Azaya 22 - Ika

Isi Nke Ẹbụọ Kwasị Ọgụn Ihiẹn Chuku Ku N'o K'e Mẹ Jerusalẹm

¹ Lee ihiẹn Chuku ku banyeni Jerusalẹm, Ọdanmgbugbu Ozi-Osolobuẹ. Kị wụ nwan nsọngbu ụnụ, hụn ụnụ ile gi nwan shi elu ụlọ.

² Euu, obodo isusu jun! Euu, obodo uku ẹhụ-ọtụtụ lẹ eje-nkpọtụ jun? Egini wẹ ọpịa-agha gbu ndị nke ọnụ wẹ gbu, ẹlẹzikwọ agha gbu wẹ.

³ Ndị-ndu ụnụ a gbapụgụọ, wẹ gini d'a gbadẹ ụta, a nwụngụọ wẹ wẹ. A nwụnzịkwọ wẹ ndị nke ụnụ ile gbapụnị ebe-lẹ-ebe wẹ gbajẹn.

⁴ Ya haịn m gi a sị, “Pụ nị nị m; nị m kwan, kwangbu enwẹn m. Arọkọlẹ ni m obi kaka — nị e tikpọgụọ wẹ ndị nke m.”

⁵ Di-nwọnni-ẹnyi, Osolobuẹ ihiẹn ile rị okpuru ẹ, a kayegụọ ogẹn isusu, ọbịangbu lẹ egun, hụn k'e kunrun Jerusalẹm, Ọdanmgbugbu Ozi-Osolobuẹ — ogẹn wẹ k'a kụtusọnmẹ mgbọn ẹ, ogẹn wẹ k'a gha a kwanghọsị ugu ichẹn-ichẹn.

⁶ Ndị alị Ẹlam bukọ ẹkpa ọbara-ụta, uwẹ kịzị ụgbọ-ẹshin agha lẹ ndị e nyinn'ẹ; ndị alị Kiri nkẹ e bupụha akpaịn.

⁷ Ụgbọ-ẹshin agha e jun ọdanmgbugbu ụnụ ile hụn ma mma: e zigụọ wẹ ndị-agha gi ẹshin d'e weri ọnọdị ọnụ-mgbọn ndị rị obodo ụnụ.

⁸ E wepụchanrịngụọ wẹ ihiẹn ile Juda gi e chedọn enwẹn ẹ. Ụhụọhịn ahụn, ụnụ k'e bu obi tụkwasị ihiẹn-ọgụn ndị rị obi-eze ụnụ, Obi-eze Osisi sida.

⁹ Ụnụ k'e leban ẹnya ebe ile mgbọn Obodo Defidi wụ Zayọnụ nọ tikpọ; ụnụ a gha Ọgọdọ-mirin rị ibe alị dọrị mirin dọnmẹ.

¹⁰ Ụnụ e lekpọsọnmẹ ụlọ ndị rị Jerusalẹm, tọtusọnmẹ ndị ụnụ tọtu, gi rụndọnzichanrịn mgbọn ahụn kẹn'o ze.

¹¹ Ụnụ e gu ọmị ye ẹgbata mgbọn ẹbụbụọ rị Jerusalẹm, dọha mirin rị Ọgọdọ Akan ye imẹ ẹ kẹni ụnụ hụn mirin — kanị ụnụ egikọ Osolobuẹ hụn mẹ ihiẹn gi rị k'ọ rị dọn ẹnya; ẹnya ụnụ eshikọ Onyẹ hụn rotọ ihiẹn rị e mẹ ogẹnni ẹdẹi.

¹² Osolobuẹ, Onyẹ hụn nwọn ikẹn ile, a kpọghọ ọnụ oku ogẹn ahụn, sị ụnụ kwanma ẹkwan, gomẹ, sị ụnụ kọpụ ntutu rị ụnụ isi, yiri ẹkwa-achọ.

