Azaya 30 - Ika

Isi Nke Iri Kwasị Ọgụn Ụya K'e Ri Ndị Isi-ikẹn

¹ “Nsọngbu rị e che ụmụ rị e bu isi-ikẹn.” Ịya kẹ Osolobuẹ ku — “ụmụ rị e mẹ ihiẹn ẹka m rịlẹni; wẹ lẹ ndị ọzọ a kịgbamagụọ bụ ẹlẹ Mmọn m zi wẹ. Wẹ rị e gi ẹ e kpọn njọ a kwasị njọ.

² Wẹ rị e jẹn Ijiptu bụ ajụnị wẹ m uche m; a chọjẹn Fẹro wụ eze Ijiptu n'o chemẹ wẹ, e jẹn d'a rịọ alị Ijiptu n'o kpumẹ wẹ igungun.

³ Kanị, ifẹnrẹn kẹ ochemẹ hụ ụnụ chọkọ ẹka Fẹro k'e wẹhẹni ụnụ, ịfa kẹ igungun alị Ijiptu k'e buhẹni ụnụ.

⁴ Ọsụọkwọn'a ndị ụkọ wẹ hanjẹn e rugụọ nwan Zụanị alị Ijiptu, ọsụọkwọn'a nị ndị wẹ zi e rugụọ Hanẹsi alị Ijiptu,

⁵ ifẹnrẹn jẹnkọ d'e mẹchanrịn onyẹ ọwụlẹ, hụn wẹ gi danbemẹ alị nwọnlẹni erere o k'a bannị wẹ, alị nwọnlẹni ẹka o k'e yeni wẹ mọbụ ihiẹn rị mma o k'e mẹni wẹ, alị k'e buhẹni wẹ ifẹnrẹn lẹ ịfa sụọ.”

⁶ Lee ihiẹn Osolobuẹ ku banyeni anụmanụ ndị rị alị-ọkpọnkụn Nẹgẹvụ: Alị ọkpọ-nkụn hụ afụnfụn lẹ nsọngbu rị, alị okẹn-ẹwọrọ lẹ onyẹnnyẹ-ẹwọrọ rị, alị ẹjụ-alị lẹ eje-agwọ ichẹn-ichẹn jun — ịya kẹ ndị ụkọ wẹ zi fetuchanrịn — wẹ lẹ ihiẹn bugbu enwẹn ẹ ọda wẹ bu elu jaki lẹ ihiẹn ndị rị mkpa wẹ bu elu anyịnyan-mkpukpuke, hụn wẹ bujẹnkọnị ndị alị ahụn nwọnlẹni erere o k'a bannị wẹ,

⁷ alị Ijiptu hụn eyemẹka a jẹnkọlẹni d'e nwọn isi — alị Ijiptu hụn m'a kpọ, “Rehabụ, Okẹn-anụ ghalẹni a s'ẹka e mẹ ihiẹn ọwụlẹ.”

⁸ Jẹn nwan d'e de ẹ ye ihiẹn ụrụa idẹnya wẹ, y'e dezi ẹ ye imẹ ẹkụkwọ — kẹni, o ru ihun, ọ wụsọnmẹ ọshẹri.

⁹ Makẹni, ndị nnupụ-isi kẹ ndịnị wụ — ụmụ hụn a tụ ntụ, ụmụ chọlẹni nị wẹ nụ ihiẹn Osolobuẹ rị a gwa wẹ.

¹⁰ Wẹ sị ndị a hụn ụzọ, “Hụnbehi ni ọhụn ndị ahụn!” Wẹ sị ndị-amụma, “Gwabehi ni ẹnyi ezioku! Gwama nị ẹnyi ihiẹn ẹnyi chọ nị ẹnyi nụ — bumẹdẹ ni amụma-ntụ.

¹¹ Pụ nị ụzọ, ye ni efe, egizilẹ ni oku Onyẹ-nsọ Izrẹlụ ye ẹnyi nsọngbu.”

