Azaya 25 - Ika

Isi Nke Isẹn Kwasị Ọgụn Ịja-mma Ya Rịnị Osolobuẹ O Gi Zụọpụha Ẹnyi

¹ Euu Osolobuẹ, ịyụ wụ Chuku m; m k'e ye i ọghọ, ja ẹfan ị mma, makẹni y'e mẹgụọ kẹ onyẹ wẹ gi e dọn ẹnya, mẹ okẹn-ihiẹn ichẹn-ichẹn a tụ ẹnya, ihiẹn ndị hụn ị rotọ mbụ-mbụ.

² Y'e mẹgụọ obodo họnrin mkpọkọ-mkpọkọ, mẹ obodo wẹ tụnhunmẹ mgbọn zeni wụrụ ihiẹn wẹ tikpọ la iwi; okẹn obodo nwẹn ndị alị ọzọ gi e dọn ẹnya arịzị a; atụndọnzikọ w'a.

³ Alị ichẹn-ichẹn zeni jẹnkọ nwan d'e ye i ọghọ; obodo ndị alị ichẹn-ichẹn w'a tụdẹ egun wẹ k'a tụ egun i.

⁴ Ịyụ wụ ebe ndị igbẹnnyẹ a gbaban, ebe onyẹ mkpa gi a gbaban ogẹn nsọngbu ẹ, y'e kpumẹ ịhịan ebe okẹn ẹbi rị a kpọ, ị wụzị igungun ogẹn anwụn rị ma. Makẹni ihiẹn ndị ẹfọ-njọ rị e mẹ ịhịan nọ kẹ okẹn ẹbi rị a kpọ ẹhụ-ụlọ,

⁵ ọ nọ kẹ ihiẹn okẹn anwụn e mẹ alị ọkpọ-nkụn. Ịyụ mẹri alị ndị ọzọ rị ichẹn-ichẹn rị a zụn ụzụn, kẹ orukpu-igwere dọn a rọ anwụn, ndị ẹfọ-njọ a bụbehi ẹbụ mmẹri.

⁶ Osolobuẹ hụn nwọn ikẹn ile k'a nọ elu uguni kwademẹni ndị alị ile oriri, okẹn-oriri manya e nwunye ẹnya — ezigbo anụ lẹ ezigbo manya.

⁷ O k'a nọ elu uguni tikpọ ihiẹn ahụn kpumẹ ndị alị ile rị ichẹn-ichẹn, ihiẹn hụ fụkpumẹ ndị alị ile rị ichẹn-ichẹn nọkẹ ẹkwa;

⁸ o k'e luepụ ọnwụn, ọnwụn arịkọzị. Osolobuẹ ihiẹn ile rị okpuru ẹ jẹnkọ d'e finchanpụ ịhịan ile ẹnya-mirin; o k'e wepụ ndị nke ẹ ifẹnrẹn ẹnya elu-ụwa ile. Ya kẹ Osolobuẹ ku.

⁹ Ogẹn ahụn, wẹ k'a gha a sị, “Ezioku-ezioku, ọnwan wụ Chuku ẹnyi; ịya kẹ ẹnyi gi dọn ẹnya, ọ nọ zụọpụha ẹnyi. Ọnwan wụ Osolobuẹ, ẹnyi gi ẹ dọn ẹnya; nị ẹnyi gi ọzụọpụha ọ zụọpụha ẹnyi ghọghọ, e nwọn anwịnrịn.”

¹⁰ Osolobuẹ jẹnkọ d'e gi ẹka rị mma sọn uguni wụ Zayọnụ-Jerusalẹm; kanị o sikọ d'a zọgbu alị Mụabụ, kẹ w'a zọkpụkpọ ẹfịfịa ọkpọ-nkụn imẹ ẹjan w'a kụnye ihiẹn.

¹¹ Wẹ jẹnkọ d'a shịapụ ẹka wẹ ebẹhụ wẹ rị — kẹ ịhịan a shịapụ ẹka e gu mirin. Kanị, kẹ w'a nwanlẹ, Chuku k'e budan wẹ lẹ mpache wẹ.

¹² O jẹnkọ d'e wetuchanrịn okẹn mgbọn ụnụ ndị hụ zeni, o we wẹ gbama alị; wẹ k'e wetu wẹ ru alị — ruchanrịndẹ imẹ uzunzun lẹ enwẹn ẹ.