Azaya 36 - Ika

Isi Nke Mmisin Kwasị Ọgụn Eze Ndị Asiria A Bịa N'o Weri Jerusalẹm

¹ Hụn mẹ ẹ ahụa mmẹnọ Hezikaya kịma alị Izrẹlụ, Sẹnakẹribụ wụ eze alị Asiria nọ bịa, mẹrichanrịn obodo ile wẹ tụnhunmẹ mgbọn imẹ alị Juda, weri wẹ.

² Eze Asiria nọ gha Lakishi zi onyẹ isi-agha a lẹ ndị-agha bu ọda, jẹnni Hezikaya imẹ Jerusalẹm. Onyẹ-isi agha ahụn e ru Jerusalẹm, ọ nọ kụsị ụwaya hụ wẹ gha e jẹn ogige Ọsụ-ẹkwa nọ a sụ ẹkwa, ụwaya hụ rị ẹhụ uroro-amị Ọgọdọ-mirin Rị Ibe-elu.

³ Ya kẹ onyẹ hụn e lepụ obi-eze ẹnya wụ Ẹliakim nwa Hil'kia, nọ pụha ọnụ-mgbọn Jerusalẹm d'e kunrun ẹ, ịya lẹ Shẹbụna wụ akanwe wị lẹzi nwa Asafụ wụ Jụa hụn e dọnmẹ ẹkụkwọ.

⁴ Onyẹ-isi agha alị Asiria hụ nọ sị wẹ, “D'a gwa nị Hezikaya: “Lee ihiẹn eze-kanị wụ eze alị Asiria ku — ọ sị: K'i gidẹ nwan e dọn ẹnya obi gi e ru i alị ẹnịna?

⁵ Nị m gwakwọ ị, ẹlẹkwọ imẹ-ọnụ kẹ wẹ gi e mẹ ẹ, kanị inwọn ndị-agha lẹ ịma lụ agha! Onyẹ wụ onyẹ hụn i gi e dọn ẹnya i gi nwan nupụ isi okpuru m?

⁶ “Lee ẹnya, ị rị e lee ẹnya nị Ijiptu jẹnkọ d'a zụọ ụnụ; Ijiptu wụhụ ọkpọ kpagini hụn a dụnpu onyẹ ọwụlẹ danbemẹn'ẹ ẹka. Ẹrịra kẹ eze ndị Ijiptu wụ Fẹro e mẹ ndị ile gi ẹ dọn ẹnya.

⁷ Ikẹnkwọ, ụnụ sị m, ‘Osolobuẹ, Onyẹ ẹnyi e fe, kẹ ẹnyi tụkwasị obi.’ Ẹlẹ ụlọ-mmọn Osolobuẹ lẹ ebe wẹ nọ a chụnyen'ẹ ẹjan kẹ Hezikaya wepụsọnmẹ, sị ndị Juda ile lẹ ndị rị isi obodo ebeni wụ Jerusalẹm, ‘Ụlọ-nsọ ebeni kẹ ụnụ a nọ fe ofufe’?

⁸ “Nị ẹnyi gi ẹfan di-nwọnni-m wụ eze Asiria hụn m rị a nọkin ẹnya ku: nị m ye ụnụ ẹshin-agha nnụ-isẹn (2,000) kikẹnni, omẹni ụnụ te k'a hụndẹ ndị-agha nnụ-isẹn imẹ ụnụ buche elu wẹ?!

⁹ Nanị ụnụ a dọn nwan s'ẹka chedẹ itu-agha di-nwọnni-m ohu ọgụn — ọsụọkwọn'a hụn kachanrịn ntịn rọ, ọsụọkwọn'a Ijiptu ụnụ gi e dọn ẹnya yedẹ ụnụ ụgbọ-ẹshin agha lẹ ndị k'e nyinni wẹ?

¹⁰ “Ọzọ, ụnụ rịdẹ nwan e ro nị m bịa ihiẹn ẹka m d'a maye alịnị, tikpọ a, nị ẹlẹ Osolobuẹ zi m? Kaka! Osolobuẹ lẹ enwẹn ẹ sị mmẹ d'a lụsọn alịnị agha, tikpọ a.”

