Azaya 27 - Ika

Isi Nke Ẹsa Kwasị Ọgụn Osolobuẹ K'a Zụọpụha Izrẹlụ

¹ O ru ụhụọhịn ahụn, Osolobuẹ k'e gi okẹn ọpịa a hụn a tụ egun ye Lẹvịatanị afụnfụn, Lẹvịatanị, eje-agwọ ahụn a gba okẹn-ọsọ, Lẹvịatanị ahụn a fịkọsọnmẹni; Osolobuẹ k'e gbu eje-anụ ohimin hụ.

² O ru ogẹn ahụn — “Bụ nị ẹbụ banyeni alị vaịnị hụ a mị mkpụrụ:

³ Mmẹ wụ Osolobuẹ wụ onyẹ e lepụ a ẹnya; m'a gba a mirin ogẹn ile. M'e che ẹ nche uhinhin lẹ efinaị amamgbe w'e mẹ ẹ ihiẹn ọwụlẹ.

⁴ Iwe arịzị e we m. Kanị, omẹni o puni m ogun-lẹ-ọkịnkan, a lụsọn m'a agha, e bi m ọkụn ye ẹ.

⁵ Omẹni achọnị wẹ nsọngbu, wẹ bịakwọ d'e gbọnni m; wẹ bịa d'a rịọ m; wẹ bịakwọ d'a rịọ m.”

⁶ O ru ihun, ebọn Jekọpụ jẹnkọ d'a gba mkpọgụn; Izrẹlụ jẹnkọ d'a kpụkpụma, mị obobo, mị mkpụrụ jun ụwa ile.

⁷ Osolobuẹ e tighọdẹ nwan Izrẹlụ ihiẹn k'o dọn ti ndị hụn ti Izrẹlụ ihiẹn ra? Ra o gbughọ a ozun k'o dọn gbu ndị hụn gbun'ẹ?

⁸ Y'e gigụọ agha lẹ ọchụpụ ị chụpụ a ye ẹ afụnfụn; y'a fụgụọ wẹ okẹn ufere i fụpụ wẹ, kẹ ufere ẹbamịn ọwụwa-ẹnyanwụn e mẹ.

⁹ Ọnwan kẹ Osolobuẹ k'e gi wepụ ikpe ma ebọn Jekọpụ. Ọnwan k'o gi ghọsịchanrịn n'o wepụgụọ njọ a: o k'e tikpọchanrịn ukpo ọmụma wẹ nọ a kwa ese, gweriẹn ọmụma rịn'a lekẹ nzụn mmaka. Ahụnkọzị wẹ osisi wẹ zumẹni mmọn Ashẹra mọbụ ukpo nsẹnsi.

¹⁰ E mẹrigụọ wẹ obodo nwẹn wẹ te tụnhunmẹ mgbọn, mẹ ẹ gba okpokoro; o họnringụọ ebe wẹ gbatọ, ebe wẹ latọ nọkẹ atụ; mmụ-efin k'a rị ebẹhụ, a kpa nni, e dinẹsọnmẹ ebẹhụ, e ripụ ẹhụhụọ rịsọnmẹ agalaba osisi ebẹhụ.

¹¹ Osisi ndị ahụn kpọpụ nkụn, kpagiri, ikpoho e gi wẹ fiye ọkụn. Makẹni ndịnị enwọn nghọta — ya haịn Onyẹ keni wẹ gilẹni e mẹni wẹ omikẹn, Onyẹ keni wẹ ara mẹni wẹ ọhụnma.

¹² O ru ogẹn hụ, Osolobuẹ k'a kụkpọchanrịn alị-eze ile rị gha Iyi Yufretisi d'e ru Iyi udu-mirin rị ebe Ijiptu ru; o k'a kụkpọ wẹ kẹ w'a kụkpọ ọka, tụtụrụ ụnụ ndị Izrẹlụ ohu-ohu rịkẹ akpụrụ-ọka.

¹³ O ru ogẹn ahụn, okẹn opi k'a han, ndị Izrẹlụ ile hụn rị alị Asiria a la iwi lẹ ndị ile wẹ kpụnshi alị Ijiptu k'a lụa d'a nọ elu ugu nsọ hụ rị Jerusalẹm fe Osolobuẹ.