¹² Ya kẹ Onyẹ-nsọ Izrẹlụ gi nwan sị, “Ebe o mẹni ụnụ a jụgụọ ozini, tụkwasị mmẹgbu obi, gi ndufie dọn ẹnya,

¹³ njọnị jẹnkọ d'e mẹ ụnụ kẹ mgbọn jẹn elu gbawanị hụn rị a ṅanpụnị, hụn e ziẹntu idẹnmizi, njụbe ẹnya ohu —

¹⁴ ọ dangungwọnchanrịn kẹ ebe ite-ụrụa nọ kụkpọchanrịn, nke wụnị ahụnkọdẹ wẹ ibe ẹ ọwụlẹ hụn ru hụn wẹ e gidẹ bi ọkụn mọbụ hụn wẹ e gi kwọrị mirin.”

¹⁵ Di-nwọnni-ẹnyi, hụn wụ Osolobuẹ, Onyẹ-nsọ Izrẹlụ, sị: “Ibihutọ ẹka lẹ igi ndidin cheri m kẹ ụnụ k'e gi wanahịn, ịgba-nkịtịn lẹ igi m dọn ẹnya a wụrụ ikẹn ụnụ, kanị ụnụ ekwerini.

¹⁶ Ebe ụnụ sị, ‘Ẹshin kẹ ẹnyi k'e gi gba ọsọ, wanahịn!’ Ọsọ hụ kẹ ụnụ jẹnkọ nwan d'a gba! Ebe ụnụ sị, ‘Ẹshin ma gba ọsọ kẹ ẹnyi k'e gi gbapụ.’ Ndị chụkọnị ụnụ k'a gbakarị ụnụ!

¹⁷ Mmadụ nnụ-uku imẹ ụnụ k'a gbanị akpụ eṅẹnrẹn ohu ọsọ, ụnụ ile a gbanị mmadụ isẹn imẹ wẹ ọsọ — d'e ru ni ndị k'a họdụ imẹ ụnụ a nọhụ kẹ akpụ ọtọsị ohu wẹ kẹnmẹye ẹkwa-ahịma — hụn ya sụọ turu elu ugu lekẹ ẹkwa-ahịma ya sụọ rị elu òke.”

¹⁸ Ya haịn Osolobuẹ gi rị e che n'o mẹni ụnụ ọhụnma; o lihigụọ n'o mẹni ụnụ omikẹn. Osolobuẹ wụ Chuku e mẹ ihiẹn furuni. O k'a rịnị ndị ile e gi ẹ e dọn ẹnya mma.

¹⁹ Ụnụ ndị Zayọnụ, ndị bi Jerusalẹm, ụnụ akwankọzị ẹkwan. O jẹnkọ d'e mẹni ụnụ omikẹn ọda-ọda ụnụ kwanghọsị a! Hụn o gihụ nụ ẹkwan ụnụ, o k'a za ụnụ.

²⁰ Ẹghẹẹ, ọsụọn'a nị Di-nwọnni-ẹnyi te ye ụnụ ụya ri kẹ ihiẹn-oriri, ye ụnụ nsọngbu ra kẹ mirin, o zuemẹkọzị nwan enwẹn ẹ — ndị-nkuzi ụnụ ezuerikọzị, ụnụ jẹnkọ d'e gi ẹnya hụn wẹ.

²¹ Nke wụnị, ọ sụọn'a nị ụnụ kụye ẹka-nni mọbụ ẹka-ekpẹn, ụnụ k'a nụ olu rị ụnụ ibe azụụn, a sị, “Ọnwan wụ ụzọ, ghashi n'ẹ!”

²² Ogẹn ahụn, ụnụ k'e mẹrụ mmọn ụnụ wẹ gi siliva nyanhunmẹ lẹ hụn wẹ gi goru nyanhunmẹ, ụnụ jẹnkọ d'a mahu wẹ kẹ ẹkwa okpoho gi sọ ezi, sị wẹ, “Pụ nị ebeni!”

