

⁴ Ya kẹ Osolobuẹ nọ sị Azaya,

⁵ “Jẹn d'a gwa Hezikaya, sị: Osolobuẹ, Chuku Defidi nẹdi i, sị, ‘A nụgụọ m ekpere i, hụnzịkwọ ẹnya-mirin i. M jẹnkọ nwan d'e bechen'i ahụa mmisẹn.

⁶ M k'a zụọpụhazịkwọ yụ lẹ obodoni wụ Jerusalẹm ẹka eze Asiria. Anịkọ m ihiẹn ọwụlẹ mẹ obodoni.

⁷ “ ‘Lee ihiẹn y'e gi marịn nị Osolobuẹ jẹnkọ d'e mẹ ihiẹnni o ku:

⁸ M sikọ nwan d'e gi ihiẹnni Ahazị nẹdi i zumẹ wẹ gi onyinyọn ẹ rị mgbanyinrin a marịn ole rị a kụnị rụnghọsị ị ihiẹn a tụ ẹnya — m k'e mẹ onyinyọn ẹ gi amụkụ iri-ni o jẹnpụ tannị kinzi azụụn.’ ” Ya kẹ onyinyọn hụ nọ kin azụụn amụkụ iri.

⁹ Ọnwan wụ ihiẹn Hezikaya de k'ọ dịnhịngụ emu hụ kụn'a:

¹⁰ M te sị, “Hụnnị m kelẹni bimẹdẹ, nị m nwụnchu nwan ra?! Nị m gha nwan ọnụ-mgbọn alị-mmọn ra? Nị wẹ napụ m uwẹ-ẹnyasị m ra?”

¹¹ M sị, “Ya wụ ahụnkọzị m Osolobuẹ wụ Osolobuẹ imẹ alị ndị rị ndụn; eleghakọzị m ịhịan, arịkọzị m ndị bi elu-ụwanị.

¹² E hueri wẹ ndụn m, kẹ ịhịan dọn e hueri ọdụ ndị e du atụnrụn; a fụmagụọ m ndụn m lekẹ ẹkwa ọkpa-ẹkwa kpagụ; Osolobuẹ e bepụgụọ m kẹ ẹkwa wẹ bepụ ebe wẹ nọ a kpa ẹkwa; Osolobuẹ, ị hụ a napụ m ụwa ikẹn — uhinhin lẹ efinaị.

¹³ A gba m nkịtịn, e che, eki e we fọn, kanị ọ kpagichanrịn m ọkpụkpụ ile kẹ ẹwọrọ dọn e mẹ; ị hụ a napụ m ụwa ikẹn — uhinhin lẹ efinaị.

¹⁴ M hụ a rịa kẹ achụ, e yi kẹ nduru. E lebe m ẹnya elu m gi a chọ eyemẹka, ẹnya m a chan. Euu Osolobuẹ, m rị imẹ nsọngbu, dodo d'e yeni m ẹka.”

¹⁵ Kanị, kị m'e kuzi nwan? Ọ gwalẹ m oku; ịya sị emuni kụ m. M jẹnkọ d'e welụa enwẹn m alị bi e we m nwụn yeni ihiẹnni ẹnya hụn m.

¹⁶ Euu Chuku, ihiẹn ndịnị kẹ ịhịan gi a rị ndụn — uwẹ kẹ ndụn gi a ban mmẹ nwẹn obi. Ị nọ nwan zụọ m emuni, dọnmẹ m ndụn.

¹⁷ Eziẹ, erere m rọ nị ẹnya hụn m ihiẹn ọ hụn m. Makẹ ufiri ihiẹn-ọsụsụọ ị y'a nịnị m danye olu ntikpọ ahụn; y'e nugụọ njọ m ile ye azụụn ị —

¹⁸ makẹni alị-mmọn as'ẹka ye i ekele; ọnwụn as'ẹka ja ị mma; ndị hụn labangụ imẹ ili enwọnkọzị olilẹnya hụn w'e gi gi i dọn ẹnya.

¹⁹ Ndị rị ndụn — ndị rị ndụn sụọ a ja ị mma — kẹ m dọn rị a ja ị mma tannị; nẹdi a gwa ụmụ a k'i mẹhan onyẹ wẹ gi e dọn ẹnya.

²⁰ Osolobuẹ jẹnkọ d'a zụọpụha m, ẹnyi a nọ imẹ Ụlọ-nsọ Osolobuẹ! gi ụbọ bụsọnmẹ ẹbụ, ẹnyi e we nwụn.

²¹ Ihiẹn ndịnị mẹ ogẹn Azaya gi gwagụ wẹ “Kparị nị ẹhụhụọ-figi magbu, ụnụ e gi ẹ zụzụ ẹsusue hụ, o k'a dịnhịn.”

²² Ogẹn ahụn, Hezikaya jụ a sị a, “Kị m'e gi marịn nị m jẹnkọ d'a dịnhịn, jẹnmẹzi Ụlọ-nsọ Osolobuẹ?”