Azaya 29 - Ika

Isi Nke Itenẹi Kwasị Ọgụn Chuku K'e Mẹshi Jerusalẹm Ikẹn

¹ O jẹnkọ d'a jọ Ariẹlụ wụ Jerusalẹm njọ — Ariẹlụ, obodo ahụn Defidi te bi! Tọkwọ nị e mẹ mmẹmmẹ ahụa-ahụa; tọkwọ nị e mẹ mmẹmmẹ ile ụnụ gi e fe m,

² kanị m k'e mẹshikwọ obodo ụnụ wụ “Ariẹlụ” ikẹn; o k'a kwan, kwan ụya; m k'e mẹ ụnụ ihiẹn w'e mẹ elu Ariẹlụ wụ ukpo nchụn-ẹjan.

³ M k'e kehunmẹchanrịn ị; a tụnsọnmẹ m ụlọ ndị-agha ghahunmẹ i, a rụntọnị m'ị mkpọnyin wẹ nọ a lụsọn obodo nwọn mgbọn agha.

⁴ Ị k'a danbanchanrịn imẹ alị, nọ alị e ku; olu i a gha ebe ị rị imẹ alị a han kẹ onyẹ olu gwọ, olu i a gha alị a han kẹ olu ndị-mmọn, a han kẹ olu onyẹ rị a ka ụka.

Kanị Ndị-Iṅẹnrẹn Jerusalẹm K'a La Iwi

⁵ Kanị, ndị-iṅẹnrẹn i ahụn bu ọda k'a la iwi, a nọ wẹ kẹ uzunzun riẹnni; igunrun ndị iwe i hụ ghalẹni e mẹ omikẹn k'a nọ kẹ ẹfịfịa w'a fụpụ: Idẹnmizi, njube-ẹnya ohu,

⁶ Osolobuẹ ihiẹn ile rị okpuru ẹ k'e mẹ wẹ ihiẹn, zihẹni wẹ akpara, alị-ọmahihie lẹ okẹn ụzụn, zihẹni wẹ eje-ufere lẹ ẹbi lẹ ọkụn rị a dụnnị.

⁷ O jẹnkọ d'a rị kẹ ihiẹn mẹ imẹ nrọ, ọhụn wẹ hụn imẹ uhinhin, ogẹn igunrun hụ gha alị ile bịa e gi bịa, igunrun hụ rị a lụsọn Ariẹlụ wụ Jerusalẹm ọgụn — hụn rị a maye ya lẹ ebẹhụ ndị rịn'a a gbaban, igunrun hụn rị e kehunmẹ Ariẹlụ;

⁸ o k'a nọkẹ ebe onyẹ ẹgụn rị a gụn nọ rọhụn ebe ọ rị e ri ihiẹn-oriri, kanị o tẹnhin ẹgụn hụkwọ a gụn a; lekẹ ebe onyẹ ẹgụn-mirin rị a gụn nọ rọhụn ebe ọ rị a ra mirin, kanị o tẹnhin, echẹn kẹ ndụn gụkwọ a, ẹgụn-mirin nwẹn hụkwọ a. Ẹrịra k'o jẹnkọ d'a rịnị igunrun hụ gha alị ile bịa d'a lụsọn Ugu Zayọnụ agha.

Ndị Nke Osolobuẹ Ara Leghazị Ụzọ

⁹ Ya tụ ụnụ ẹnya, gbagbu ụnụ ngharị ẹnya; tikpọdẹ ni enwẹn ọnụ ẹnya, nị ọnụ leghabehi ụzọ; Nọ nị kẹ ndị manya — bụ manya arị a tụ ụnụ; hanfiemẹ ni ụkụ, bụ ụnụ aranị manya!

¹⁰ Osolobuẹ a tụgụọ ụnụ okẹn-ụran; o kpumẹgụọ ụnụ ẹnya — ụnụ ndị-amụma, kpumẹ ụnụ isi — ụnụ ndị a hụn ụzọ.