²³ Osolobuẹ jẹnkọ d'e mẹzi mirin zueni ụnụ makẹ nkpụrụ ụnụ kụnye alị; ihiẹn-oriri alị k'e ye ụnụ k'a rịchanrịn mma, jun. Ogẹn ahụn, efin ụnụ k'a nọ ọfịa shịanị ẹfịfịa jun a kpa nni.

²⁴ Kẹ okẹn-efin kẹ jaki ụnụ gi a rụn ọrụn k'e ri ẹfịfịa ọkpọ-nkụn wẹ betọnị wẹ lẹ ezigbo ihiẹn-oriri anụ wẹ gweni wẹ, hụn wẹ mẹmẹchanrịn ọhụnma.

²⁵ Ogẹn hụ Osolobuẹ k'e gbu ndị ahụn, ogẹn hụ ụlọ nche uku ndị ahụn w'a gbaban k'e gi rị a dan, mirin k'a rị e huni ụnụ elu ugu ile jẹn elu lẹ elu òke ile jẹn elu.

²⁶ Ifọn k'e ti kẹ ẹnyanwụn, ẹnyanwụn nkẹ k'e tiwaye ụzọ ẹsa — lekẹ ukpẹ akpọhịn ẹsa — ogẹn hụ Osolobuẹ k'e gi kẹnmẹ ndị nke ẹ ebe ile maranị, zụọ wẹ ẹhụ ọ rụ wẹ.

Ihiẹn Osolobuẹ K'e Mẹ Alị Asiria

²⁷ Lee n'ẹ, Osolobuẹ gi ẹfan a gha ebe teni lala, o gi eje-olulu rị a dụn kẹ ọkụn lala lẹ ẹnwụnrụn lọtọnị; ọnụma jun ẹ ụgb'ọnụ, ọkụn a dụnnị rị a ire.

²⁸ Umẹrẹn ẹ nọ kẹ okẹn mirin rị e huni, hụn e ru ịhịan olu. O mẹhunmẹ alị ichẹn-ichẹn ebe ọ nọ a yọ wẹ, a ghọsị n'o nwọnni ihiẹn wẹ wụ; ọ kwa ndị alị ichẹn-ichẹn ngan kẹ anụ, e gi ẹ e duhuhu wẹ.

²⁹ Ụnụ k'a bụ ẹbụ kẹ ụnụ dọn a bụ imẹ uhinhin mmẹmmẹ nsọ ụnụ; ẹfọ k'a sụọ ụnụ ụsụọ rịkẹ ogẹn ụnụ gi e gbu ẹkpịrị nyinkọ ugu Osolobuẹ — d'e kunrun Osolobuẹ, onyẹ hụn wụ Ọmụma Izrẹlụ.

³⁰ Osolobuẹ jẹnkọ d'e mẹ ịhịan nụ okẹn olu ẹ, mẹ wẹ hụn ẹka a k'ọ gha elu lala d'e mẹ wẹ ihiẹn — eje-ọnụma lẹ ọkụn rị a dụnnị lẹ ẹbi lẹ akpara lẹ ẹkwan-igwere k'o k'e gi bịa.

³¹ Olu Osolobuẹ k'e tiwa Asiria; o k'e gi ọkpọ a kụtu wẹ.

³² Osolobuẹ fịan wẹ ube mkpịnsịn ohu — ube mkpịnsịn hụ o gi e ye wẹ afụnfụn — ẹgede-chakachaka lẹ ụbọ-hapụ a han — ọ gha a dụ wẹ ịkpa, a lụsọn wẹ agha hụ.

³³ O tekẹmẹkẹ wẹ kwademẹ Tofẹtị ebe wẹ nọ a dụn ihiẹn ọkụn; a kwademẹgụọ w'a tọnị eze. E mẹgụọ wẹ mgbugbu ọkụn a miwaye, shịawaye, ọkụn lẹ nkụn e jun ẹ; umẹrẹn Osolobuẹ hụn rị e hupụha lekẹ nsịn-ẹnyanwụn rị e nwun ọkụn, e d'a mụ ọkụn ye ẹ.