Azaya 37 - Ika

Isi Nke Mmẹsa Kwasị Ọgụn Hezikaya A Kwanghọsị Osolobuẹ

¹ Ogẹn Hezikaya gi nụ ihiẹnni, ọ nọ tika ẹwuru ile o yi, yiri ẹkwa-achọ makẹ ihiẹn ụyanị mẹni, shi imẹ Ụlọ-nsọ Osolobuẹ.

² Ọ nọ zi Ẹliakim hụn e lepụn'a obi-eze ẹnya lẹ Shẹbụna wụ akanwe lẹ ndị-isi nchụn-ẹjan d'a hụn onyẹ-amụma wụ Azaya nwa Emọzụ — uwẹ lẹ ẹkwa-achọ wẹ ile yi.

³ Wẹ nọ sị Azaya, “Eze wụ Hezikaya sị, ‘Ogẹn nsọngbu lẹ mkpari lẹ ụya a bịagụọnị ẹnyi nwan. Ọ nọ kẹ ebe nwa nọ kpuyechanrịn isi n'ọ pụha — kanị nnẹ ẹ ahụnnị ndụn kịnpụha a!

⁴ O nwọn ikẹn mẹni Osolobuẹ wụ Chuku i a nụgụọ oku-ọnụ onyẹ-isi agha Asiria — onyẹ hụn eze Asiria zi d'a kpari Chuku hụn rị ndụn. Ikẹnkwọ Osolobuẹ wụ Chuku i a jụgbọ a yeni ihiẹn Osolobuẹ nụ ọnụ a. Dodo, mẹni ẹnyi ndị họdụ alịnị ekpere!’ ”

⁵ Ndị hụn eze wụ Hezikaya zihẹ e zigụ Azaya ozi eze sị wẹ zi ẹ,

⁶ Azaya nọ sị wẹ, “D'a gwa nị di-nwọnni ụnụ nị Osolobuẹ sị: ‘Atụlẹ egun ihiẹn ndị ị nụ, ihiẹn hụ idibo eze Asiria gi kpari m.

⁷ M jẹnkọ d'e mẹ ẹ nụ ozi, ọ lakin alị a; e mẹ m wẹ gi ọpịa-agha gbu ẹ ebẹhụ.’ ”

⁸ Ogẹn onyẹ-isi agha Asiria gi nụ nị eze Asiria a ghagụọ alị Lakishi pụ, ya ọ nọ kin azụụn, ọ nọ hụn eze k'ọ rị a lụsọn Libna agha.

⁹ Sẹnakẹribụ wụ eze Asiria nọ nụ, “Eze ndị Ẹtiopịa wụ Tir'haka kịla ndị-agha d'a maye i ọgụn.” Ọ nụ a, ọ nọ zi wẹ d'a gwa eze alị Juda wụ Hezikaya.

¹⁰ Ọ sị wẹ, “Sị nị eze alị Juda wụ Hezikaya: Anịkwọlẹ mmọn ụnụ ahụn ụnụ gi nwan e dọn ẹnya dufie ụnụ, a sị ụnụ ‘Jerusalẹm abankọ eze Asiria ẹka.’

¹¹ Ụnụ a nụgụọ ihiẹn ndị-nze Asiria mẹ alị ile rị ichẹn-ichẹn: kẹ wẹ dọn tikpọchanrịn wẹ. Nị ụnụ nwẹn s'ẹka wanahịn?

¹² Mmọn ichẹn-ichẹn alị ndị hụn ndị-nze bu m ụzọ kị tikpọchanrịn a saghọ ẹka zụọpụha wẹ, mmọn ndị Gozanị lẹ Haranị lẹ Rezẹfụ lẹ ndị Idẹni te bi Tẹlụ-Asa?

¹³ Elebe kẹ eze alị Hamatị lẹ eze alị Apadị rị; elebe kẹ eze alị Sẹfavụ lẹ eze Hẹna lẹ eze Iva rị?”

