Azaya 3 - Ika

Isi Nke Ẹtọ Ikpe Hụn Ma Alị Juda

¹ Lee n'ẹ nwan! Di-nwọnni-ẹnyi, hụn wụ Osolobuẹ ihiẹn ile rị okpuru ẹ, e d'a napụ obodo Jerusalẹm lẹ alị Juda ile ihiẹn ile wẹ gi e dọn ẹnya: kẹ ihiẹn-oriri kẹ mirin,

² kẹ dikẹn lẹ odogun-agha, kẹ ndị a han eṅẹn kẹ ndị-amụma, kẹ ndị a gba ẹfa kẹ ndị-ichẹn,

³ kẹ ndị ọkị-agha kẹ ndị nwọn ọkwa, kẹ ndị wẹ gi oku wẹ e dọn kẹ ndị marịn ọrụn kẹ ndị ile ma gwọ ọgụn.

⁴ Osolobuẹ sị, “M k'e mẹ ikorọbịa họnrin ndị-isi wẹ, ụmụ-ndu mmakalaka jẹnkọ d'a kị wẹ.

⁵ Ịhịan k'a rị e mẹja ibe wẹ: okẹnnyẹ hụ e mẹja okẹnnyẹ ibe ẹ, onyẹ ọwụlẹ hụ e mẹja ibe ẹ. Ikoro k'a kpari ndị ẹgẹdi, ndị mmaka a kpari ndị w'a gbaye.

⁶ Okẹnnyẹ k'a dọdọn nwẹnẹ ẹ imẹ ụlọ-iwe nẹdi ẹ, sị a, ‘Y'e nwọnghọdẹ ẹwuru: wụrụ nwan onyẹ-ndu ẹnyi; kịma mkpọkọ ụlọnị!’

⁷ Kanị nwẹnẹ ẹ k'e yi ụhụọhịn ahụn, sị, ‘Asakọkwọ m ẹka dọnzi ihiẹn-anaị! Ihiẹn-oriri mmaka arịdẹ iwe m, ẹwuru arịa! Etumẹkwọlẹ m onyẹ-ndu ndịnị!’ ”

⁸ Jerusalẹm rị a kpọgburu; Juda ile rị a dan; makẹ oku-ọnụ wẹ gi e sọn Osolobuẹ lẹ eje-omumẹ wẹ rị e mẹsọn ẹ, e nupụ isi okpuru ẹ, ọsụọn'a nị ọ hụ imẹ igunrun wẹ, e legha wẹ.

⁹ Ihun wẹ hụ a shịagbu wẹ ẹri: wẹ hụdẹ e ghoro njọ wẹ nọkẹ ndị Sodọm; w'a ra zuemẹ ẹ. Nsọngbu rị e che wẹ! E sehẹgụọnị wẹ enwẹn wẹ ntikpọ.

¹⁰ Gwa ndị ezi-omumẹ n'o k'a masịnị wẹ, makẹni wẹ jẹnkọ d'e ri ihiẹn wẹ rụn.

¹¹ Ọ masịkọnị ndị eje-omumẹ! Wẹ k'e mẹgwarị wẹ ihiẹn wẹ mẹ.

¹² Ụmụ-ndu hụ a kị ndị nke m nkịgbu, ikpoho hụzịd'a kị wẹ. Euu, ndị nke m, ndị-ndu ụnụ rị e duhuhu ụnụ; e wepụ ụnụ ụzọ rị mma.

¹³ Osolobuẹ e werigụọ ọnọdị a imẹ ọgwa; ọ chọ n'o kin ndị nke ẹ ikpe.

¹⁴ Osolobuẹ a mama ndị-ichẹn lẹ ndị-ndu ndị nke ẹ ikpe: “Ụnụ haịn alị vaịnị m wụ Juda gi wiwi; ihiẹn ụnụ kwanarịn ndị-igbẹnnyẹ jun iwe ụnụ.

¹⁵ Kị ụnụ rị e gwerinriẹnni ndị nke m? Kị ụnụ rị a bịangbuni ndị-igbẹnnyẹ?” Ịya kẹ Onyẹ-nwọnni-ẹnyi wụ Osolobuẹ rị a jụ ụnụ.

¹⁶ Osolobuẹ sị, “Ikpoho Zayọnụ rị a họnrọn, e setịn olu a ghahunmẹ, e gbuhunmẹ ikpu-ẹnya, e jẹn ịnyanga-ịnyanga, ihiẹn wẹ yi olu-ụkụ hụ a hụ.

¹⁷ Onyẹ-nwọnni ẹnyi k'e gi ufiri ihiẹnni bu ẹtẹ che ikpoho Zayọnụ isi; ẹghẹẹ, Osolobuẹ k'e mẹ isi gbe wẹ akpan.”

¹⁸ O ru ụhụọhịn ahụn, Osolobuẹ jẹnkọ d'a napụchanrịn wẹ ihiẹn-mma wẹ: kẹ ndị w'e yi ẹka kẹ ndị w'e kẹnmẹ ntutu kẹ ndị w'e yi olu;

¹⁹ ihiẹn-ntịn lẹ agbụ-ẹka lẹ ẹkwa wẹ gi e kpumẹ ihun;

²⁰ okpu-isi ichẹn-ichẹn lẹ ẹgan w'e yi olu-ụkụ lẹ nfifie wẹ gi a chọ mma lẹ sẹnti lẹ ọgụn ndị w'e yi;

²¹ ọla ndị wẹ gi e biye ẹka lẹ ọla w'e yi imi;

²² ezigbo ẹwuru tuerusọnmẹ alị lẹ ndị w'e yiye elu ẹ lẹ mmụ-ẹkpa

²³ lẹ ughegbe lẹ ẹwuru linẹ lẹ okpu-isi ma mma lẹ ẹkwa w'a tụye olu.

²⁴ Hụn nkẹ w'e gi kun fuẹin, wẹ k'e shinja; ẹgbụn k'a nọkin ẹnya nfifie wẹ; isi-akpan k'a nọkin ẹnya ntutu wẹ te dọnmẹ ọhụnma; ẹkwa-achọ k'a nọkin ẹnya ẹwuru rị mma; ahịma w'e ye igbọn k'a nọkin ẹnya mma-ẹhụ wẹ.

²⁵ Ọpịa-agha k'e gbu ikẹnnyẹ ụnụ; odogun-agha ụnụ k'a nwụn imẹ agha.

²⁶ Obodo Zayọnụ k'a gha a kwan, a kwan ụya; o k'a gwọrị alị lekẹ okpoho di lẹ ụmụ nwụnnahịn.