Azaya 23 - Ika

Isi Nke Ẹtọ Kwasị Ọgụn Ihiẹn Chuku K'e Mẹ Taya Rị Mkpẹnrẹn Ohimin

¹ Ọnwan kẹ Chuku ku banyeni Taya: Okẹn ụgbọ-mirin ohimin, kwanma nị — ni e tikpọ wẹ alị mkpẹnrẹn-ohimin wụ Taya, kẹ ụnọ ịhịan kẹ ebe ụgbọ-mirin a nọdị arịzị a. Alị Saịprọsụ rị ohimin kẹ wẹ gha nụ ozi ẹ.

² Kpumẹ ni nwan ọnụ, ụnụ ile bi alị mkpẹnrẹn-ohimin hụ hụn wụ ndị ịdanfịn tannị makẹni ndị-afịa alị Sidọnụ e fetu ohimin.

³ Wẹ te e fetuzi okẹn-mirin ohimin e buhẹni Taya ọka alị Shihọ, lẹ ihiẹn Iyi Naịlị mịpụha, ịyụ te wụ ebe ndị alị ichẹn-ichẹn a zụjẹn afịa.

⁴ Ifẹnrẹn ya mẹgbu i, alị Sidọnụ lẹ alị nwẹn zegbu enwẹn ẹ rị Ohimin Mẹditerenia, makẹni Ohimin sị ọ marịn ị — ọ sị, “Imẹ emẹtuni m, amụtuni m nwa; azụntuni m ụmụ — kẹ ikẹnnyẹ kẹ ikpoho!”

⁵ Ozi ru Ijiptu, ihiẹnni mẹ alị Taya k'a fụ wẹ ọda-ọda.

⁶ Kwarịkwọ nị nwan shi Tashishi; kwanmanị ụya, ụnụ ndị bi alị mkpẹnrẹn ohimin hụ.

⁷ Ẹlẹ obodo ụnụ nwẹn ẹhụ nọ a tụ ịhịan ile wụ ọnwan? Obodo nwẹn wẹ pumẹ ẹdẹi, hụn ụkụ a rugụ alị ichẹn-ichẹn teni d'e werisọnmẹ ọnọdị?

⁸ Onyẹ rotọnị Taya eje-ihiẹnni? Taya hụn te e tumẹni ndị ọzọ ndị-nze, hụn ndị afịa wẹ wụ okẹn-ịhịan okẹn-ịhịan, hụn wẹ a nụ ẹfan ndị-afịa a elu ụwa ile?

⁹ Osolobuẹ nwọn ikẹn ile rotọn'a ihiẹnni, kẹni o welụa ọghọ ile ịhịan gi e bọnmẹ alị, budanzịkwọ ndị ile w'a nụ ẹfan wẹ elu ụwa.

¹⁰ Rụngbarị nị nwan alị ụnụ ugbo, ụnụ ndị Tashishi, kẹ mirin Iyi Naịlị dọn e ruchanrịn alị ọ rị; mgbọndọn arịzị.

¹¹ Osolobuẹ e bugụọ ẹka zinmẹ ohimin, e mẹhunmẹ alị-eze ndị rịn'a. Ọ sịgụọ wẹ mẹ Finishịa ihiẹn, wẹ tikpọpụ ebe ile rịn'a wẹ gisọnmẹ e dọn ẹnya.

¹² Ọ sị, “Ẹhụ atụkọzị ị nwan, nwagbọọ wụ alị Sidọnụ, hụn wẹ rị nwan a bịangbu! Lihi, n'i fetu shi Saịprọsụ — kanị ẹhụ efukọzịkwọ ị ebahụn.”

¹³ Lee kẹ alị ndị Kal'di wụ Babilọnụ nọ nwan, ndị hụ nwọnzilẹni nwan ebe wẹ rị! Ndị Asiria e gigụọ alị hụ họnrin ebe anụ-ọfịa ichẹn-ichẹn e bi; ndị Asiria rụnhụ mkpọnyin wẹ gi a lụsọn obodo nwọn mgbọn agha, nọ a gba ebe ile Babilọnụ gi dọn ẹnya okpokoro, mẹ alị hụ họnrin mkpọkọ-mkpọkọ!

¹⁴ Okẹn ụgbọ-mirin ohimin, kwanma nị ụya — nị Taya ụnụ gi dọn ẹnya a gbagụọ okpokoro!

¹⁵ O ru ogẹn hụ, anyanhankọzị wẹ alị Taya — ọrọgbọ ahụa iri kwasị ọgụn-ẹtọ hụn eze a tọhan. Kanị ahụa iri kwasị ọgụn-ẹtọ hụ ghagụ, ihiẹn wẹ gi bụ ẹbụ ịgbaraja k'e mẹ Taya:

¹⁶ “Ịyụ wụ ịgbaraja wẹ te zọ, lihi nwan, weri ụbọ, n'i jẹnhunmẹ obodoni! Kpọ ụbọ hụ ọhụnma, bụ ẹbụ bu ọda — kẹni wẹ nyanhan ị.”

¹⁷ Ahụa iri kwasị ọgụn ẹtọ hụ ghagụ, Osolobuẹ jẹnkọ d'e weli Taya. O k'a rụnmazị ọrụn ịgbaraja, ya lẹ anị-eze ile rị elu-ụwa a zụmazị afịa.

¹⁸ Kanị, erere-afịa a lẹ ụgwọ-ọrụn a ile k'a wụrụ ihiẹn wẹ gi kwachanrịnnị Osolobuẹ; edọnmẹkọ w'a — kama o k'a wụrụ nke ndị e bi ihun Osolobuẹ, e gi wẹ ẹ e rijun ẹfọ, e yi ẹkwa rị mma.