Ekpere Hezikaya

¹⁴ Hezikaya nọ narịn ndị-ozi hụ ẹkụkwọ-ozi hụ, gụn a. Ya ọ nọ we ẹ shi Ụlọ-nsọ Osolobuẹ, shịapụ a ebẹhụ ihun Osolobuẹ.

¹⁵ Hezikaya nọ mẹ ekpereni jẹnni Osolobuẹ.

¹⁶ Euu Osolobuẹ Ihiẹn Ile rị okpuru ẹ! Chuku Izrẹlụ; Onyẹ hụn nọdị alị ukpo ẹ elu Chẹrobu ndị ahụn nwọn nku! Ịyụ wụ Chuku nke-esi hụn alị-eze ile rị elu-ụwa rị okpuru ẹ; ịyụ ke elu-igwee lẹ ụwa.

¹⁷ Osolobuẹ, dodo gọn ntịn n'ị nụ! Osolobuẹ, dodo shịapụ ẹnya ị n'ị hụn! Nụ ihiẹnni ile Sẹnakẹribụ zi wẹ d'e ku hụn o gi a kpari ịyụ wụ Chuku hụn rị ndụn.

¹⁸ Euu Osolobuẹ, ezioku rọ nị ndị-nze Asiria e tikpọpụgụọ ndị alị ndịnị ile, gba alị wẹ ile okpokoro,

¹⁹ tụ mmọn wẹ ile ye imẹ ọkụn — makẹni ẹlẹ wẹ ezigbo ẹ, mkp'osisi lẹ ọmụma hụn ịhịan gi ẹka mẹmẹ kẹ wẹ wụhụ.

²⁰ Osolobuẹ wụ Chuku ẹnyi, dodo zụọpụha nwan ẹnyi ẹka a — kẹni alị-eze ile rị elu-ụwa gi ẹ marịn nị ịyụ sụọ wụ Chuku nke esi, ịyụ hụn wụ Osolobuẹ.

Kẹ Eze Asiria Hụ Dọn Dan

²¹ Ya Azaya nwa Emọzụ nọ zi ozi jẹnni Hezikaya, sị a, “Osolobuẹ, Chuku Izrẹlụ sị: Makẹni y'a kpọkuọlẹ m banyeni Eze Asiria wụ Sẹnakẹribụ —

²² Ọnwan wụ ihiẹn mmẹ wụ Osolobuẹ ku banyen'ẹ: Eze Asiria, Nwagbọọ wụ Zayọnụ rị a mụ ị ẹmụ, e legberi i; nwa-okpoho wụ Jerusalẹm e rugbudẹ i imi ebe ị gbapụkọ.

²³ Onyẹ k'i kpari hụnnị ile, e kuja oku ẹ? Onyẹ k'ị gan hụnnị ile? Onyẹ k'ị rị e bọnmẹni? Onyẹ-nsọ Izrẹlụ rọ!

²⁴ Y'e gigụọ ndị hụn i zihẹ kpari Osolobuẹ ọda-ọda; y'a nyangụọ isi, sị, ‘E gigụọ m ụgbọ-ẹshin m bu ọda ru mkpọnụnụ ugu rudẹ mkpọnụnụ ugu ndị ka ugu imẹ Lẹbanọnụ; e gbutugụọ m osisi sida ndị kachanrịn usue ebẹhụ, gbutuzikwọ paịnị ndị ka mma ebẹhụ. E rugụọdẹ m ugu ndị hụn kachanrịn e te rịn'a lẹ ebe ẹgboko ẹ nọ kachanrịn mma.

²⁵ E gugụọ m ọmị imẹ alị ndị-ọzọ, ra mirin wẹ, a zọgụọ m iyi ile rị alị Ijiptu ụkụ, a tahị wẹ.’

