Azaya 28 - Ika

Isi Nke Ẹsatọ Kwasị Ọgụn Ihiẹn Chuku K'e Mẹ Sameria Lẹ Ndị-isi Rịn'a

¹ Nsọngbu rị e che obodo hụ wụ Sameria, ihiẹn-mma ahụn ndị manya rị a kị Ifrem gi a họnrọn — obobo hụ fapụkọnị, hụn wụ okẹn-mma alị Ifrem — isi-alị a ahụn rị isi ọdanmgbugbu hụn alị a rịgbu enwẹn ẹ mma; nsọngbu rị e che obodo ahụn — hụn wụ ọghọ ndịnị manya budangụ.

² Lee ẹ, Di-nwọnni-ẹnyi zila dikẹn hụn ze ọda-ọda, dikẹn hụn k'a maye obodo hụ — nọkẹ ẹkwan-igwere lẹ eje-ufere e tikpọ ihiẹn, lekẹ okẹn-mirin rị e zueni, e hu ikẹn-ikẹn; o zila dikẹn hụn k'e gi ikẹn ma obodo hụ ye alị.

³ Wẹ k'a zọkpụkpọ obodo ahụn, ihiẹn-mma ahụn ndị-manya rị a kị Ifrem gi a họnrọn;

⁴ obobo hụ fapụkọnị, hụn wụ okẹn-mma alị Ifrem — isi-alị a ahụn, hụn rị isi ọdanmgbugbu alị a rịgbu enwẹn ẹ mma, o jẹnkọ d'a rịhụ kẹ mkpụrụ figi ibuzọ pụhanị, hụn w'a hụn, a ghọrị w'a hụ ripụ.

⁵ Ogẹn hụ, Osolobuẹ ihiẹn ile rị okpuru ẹ jẹnkọ d'a wụ okpu-eze nwọn ọghọ — ihiẹn-mma hụn wẹ gi tu ndị nke ẹ k'a họdụnị ugọn.

⁶ O k'a wụrụ mmọn wẹ gi a han ezigbo-eṅẹn jẹnni onyẹ e dọnzi oku, wụrụ ikẹn ndị agha hụn a nọ ọnụ-mgbọn e gbọndọn agha.

⁷ Ndịnị hụzị a hanfie ụkụ yeni manya, wẹ hụzị a kpọgburusọnmẹ yeni manya: kẹ ndị nchụn-ẹjan kẹ ndị-amụma hụzị a hanfie ụkụ yeni manya; manya ara nịzị wẹ marịn ihiẹn wẹ rị e mẹ; wẹ hụ e ruehunmẹ — a hụnfie ọhụn, a hanfie eṅẹn.

⁸ Teburu wẹ ile wụ ẹgbọ-ẹgbọ, onwọnni ebe ẹgbọ rịlẹni.

⁹ E sị wẹ, “Onyẹ k'ọ rịdẹ nwan a chọ n'ọ kuzi? Onyẹ k'ọ rị a kọwanị ozi ọ rị e zi? Ụmụ-ẹka wẹ hadẹ ẹran tannị ra ụmụ-ndu wẹ napụhụ ẹran nke ọhụn?!

¹⁰ O ku o kudọnzi, o ku o kudọnzi; a kọwa, a kọwadọnzi — ẹkẹrẹ ebeni, ẹkẹrẹ ebahụn.”

¹¹ Ọ hụ nwan mma, asụsụ alị ọzọ lẹ asụsụ wẹ ghalẹni a ghọta kẹ Chuku jẹnkọ nwan d'e gi gwa ndịnị oku —

¹² ndị nwẹn o te kuyeni, sị, “Ebeni wụ ebe izu-ikẹn, ndị ndụn gụ wẹ zu ikẹn”, “Ebeni kẹ ndụn a nọ ban ụnụ” — kanị egọnni wẹ ntịn.

¹³ Wẹ k'a gwama wẹ oku Osolobuẹ ẹnịna: e ku e kudọnzi, e ku e kudọnzi, a kọwa, a kọwadọnzi — ẹkẹrẹ ebeni, ẹkẹrẹ ebahụn — kẹni wẹ danshi azụụn, rụ ẹhụ, dan ọnyan, a nwụnrụn wẹ wẹ.

¹⁴ Nụ nị nwan oku Osolobuẹ, ụnụ ndị-nlelịa hụn rị a kị ndịnị rị Jerusalẹm:

¹⁵ Ụnụ hụn a nyan isi, a sị, “Ẹnyi lẹ ọnwụn e kwerigbamagụọ n'o gbukọ ẹnyi, ẹnyi lẹ alị-mmọn e kwerigbamagụọ n'o nwọnni ihiẹn o k'e mẹ ẹnyi. Ogẹn okẹn nsọngbu hụ k'e gi bịa, o rukọ ẹnyi ẹhụ, makẹni ẹnyi a gbaburugụọ ntụ, makẹni ẹnyi a warịgụọ imẹ ihiẹn wụlẹni ezigbo ẹ.”

