Azaya 33 - Ika

Isi Nke Mmẹtọ Kwasị Ọgụn Osolobuẹ K'e Tikpọ Onyẹ Rị E Tikpọnị

¹ Nsọngbu rị e che i, yụ hụn e tikpọnị wẹ kelẹni tikpọ; ịyụ hụn e re ndị ọzọ bụ wẹ eke re i! I tikpọgụ, e tikpọ wẹ ịyụ nwẹn! I regụ ndị ọzọ, ndị ọzọ k'e rezikwọ ịyụ nwẹn.

² Osolobuẹ dodo, mẹ ni ẹnyi omikẹn — nị ịyụ kẹ ẹnyi rị e lee ẹnya. Wụrụ ikẹn ẹnyi ụtụntụn ọwụlẹ; wụrụ nị ẹnyi onyẹ nzụọpụha ogẹn nsọngbu.

³ Wẹ nụ ụzụn ị, ndị alị ichẹn-ichẹn rị a lụsọn ẹnyi agha a gbama ọsọ; I lihi ọtọ, alị ile a gbayịya.

⁴ Ihiẹn ile ụnụ bulụa agha a la, e mẹ w'ẹ ihiẹn igurube lẹ ọwụwụ mẹ mkp'ẹhụhụọ.

⁵ Osolobuẹ e nwọnkẹ ọghọ; elu-igwee k'o bi; o k'e gi ezioku lẹ ịrị-ọchan mẹjun Zayọnụ wụ Jerusalẹm.

⁶ O k'e mẹ ẹnyi saẹka e wuzo imẹ ọnọdị ọwụlẹ — a zụọ ẹnyi a zụọsọnmẹ, e ye ẹnyi akọ-lẹ-uche lẹ amamihiẹn ọda-ọda. Ịtụ-egun Osolobuẹ sụọ wụ ihiẹn k'a rị a mkpa.

⁷ Kanị, ndị dikẹn ụnụ rị nwan ụwaya a kwan ẹkwan; ndị ụnụ hanjẹn d'a rịọ ndị iṅẹnrẹn a kwanlụagụọ ụya!

⁸ Ụwaya ile a gba okpokoro, onwọnzini onyẹ a ghanị wẹ. Egizini wẹ ihiẹn nwẹn ụnụ lẹ wẹ kwerigbama rụn, e lelịa wẹ ọshẹri ile rịn'a.

⁹ Ụya rị nwan e ri alịnị ile, ọ hụ a la iwi, ẹgboko Lẹbanọnụ e shinwụngụọ, ifẹnrẹn e mẹgbu ẹ! Alị Sharọnụ rị nwan kẹ alị ọkpọ-nkụn. Osisi ndị jun Bashanị lẹ Kamẹlụ a gbụchanrịngụọ ẹhụhụọ.

¹⁰ Kanị, Osolobuẹ sị, “M jẹnkọ nwan d'e lihi; m jẹnkọ nwan d'a ghọsị ikẹn m, gi ẹ nwọnrin ọghọ; ụnụ jẹnkọ nwan d'a gbaye m.

¹¹ Iroro ụnụ tụ wụhụ ẹfịfịa mmaka, o jẹnkọ d'a mụnị ụnụ ẹfịfịa ọkpọ-nkụn sụọ — umẹrẹn ụnụ wụ ọkụn rịn'a hụn e bu ụnụ e ri.

¹² Ọkụn k'a dụn wẹ ile rị a lụsọn alị Izrẹlụ ọgụn, dụn wẹ dụnchanrịn, wẹ k'a dụn lekẹ ogun wẹ betọ.”

¹³ Ndị ile rị ebe teni, nụ nị ihiẹn ile m mẹ; ndị ile rị nsue, ku n'ẹ nị e nwọnghọ m ikẹn.

¹⁴ Egun hụ a tụgbu ndị-njọ rị Zayọnụ, ẹhụ hụ a ma ndị ghalẹni e sọn Osolobuẹ nni: wẹ hụ a sị, “Onyẹ lẹ ọkụn rị a dụnnị k'a s'ẹka nọdị?! Onyẹ k'a sa ẹka sọn ọkụn rị a dụnnị nọdị?!”

¹⁵ Ndị e bi ezigbo obibi, e ku ezioku; ndị a jụ egho mmẹgbu; ndị a jụ egho-azụụn; ndị ghalẹni a chọ nị wẹ nụ oku igbu-ọchụn, ndị ghalẹni a chọ nị wẹ gidẹ ẹnya wẹ hụn eje-ihiẹn.

¹⁶ Ndị nọ ẹnịna k'e bi ebe jẹn elu eje-ihiẹn ghalẹni e ru, elu ugu ebe ọmụma nọ e gbọnhunmẹ wẹ kẹ wẹ k'e bi; achọkọ wẹ ihiẹn-oriri; mirin w'a ra agụkọ.

¹⁷ Ẹnya ụnụ k'a hụn eze lẹ ọghọ a, hụnzị alịnị k'ọ shịawaye ẹfọ.

¹⁸ Ụnụ k'a gha e ro eje ihiẹn-egun ndịnị mẹni ụnụ, ụnụ a jụma enwẹn ụnụ: “Elebe kẹ ọkị-agha uku hụ duhẹ ndị iṅẹnrẹn rị nwan? Elebe kẹ hụn nanị wẹ ụtụ rị nwan? Elebe kẹ hụn gụnnị wẹ ụlọ-nche uku rịsọnmẹ Jerusalẹm rị nwan?!”

¹⁹ Ẹnya ụnụ ahụnkọzị ndị ahụn e mẹkarị enwẹn wẹ — ndị ahụn a sụ asụsụ ichẹn ụnụ marịnlẹni, hụn a sụ ihiẹn ụnụ ghọtalẹni.

²⁰ Lemẹ ni Zayọnụ, obodo ẹnyi nọ e mẹ mmẹmmẹ nsọ ẹnyi rị ichẹn-ichẹn; ẹnya ụnụ k'a hụn Jerusalẹm kẹ o họnrin ebe mẹ jụụ hụn rị mma wẹ e bi, ọdụ ghalẹni e mẹhunmẹ — hụn wẹ ghalẹni a sa ẹka e huepụ mkpụkpọ a mọbụ tibe eriri wẹ gi limẹ ẹ ye mkpụkpọ —

²¹ makẹni Osolobuẹ k'e gi ọghọ a nọdị ebẹhụ, wụrụ Dikẹn ẹnyi, wụrụnị ẹnyi iyi uku lẹ iyi nta; ụgbọ-amaran ndị-iṅẹnrẹn asakọ ẹka a banhan a, okẹn ụgbọ wẹ hi-ogbe a ghakọ a.

²² Makẹni Osolobuẹ wụ onyẹ a hannị ẹnyi eṅẹn; Osolobuẹ wụ onyẹ e ye ẹnyi iwu; Osolobuẹ wụ eze ẹnyi. Ịya jẹnkọ d'a zụọpụha ẹnyi.

²³ Eriri ụgbọ ụnụ ekẹnrẹnzini, ẹkwa-ufere ụgbọ ụnụ ekẹnrẹnzini — ẹkwa ndị ahụn ashịapụzịnị. Wẹ k'a kwanarịn wẹ ihiẹn hụ ile bugbu enwẹn ẹ ọda wẹ nwọn, keri ẹ; ndị ngụrọ k'a hụndẹ hụn wẹ k'e buru la.

²⁴ Onwọnzini onyẹ bi Zayọnụ hụn k'a sị, “Emu rị a kụ m” — Osolobuẹ k'a gbagharị ndị bi ebẹhụ njọ wẹ.