¹³ Kanị, ịghọghọ lẹ okẹn mmẹmmẹ kẹ w'a hụn, igburi efin lẹ igburi atụnrụn, iri-anụ lẹ ịra-manya! A sị, “Nị ẹnyi ri, ra — makẹni ekile kẹ ẹnyi jẹnkọ d'a nwụn!”

¹⁴ Di-nwọnni-ẹnyi Osolobuẹ ihiẹn ile rị okpuru ẹ, e kugụọ a ye m ntịn, sị, “D'e ru ụhụọhịn ọnwụn ụnụ, onwọnni ẹjan w'e gi gbagharị ụnụ njọnị!” Ya kẹ Di-nwọnni-ẹnyi Osolobuẹ ihiẹn ile rị okpuru ẹ ku.

Shẹbụna Hụn Gi Ọkwa A A Chọ Nke Ẹ

¹⁵ Lee ihiẹn Di-nwọnni-ẹnyi Osolobuẹ ihiẹn ile rị okpuru ẹ ku, ọ sị, “Jẹn, sị Onyẹ nlepụ-ẹnyanị wụ Shẹbụna hụn e lepụ obi-eze ẹnya:

¹⁶ ‘Elee hụn biri i ebeni? Elee onyẹ nke i kẹ wẹ liye ebeni, i gi a tụnị enwẹn i ili ebeni, e gutọnị enwẹn i ili ebe jẹn elu, a tụpụhanị enwẹn i ili rị mma ị k'a nọdị imẹ ọmụma rị elu-ugu?’

¹⁷ Di-ẹnyi, lee ẹnya: Osolobuẹ e d'e kwọnkwọ ị ẹka ma ị tuhu!

¹⁸ O k'a kụkụmachanrịn ị, ma ị ye alị shịanị. I k'a nwụntọ ebẹhụ, yụ lẹ ụgbọ-ẹshin i ndị hụ magbu enwẹn wẹ mma, ịyụ hụn a fa ikpụlọ di-nwọnn'i!

¹⁹ M k'a napụ ị ọkwa ị; wẹ k'e wepụ ị ọnọdị ị.

²⁰ “O ru ogẹn ahụn, a kpọ m odibo m wụ Ẹliakim nwa Hil'kia.

²¹ M k'e yimẹ ẹ ẹwuru i, kẹnmẹ nfifie-ọkwa ị ye ẹ ukun, we ọkịkị ị ye ẹ. Ọ k'a wụrụ nẹdi ndị rị Jerusalẹm lẹ ikpụlọ Juda.

²² M sikọ d'e we ịsanhan ikpụlọ Defidi che ẹ ẹka, ụzọ ọ kpọpụ, onwọnni onyẹ k'a sa ẹka kpọkin ẹ; hụn ọ kpọkin, onwọnni onyẹ k'a sa ẹka kpọpụ a.

²³ M k'a dụ a ye ẹjan nọkẹ mkpụkpọ, dụ a ye ọhụnma-ọhụnma, ọ wụrụ ọghọ ikpụlọ nẹdi ẹ.

²⁴ Kẹ mkpụkpọ dọn e kwọndọn ihiẹn wẹ kọnye ẹ kẹ o k'a dọn wẹhẹni ikpụlọ nẹdi ẹ ile ọghọ, kẹ ụmụ wẹ kẹ ndị nke wẹ — kẹ ndị nọ kẹ arịa rịkalẹni mkpa imẹ wẹ kẹ mkpu kẹ ẹgbo-mirin.”

²⁵ Osolobuẹ ihiẹn ile rị okpuru ẹ sịzị, “O ru ogẹn hụ, mkpụkpọ hụ wẹ te dụye ọhụnma-ọhụnma jẹnkọ d'e hueri; wẹ k'e bepụ a, ọ dan, ihiẹn ile wẹ kọnye elu ẹ a danpụ. Osolobuẹ e kugụọ a.”