¹⁶ Osolobuẹ hụn nwọn ikẹn ile sị nwan, “Lee ni ẹnya, m rị e butọ ọmụma imẹ Zayọnụ, ọmụma wẹ lelegụ ọhụnma; ọmụma rị mkpa hụn wụ iyetọ; uhue ehuekọ onyẹ gi ẹ dọn ẹnya.

¹⁷ Ezigbo eṅẹn kẹ m k'a chọ ẹka ụnụ, ezi-omumẹ kẹ m k'a jụ ụnụ ukwere ẹ; ẹkwan-igwere k'e tikpọpụ ntụ hụ ụnụ gbaburu, mirin k'e huru ebahụn ụnụ warị.

¹⁸ Hụn ụnụ lẹ ọnwụn kwerigbama n'o gbukọ ụnụ arụnkọzị; ihiẹn nwẹn ụnụ lẹ alị-mmọn kwerigbama abụnkọzị. Okẹn nsọngbu hụ lalanị bịa, o jẹnkọ d'e ri ụnụ isi.

¹⁹ K'ọ bịahanlẹ k'o k'a gha e bupụ ụnụ — ụtụntụn lẹ efinaị lẹ uhinhin, ụhụọhịn ile.” Ozini k'e wẹhẹni ndị nke ụnụ okẹn egun, ogẹn w'e gi ghọta a.

²⁰ Elu-ukpo ụnụ dinẹ erukọ ụnụ tịnpụ ẹhụ; ẹkwa ezukọ ụnụ fụrụ oyi.

²¹ Osolobuẹ k'e lihi k'o dọn lihi elu Ugu Pẹrazim, lihi k'o dọn mẹ imẹ Ọdanmgbugbu Gibiọnụ, d'e mẹ ahụnlele ọ chọ n'o mẹ, ihiẹn ahụn wẹ ghalẹni e mẹ hụn ọ chọ n'o mẹ.

²² Kụsị nị nwan nlelịa ụnụ ahụn, amamgbe ẹgan ụnụ e kẹnrẹnkẹnmẹ; makẹni Di-nwọnni-ẹnyi, Osolobuẹ ihiẹn ile rị okpuru ẹ, a gwagụọ m n'o k'e tikpọ alịnị ile, tikpọ a ru alị.

²³ Gọn ni ntịn nị ụnụ nụ olu m; wẹhẹ ni ntịn nị ụnụ nụ ihiẹn m rị e ku.

²⁴ Onyẹ-ugbo gha a dụkpọ alị o k'a kụnye ihiẹn, n'ọ tọ a dụkpọ ọdụkpọ-ọdụkpọ sụọ? N'ọ tọ a kụkpọ ẹjan, a dụriẹn ẹ?

²⁵ O dọnmẹgụ alị ugbo ọhụnma, ẹlẹ ọ kụnma ihiẹn? Ọ kụn ogirigbọn azụụnnị, ọ ghaye osẹn azụụnnị; ọ kụnye ọka-witi ebe furun'ẹ, ọ kụnye ọka-bali ọnọdị a, ọ kụnyezi ọka-spẹtị ọnọdị nke ẹ — ẹlẹ ya?

²⁶ Chuku ken'ẹ hụ a gwa a ihiẹn o k'e mẹ, a kuzi ẹ k'o furu n'o mẹ ẹ.

²⁷ W'a ra gi ẹgbe wẹ gi a kụkpọ ọka-witi ti ogirigbọn mọbụ gi ụgbọ-anyịnyan pịn osẹn; mkpịnsịn mẹ mgbara kẹ wẹ gi a fịan ogirigbọn; onyẹ e gi ukpokpo a fịan osẹn?

²⁸ Wẹ k'e gwerịrị mkpụrụ ọka wẹ kebe gi ẹ mẹmẹ brẹdi — ya wụ, w'ara tọ a kụkpọ ọka jẹnrin ejẹn. Ọsụọn'a nị wẹ gi ụgbọ-ẹshin a kụkpọ ọka, ẹlẹ ogugwe kẹ ẹshin hụ e gwe ẹ.

²⁹ Ọnwan wụzịkwọ ẹka-ọrụn Osolobuẹ ihiẹn ile rị okpuru ẹ; Okẹn onyẹ ndụnmọdụn k'ọ wụ, hụn marịn ihiẹn ọda-ọda!