Azaya 34 - Ika

Isi Nke Mmẹnọ Kwasị Ọgụn Ihiẹn Chuku K'e Mẹ Alị Ichẹn-ichẹn

¹ Nọzụnhan nị d'e gọn ntịn, ụnụ ndị alị ichẹn-ichẹn; ndị alị ile, gọn ni ntịn! Ụwa lẹ ihiẹn ile jun imẹ ẹ ya nụ nwan, ụwa lẹ ihiẹn ile gha imẹ ẹ pụha ya nụ!

² Osolobuẹ rị e busọn ndị alị ile okẹn olulu — o gi ọnụma e sọn ndị-agha wẹ ile; o k'e tikpọpụchanrịn wẹ, o wegụọ wẹ ye ni wẹ gbu wẹ.

³ Elikọ wẹ ozun wẹ; ozun wẹ k'e shingbarị; ẹdeke wẹ e huru elu ugu.

⁴ Okokisẹ ile rị igwere sikọ d'e dẹnpụ, igwere lẹ enwẹn ẹ jẹnkọ d'a fịfịma kẹ ute. Ihiẹn ile rịn'a jẹnkọ d'a danpụ — lekẹ ẹhụhụọ-vaịnị ọkpọ-nkụn, kẹ akpụrụ-figi shinwụnnị dọn a danpụ.

⁵ Ọpịa-agha m rajungụ ẹfọ elu-igwere, o k'e hidan d'e ye alị Ẹdọm afụnfụn, ndị alị Ẹdọm hụn m wegụ kwanị ndị k'e gbuchanrịnnị wẹ.

Ihiẹn Chuku K'e Mẹ Alị Ẹdọm

⁶ Ẹdeke e jungụọ Ọpịa-agha Osolobuẹ; ụtọrọ e jungụọ a — nọkẹ sị o gbu ewu lẹ ebulu, ụtọrọ rị akụnrụn ebulu. Makẹni Osolobuẹ k'e gbu ịhịan kẹ anụ wẹ gi a chụn ẹjan imẹ obodo Bozra rị alị Ẹdọm — o k'e gbu okẹn ogbugbu imẹ alị Ẹdọm!

⁷ Wẹ ile k'a dan — kẹ ndị wụ efin a kpa ikẹn kẹ ndị zegbu enwẹn wẹ lekẹ okoro-efin kẹ ndị kẹnrẹnnahịn ibe wẹ. Akpakalị Ẹdọm k'a rajun ẹdeke ẹfọ, ẹjan rịn'a k'e mẹ ụtọrọ-ụtọrọ.

⁸ Makẹni Osolobuẹ a kayegụọ ụhụọhịn o k'e mẹgwarị; ọ kayegụọ ahụa o k'e gi mẹshi alị Ẹdọm ikẹn, makẹ ufiri Zayọnụ rị alị Izrẹlụ.

⁹ Ogẹn ahụn, mirin alị Ẹdọm k'e wiwi, họnrin korota wẹ gi a rụn ụzọ; ẹjan rị alị hụ k'e họnrin nsịn-ẹnyanwụn rị a dụn ọkụn; alị Ẹdọm ile e họnrin korota rị a dụn ọkụn.

¹⁰ Ọkụn hụ adụnbehikọ uhinhin lẹ efinaị, ẹnwụnrụn a k'a rị a lọshi elu jẹnrin ejẹn. Alị Ẹdọm k'a gba okpokoro jẹnrin ejẹn; ịhịan aghakọzịdẹ ebẹhụ kaka.

¹¹ Ozuzu ichẹn-ichẹn k'e bisọnmẹ ebẹhụ; udele ichẹn-ichẹn k'e birizikwọ ebẹhụ. Osolobuẹ k'e dọnrin ẹnya mẹ alị Ẹdọm ile gba okpokoro, mẹ ẹ wụrụ mkpọkọ-ụlọ mkpọkọ-ụlọ.

¹² Ndị isi wẹ asakọzị ẹka sị, “Ebeni kẹ m rị a kị”; ndị ọkịkị wẹ arịkọzị a.

¹³ Ogun k'e suekin ụlọ-uku ile wẹ te gi dọn ẹnya, abịogun lẹ mkpalị e suekin ebe ile wẹ te a gbaban. O k'e họnrin ebe nkitẹ-ọfịa wụ jakalụ nọ a kpa lẹ ebe ozuzu-ọfịa e bi.

¹⁴ Anụ-ọfịa ichẹn-ichẹn w'a hụn imẹ atụ lẹ nkitẹ ọfịa wụ haịna k'a nọ ebẹhụ e bigbama; ewu-ọfịa lẹ ibe wẹ k'a rị e yitarị oro; anụ ndị a kpa imẹ uhinhin k'a nọdẹ ebẹhụ e zu ikẹn, ẹhụ k'e fu wẹ.

¹⁵ Ozuzu k'a kụ ẹkụ ebẹhụ, e yi ẹkwan, e gbu ẹkwan a, a kịrị. Anwụnkwọ nkẹ k'a bịazịkwọ — okẹn lẹ onyẹnnyẹ, okẹn lẹ onyẹnnyẹ.

¹⁶ Chọ ihiẹnni imẹ Ẹhụhụọ Osolobuẹ, y'a gụn a: Onwọnni akpụ anụ ohu imẹ ndịnị hụn jẹnkọlẹni d'a rị a; onwọnni hụn ya lẹ okẹn ẹ jẹnkọlẹni d'a wị. Makẹni, ọnụ Osolobuẹ e kuọlẹ n'o k'a rị ẹrịra — Mmọn Osolobuẹ jẹnkọ d'e wegbama wẹ.

¹⁷ O kegụọnị wẹ alị hụ, o keyesọnmẹ onyẹ-onyẹ azụụn nke ẹ; wẹ k'e nwọnrin ẹ jẹnrin ejẹn biri ẹ gha agbọ pụ agbọ.