¹¹ Ya kẹ Ẹliakim lẹ Shẹbụna lẹ Jụa nọ sị onyẹ-isi agha hụ, “Dodo, sụ nị ẹnyi wụ idibo i Aramaịkị, nị ẹnyi a ghọta a aghọta. Asụlẹ ni ẹnyi asụsụ ẹnyi wụ Hibru, makẹ ndị nke ẹnyini rịsọnmẹ elu mgbọn gha a ghọta ihiẹn ị rị e ku.”

¹² Kanị, onyẹ-isi agha eze Asiria hụ nọ shịarị wẹ, sị, “Ụnụ te rị e ro ni di-nwọnni ụnụ lẹ ụnụ ndị-isi sụọ kẹ di-nwọnni-m zi m d'a gwa ihiẹn ndịnị; nị ọ gbashịarịnị ndịnị rị elu mgbọn hụn jẹnkọ d'e ri nsịn wẹ, ra mamịn wẹ kẹ ụnụ k'a dọn mẹ?”

¹³ Ya ọ nọ lihi ọtọ, gi asụsụ Hibru yi oro nị ịhịan ile rị elu mgbọn nụ, ọ sị wẹ, “Gọn ni ntịn ihiẹn eze-uku wụ eze alị Asiria ku!

¹⁴ Eze-uku sị, ‘Anịkwọlẹ ni Hezikaya dufie ụnụ — ọ sakọkwọ ẹka zụọpụha ụnụ!

¹⁵ Anịkwọlẹ ni Hezikaya mẹ ụnụ gi Osolobuẹ dọn ẹnya, ebe ọ n'a sị ụnụ “Eziẹ, Osolobuẹ k'a gbapụha ẹnyi; o wekọ alịnị ye eze ndị Asiria.” ’

¹⁶ Egọnkwọlẹ ni Hezikaya ntịn. Eze Asiria sị: ‘Kweyeni ni m, ụnụ a pụha d'e we enwẹn ụnụ che okpuru m; ogẹn ahụn, onyẹ ọwụlẹ imẹ ụnụ a hụn ụzọ biri iwe ẹ — e ri mkpụrụ-osisi vaịnị lẹ figi ọ kụn, a ra mirin ọmị a —

¹⁷ d'e ru mgbe m'e gi bịa d'e weri ụnụ shi alị ọzọ hụn rịchanrịn kẹ nke ụnụ, alị ọka ichẹn-ichẹn lẹ manya rị, alị ihiẹn-oriri lẹ ugbo-vaịnị jun.’

¹⁸ “Anịkwọlẹ ni Hezikaya dufie ụnụ — hụnnị ọ rị a sị ụnụ ‘Osolobuẹ jẹnkọ d'a gbapụha ẹnyi.’ O nwọntughọ mmọn alị ọwụlẹ gbapụha alị a ẹka eze Asiria?

¹⁹ Elebe kẹ mmọn alị Hamatị lẹ nke Apadị rị? Elebe kẹ mmọn ndị ahụn ndị Sẹfavụ e fe rị? Asaghọ wẹ ẹka zụọpụha obodo Sameria ẹka m?

²⁰ Imẹ mmọn ndịnị ile, elee hụn sa ẹka zụọpụha alị a ẹka m. Nanị kẹ Osolobuẹ ụnụ e dọn nwan s'ẹka zụọpụha Jerusalẹm ẹka m?”

²¹ Kanị ndị Juda ahụn nọ gba a nkịtịn, onwọnni ihiẹn wẹ shịarị a — makẹni eze wẹ wụ Hezikaya ye iwu, sị, “Ashịarịlẹ n'a ihiẹn ọwụlẹ.”

²² Ya kẹ nwa Hil'kia wụ Ẹliakim hụn e lepụ obi-eze ẹnya lẹ akanwe wụ Shẹbụna lẹ nwa Asafụ wụ Jụa hụn e dọnmẹ ẹkụkwọ nọ kin azụụn, banyezi imẹ Jerusalẹm. A dọwagụ wẹ ẹwuru ye enwẹn wẹ olu makẹ ihiẹn ụyanị mẹni, wẹ nọ buru Hezikaya d'a gwa a ihiẹn onyẹ-isi agha Asiria ku.