²⁶ “Ụnụ eke nụ nị mmẹ ku ẹ kete-kete nị ihiẹn ndịnị k'e mẹ? Mmẹ rotọ wẹ ẹdẹi — e mẹgụọ m wẹ nwan ogẹnni, ebe m nọ nwan mẹ i tikpọchanrịn obodo ichẹn-ichẹn zegbu enwẹn wẹ — e họnrin wẹ ikpọn ọmụma.

²⁷ Ndụn arịzị ndị obodo ndị ahụn, uhue hụ e hue wẹ, ifẹnrẹn hụ e mẹgbu wẹ. Alịlọhịgụọ wẹ kẹ ihiẹn-akụnkụn rị ugbo, lekẹ ihiẹn pupụha nke ọhụn, nọkẹ irurue rị e pu elu ụlọ hụn anwụn a magbukẹnrin o gini d'e sue.

²⁸ Kanị a marịnghọ m'ị ru alị — kẹ ebe i bi kẹ ọpụpụ ị kẹ ọbanhan ị, a marịnzịghọ m eje-olulu ị rị e buni m.

²⁹ Makẹ olulu hụ ị rị e buni m lẹ ihiẹn ile i gi e kukarị enwẹn i, hụn ru m ntịn, m jẹnkọ d'e kọn ukpo m ye i imi, a kwa m'ị ngan ọnụ, e mẹ m'i gha ụzọ ị gha bịa kin azụụn.

³⁰ Hezikaya, ọnwan kẹ y'e gi marịn n'o jẹnkọ d'a rị ẹrịra, ẹdịndan kẹ ụnụ k'e ri ahụanị lẹ akan-ile — kanị hụn mẹ ẹ ahụa ẹtọ, kụn nị ihiẹn-ugbo ghọrị — kụn nị vaịnị ri.

³¹ Ndị Juda họdụnị k'a gbazị mkpọgụn ibe alị, mị mkpụrụ ibe elu.

³² Ẹghẹẹ, ịhịan k'a họdụ imẹ Jerusalẹm, igunrun k'a wanahịn imẹ ndị rị ugu Zayọnụ. Osolobuẹ ihiẹn ile rị okpuru ẹ k'e gi adụdụ a mẹ ihiẹnni.

³³ “Lee nwan ihiẹn Osolobuẹ ku banyeni eze Asiria: ‘Ọ banhankọ obodoni; ọ gbakọdẹ ụta ọwụlẹ ebeni. Ndị-agha a lẹ akpaịn wẹ anọkunmẹkọdẹ Jerusalẹm; ọ rụnkọ ihiẹn w'a nọdị a lụsọn ndị rị azụụn mgbọn agha.

³⁴ Ụzọ ọ gha bịa k'o k'a gha la — ọ banhankọ obodoni.’ Ya kẹ Osolobuẹ ku!

³⁵ Ọ sị, ‘M k'e che obodoni nche, zụọpụha a — makẹ ufiri mmẹ lẹ enwẹn m lẹ ufiri odibo m wụ Defidi!!’ ”

Osolobuẹ Mẹ Eze Asiria Ihiẹn O Ku

³⁶ Ya Mmọn ozi Osolobuẹ nọ jẹn ebe ndị-agha Asiria ziẹntọ, gbupụ ndị-agha nnụ-uku isẹn-kwasị-ọgụn-itenẹi (185,000). Eki e fọn, ndị alị a hụn ozun ndị hụ ile kẹ wẹ jun ụzọ ile!

³⁷ Ya kẹ eze Asiria wụ Sẹnakẹribụ nọ kịrị ndị agha họdụnị la, lakin isi-alị a wụ Ninivẹ d'a nọdị.

³⁸ O ru ụhụọhịn ohu, ebe ọ rị e fe ofufe imẹ ụlọ mmọn a wụ Nis'rọkụ, ụmụ a ikẹnnyẹ ẹbụọ wụ Adramẹlẹki lẹ Sharẹza nọ gi ọpịa-agha wẹ gbu ẹ — gbashi alị Araratị. Nwa a okẹnnyẹ ọzọ wụ Ẹsahadọnụ nọ rikin ẹ eze.