Azaya 31 - Ika

Isi Nke Mmanaị-kwasị-ọgụn

¹ Nsọngbu rị e che ndị rị e jẹn Ijiptu d'a chọ eyemẹka, e gi ẹshin-agha wẹ e dọn ẹnya; wẹ rị e gi ụgbọ-ẹshin Ijiptu bugbu enwẹn ẹ ọda e dọn ẹnya, e gi ndị-agha wẹ e nyin ẹshin e dọn ẹnya makẹni wẹ bu ọda, hụn nkẹ wẹ e gi tụkwasị Onyẹ-nsọ Izrẹlụ obi, hụn nkẹ w'e gi jụ Osolobuẹ ihiẹn wẹ k'e mẹ.

² Kanị, Osolobuẹ nkẹ nwọnzikwọ uche: o zilanị wẹ nsọngbu, ọ latọnị ihiẹn ọ sị o k'e mẹ wẹ. Kaka! O k'e mẹshi ndịnị e mẹ eje-ihiẹn ikẹn, uwẹ lẹ ndị ahụn e yeni ndị e mẹ eje-ihiẹn ẹka.

³ Ịhịan mmaka kẹ ndị Ijiptu ụnụ gi dọn ẹnya wụ, ẹlẹ wẹ Chuku; ẹhụ mmaka kẹ ẹshin wẹ ndị ahụn nwọn, ẹlẹ wẹ mmọn! Osolobuẹ tịnpụhụ ẹka mẹ wẹ ihiẹn, onyẹ bịa d'e ye ẹka a kpọgburu, onyẹ wẹ rị e yeni ẹka a dan, wẹ ẹbụbụọ a dangungwọn, nwụnhụn.

⁴ Kanị, nke Osolobuẹ, ọ sị m, “Ẹwọrọ mọbụ nwa-ẹwọrọ gbu anụ, o ri ẹ, e dẹn; ọsụọn'a nị wẹ zidẹ igunrun ndị e du anụ d'a maye ẹ, onwọnni oro wẹ yi e mẹhunmẹn'ẹ; onwọnni ụzụn wẹ zụn o gi e dọn — o risọnmẹ ihiẹn ọ rị e ri. Ẹrịra kẹ Osolobuẹ k'a dọn lụnị ugu Zayọnụ ọgụn, o lekọ ẹnya azụụn.

⁵ Kẹ nnụnụ dọn e fehunmẹ ẹkụ a, ẹrịra kẹ Osolobuẹ ihiẹn ile rị okpuru ẹ k'a dọn chemẹ Jerusalẹm; o k'e che ẹ nche, zụọpụha a; o k'a ghafe elu ẹ, onwọnni ihiẹn o k'e mẹ ẹ; o k'a zụọpụha a.

⁶ “Euu ndị Izrẹlụ, kin ni nwan azụụn buru Osolobuẹ, ọ sụọn'a nị ụnụ e gigụọ nnupụ-isi ụnụ mẹ ẹ njọ ọda-ọda.

⁷ Eziẹ, ogẹn lala hụn ụnụ e gi ma mmọn siliva lẹ goru tuhu, ihiẹn ndịnị ẹka ụnụ mẹmẹ hụn ẹka ụnụ gi mẹ njọ.

⁸ “Ogẹn hụ, ọpịa-agha k'e gbu ndị Asiria, kanị ẹlẹ ọpịa-agha ịhịan; ọpịa-agha Osolobuẹ k'e gbu wẹ, ẹlẹ nke ịhịan, a gbanị wẹ ọpịa-agha hụ ọsọ; wẹ k'a nwụndọn ikorọbịa wẹ, gi wẹ họnrin igbọn.

⁹ Ọmụma Asiria k'e gi egun la, Ndị ọkị-agha a k'e gi egun gbapụ, hụn wẹ gihụ hụn ahịma-agha eṅẹnrẹn.” Ịya kẹ Osolobuẹ ku, Osolobuẹ hụn ọkụn a rị Zayọnụ; Onyẹ hụn ẹnya-ọkụn a rị Jerusalẹm.