Azaya 26 - Ika

Isi Nke Isin Kwasị Ọgụn Osolobuẹ K'e Mẹrini Ndị Nke Ẹ, Dọnzi Ihiẹn

¹ Ogẹn ahụn, wẹ k'a bụ ẹbụnị imẹ Juda: Ẹnyi e nwọnghọ obodo zeni; Chuku e gigụọ nzụọpụha mẹmẹ mgbọn ẹ lẹ ebe w'a gbaban rịn'a.

² Gụnpụ ọnụ-mgbọn nị ndị alị ezi-omumẹni banye, alị hụn kwọnkẹnmẹ okukwe.

³ Udọn zu oke kẹ y'e ye onyẹ hụn kwọnkẹnmẹ okukwe, makẹni o gi i dọn ẹnya.

⁴ Gi ni Osolobuẹ dọn ẹnya jẹnrin ejẹn, makẹni o mẹ nke Osolobuẹ, Osolobuẹ wụ Ọmụma Itẹbitẹ.

⁵ O wetu ndị nọdị ebe jẹn elu alị, o bu obodo nwọn okẹn-ọghọ a gbama alị, ọ kụkpọchanrịn a ru alị; ọ tụ a ye imẹ ẹjan.

⁶ Ịhịan a zọkpụkpọ a — ndị nwẹn wẹ te rị a bịangbu a zọkpụkpọ a, ndị igbẹnnyẹ a zọ a ụkụ.

⁷ Ụzọ onyẹ ezi-omumẹ e riẹn eriẹn; Euu Onyẹ Hụn Kụrụ Ọtọ, y'e mẹ ụzọ e riẹnni onyẹ ezi-omumẹ.

⁸ Ẹghẹẹ, Osolobuẹ, eṅẹn i kẹ ẹnyi marịn; ẹnyi rị e che i; ẹfan ị lẹ ọghọ ị kẹ ẹnyi chọkọ.

⁹ Uhinhin, m'a chọ ị ọda-ọda; o ru ụtụntụn, obi m ile hụzị a chọ ị — makẹni i yeọlẹ ụwa afụnfụn, ndị rị elu-ụwa e gi ẹ marịn ihiẹn ezi-omumẹ wụ.

¹⁰ Ọsụọn'a wẹ mẹni ndị eje-omumẹ ọhụnma, w'a ra gi ẹ mụrụn ezi-omumẹ — kẹ imẹ alị ezi-omumẹ, w'e mẹsọnmẹzikwọ eje-ihiẹn, arị wẹ e legha ọghọ Osolobuẹ ọsụọn'a nị ọ pụhachanrịn ifọn imẹ igunrun wẹ.

¹¹ Osolobuẹ, y'e weshigụọ ẹka elu n'i mẹ wẹ ihiẹn, kanị w'a ra hụnd'a. Nị wẹ hụn a nwan nị y'a ra gi ndị nke i gu egun, kẹni ifẹnrẹn mẹgbu wẹ; ọkụn hụn i kwademẹni ndị-iṅẹnrẹn i ya bu wẹ ri.

¹² Osolobuẹ, y'e yegụọ ẹnyi udọn; ihiẹn ile ẹnyi rụn, ịyụ rụnnị ẹnyi ya.

¹³ Euu Osolobuẹ wụ Chuku ẹnyi, ndị ọzọ a kịzịghọ ẹnyi, kanị ẹfan ịyụ sụọ kẹ ẹnyi e ye ọghọ.

¹⁴ A nwụnhụngụọ wẹ nwan, arịzị wẹ ndụn; mmọn wẹ lagụnị ekinhẹnkọ. Ịyụ ye wẹ afụnfụn, tikpọ wẹ; y'e finchanpụchanrịn ihiẹn ile w'e gi nyanhan wẹ.

¹⁵ Euu Osolobuẹ, y'e mẹgụọ alị Juda ba ụba — y'e weshịagụọ alịnị. Y'e gigụọ a nwọnrin ọghọ — y'e wezụkagụọ okẹn ẹ ile.

¹⁶ Osolobuẹ, wẹ buruhẹ i kẹ wẹ rị imẹ nsọngbu — nsọngbu hụn i gi rị a dọ wẹ ẹka-ntịn, wẹ hụ e ku ẹkẹrẹ-ẹkẹrẹ, e mẹ ekpere.

¹⁷ Kẹ okpoho imẹ rị e mẹ dọn a kwan, a fịkọ, makẹni ọ rị a tụrụ a, ẹrịra kẹ ẹnyi te nọ ebe ị rị, Osolobuẹ.

¹⁸ Imẹ e te mẹghọ ẹnyi, ẹnyi a fịkọ, kanị ufere mmaka kẹ ẹnyi mụ. Ẹnyi ewẹhẹnini alị nzụọpụha, ẹnyi amụpụhanịnị alị ịhịan.

¹⁹ Kanị, ndị nke i nwụnnị jẹnkọ d'a rịzị ndụn; ozun wẹ k'e lihi. Ụnụ ndị rị nwan imẹ alị, tẹnhin ni yimẹ oro ịghọghọ! Igirigi lalanịnị ụnụ rị kẹ igirigi ụtụntụn, alị k'e gi ẹ mụpụha ndị nwụnnị rịn'a.

²⁰ Ndị nke m, jẹnmẹ ni; d'a banye ni mmughẹ ụnụ, ụnụ a gụnma enwẹn ụnụ ye; warị nị ẹkẹrẹ — d'e ru mgbe ọnụma Osolobuẹ rọgụ.

²¹ Lee n'ẹ, Osolobuẹ gha ebe-obibi ẹ pụla d'e ye ndị rị elu-ụwa afụnfụn njọ wẹ. Alị jẹnkọ d'a ghọsị ẹdeke ndị wẹ gbu elu ẹ — o kpumẹkọzị ndị wẹ gbu elu ẹ.