¹¹ Ẹnya ụnụ, ọhụnnị ile wụhụ oku wẹ deye imẹ ẹkụkwọ, fụma, nyankin. Wẹ we ẹ ye onyẹ ma gụn ẹhụhụọ, sị a, “Gụn ihiẹnni, dodo,” ọ sị, “Asakọ m ẹka gụn a, wẹ nyankin ẹ anyankin ma!”

¹² Wẹ we ẹ ye onyẹ malẹni gụn, sị a, “Gụn ihiẹnni, dodo,” ọ sị, “Ama m gụn.”

¹³ Ya haịn Onyẹ-nwọnni-ẹnyi gi sị, “Ọnụ kẹ ndịnị gihụ a nọkunmẹ m, e gihụ ọnụnụ-ire a gbaye m, kanị obi wẹ e tekẹ ebe m rị. Iwu ịhịan kuzi wẹ kẹ wẹ gihụ e fe m ofufe.”

¹⁴ M jẹnkọ d'e mẹzi ndịnị ihiẹn k'a tụ wẹ ẹnya, mẹsọnmẹ wẹ ihiẹn a tụ ẹnya — amamihiẹn ndị marịn ihiẹn a la iwi, nghọta ndị a ghọtanị a la.

¹⁵ Nsọngbu rị e che ndị a lịlịma wẹ nị wẹ zuemẹni Osolobuẹ ẹfọ, ndị hụn a nọ imẹ ishi e mẹ ihiẹn wẹ rị e mẹ, a sị, “Onyẹ k'a hụn ẹnyi? Onyẹ nwọn marịn?”

¹⁶ Ụnụ e bu ihiẹn isi a kpọma alị — lekẹsị ọkpụ-ite lẹ ụrụa han! Ihiẹn wẹ mẹmẹ a sịdẹ nwan onyẹ mẹmẹn'ẹ, “Ẹlẹkwọ yụ mẹmẹ m”? Ite a sịdẹ nwan onyẹ kpụn'a, “Onwọnni ihiẹn ị marịn”?

¹⁷ O biekọdẹ nwan ẹgboko Lẹbanọnụ e họnrin alị w'a rụn ugbo, alị wẹ a rụn ugbo a nọ kẹ ẹgboko?

¹⁸ O ru ogẹn ahụn, ndị odin jẹnkọ d'a nụ ihiẹn wẹ rị a gụnnị wẹ imẹ ẹkụkwọ; ndị ẹnya-mpịn rị imẹ ụya lẹ ẹkpa-ishi e leghama ụzọ.

¹⁹ Ndị welụa enwẹn wẹ alị k'a ghọghọmazị makẹ Osolobuẹ; ndị ogbẹnnyẹ a ghọghọma ọda-ọda makẹ Onyẹ-nsọ Izrẹlụ.

²⁰ Ndị ẹfọ jọ arịkọzị a, ndị a mụ ịhịan ẹmụ arịkọzị a; wẹ k'e gbupụ ndị ile ẹnya wẹ rị eje-ihiẹn —

²¹ ndị hụn e buokin ịhịan ọnụ, ndị a chọ isi onyẹ a han ezigbo-eṅẹn ọgwa, ndị hụn a hangbu onyẹ ẹka a rị ọchan eṅẹn.

²² Ufiri ẹ kẹ Osolobuẹ, hụn gbapụha Ebraham, gi nwan rị a sị ikpụlọ Jekọpụ, “Ifẹnrẹn emẹkọzị ebọn Jekọpụ; ekpumẹkọ wẹ ihun yeni ifẹnrẹn.

²³ Wẹ hụn ụmụ wẹ hụn k'a rị imẹ igunrun wẹ, ụmụ hụn ẹka m jẹnkọ d'e ye wẹ, e dọnmẹ wẹ ẹfan m nsọ, e ku w'ẹ nị Onyẹ-nsọ ebọn Jekọpụ rị nsọ nke-esi, a tụma wẹ egun Chuku Izrẹlụ.

²⁴ Ndị e bi mpụ k'e nwọn nghọta, ndị e dẹnnwịnwịnnị a nụma ihiẹn wẹ rị a gwa wẹ.”