Azaya 2 - Ika

Isi Nke Ẹbụọ Ọghọ Lalanị Jerusalẹm

¹ Ọnwan wụ ihiẹn Azaya nwa Emọzụ hụn banyeni alị Juda lẹ obodo Jerusalẹm isi-alị Juda.

² O ru ihun, ugu Ụlọ-nsọ Osolobuẹ k'a wụrụ ugu kachanrịn ugu ile mkpa; wẹ k'e mẹ ẹ nwọnnahịn òke ile ọghọ, ndị alị ile e rushi ebẹhụ.

³ Alị bu ọda jẹnkọ d'a rị a sị, “Bịa nị, nị ẹnyi shi ni Ugu Osolobuẹ, nị ẹnyi jẹn ni Ụlọ-nsọ Chuku Jekọpụ. O k'a kuzi ẹnyi ụzọ a, nị ẹnyi hụn ụzọ e sọn ụzọ a.” Iwu Osolobuẹ k'a gha Zayọnụ a pụha; oku Osolobuẹ k'a gha Jerusalẹm a pụha.

⁴ O k'a hannị alị lẹ alị eṅẹn, e dọnzini ndị alị bu ọda oku. Wẹ k'e gi ọpịa-agha wẹ mẹmẹrin omumọ wẹ gi a dụkpọ alị, gi obo wẹ mẹmẹrin ọpịa wẹ gi e befọn osisi. Alị alụsọnkọzị ibe ẹ agha, ọzụnzụn ndị-agha arịkọzị.

⁵ Izrẹlụ wụ ikpụlọ Jekọpụ, nị ẹnyi gi ni ukpẹ Osolobuẹ e bi.

Ụhụọhịn Osolobuẹ

⁶ Osolobuẹ, y'a latọgụọ ndị nke i, ndị ikpụnọ Jekọpụ. Ọdịnalị ndị rị ibẹka ọwụwa-ẹnyanwụn kẹ wẹ ile rị nwan e sọn, ẹfa-ẹfa kẹ w'a gba nọkẹ ndị alị Filistia, wẹ lẹ ndị a rụa mmọn hụ a na ẹka.

⁷ Goru lẹ siliva e jun alị wẹ; akụ-lẹ-ụba wẹ enwọn okẹn. Ẹshin e jungụọ alị wẹ; asa wẹ ẹka gụnmarịn ụgbọ-ẹshin wẹ.

⁸ Alị wẹ wụ mmọn-lẹ-iyi mmọn-lẹ-iyi; wẹ hụ a kụnị ọrụn-ẹka wẹ isi alị, e fe ihiẹn ẹka wẹ mẹmẹ,

⁹ ọghọ ịhịan ile hụ e gi ẹ a lachanrịn, e budanchanrịn wẹ ịhịan ile. Osolobuẹ, agbagharịlẹ wẹ!

¹⁰ Ndị ikpụlọ Jekọpụ, gbashikwọ ni ebe ọmụma rị d'a warị; rụbankwọ nị imẹ ọnụ, makẹ egun Osolobuẹ lẹ okẹn ọghọ o gi wụ eze.

¹¹ Wẹ sikọ d'a kwa ndị nhọnrọn nku, welụa ndị mpache alị; Osolobuẹ sụọ kẹ wẹ k'e ye ọghọ ụhụọkịn ahụn.

¹² Osolobuẹ ihiẹn ile rị okpuru ẹ a kayegụọ ụhụọhịn, ụhụọhịn o k'e gi mẹshi ndị mpache ile lẹ ndị ile kpọ enwẹn wẹ ihiẹn ikẹn, ndị ile e bọnmẹni; wẹ jẹnkọ d'e budan wẹ;

¹³ ụhụọhịn o k'e betu okẹn-osisi sida alị Lẹbanọnụ lẹ okẹn osisi-okuu alị Bashanị ile;

¹⁴ kẹ ugu ndị ahụn jẹngbu enwẹn wẹ elu kẹ òke ndị ahụn jẹn elu;

¹⁵ kẹ okẹn ụlọ ile ịhịan a gbaban kẹ mgbọn ile zeni ịhịan gi e dọn ẹnya;

¹⁶ kẹ ụgbọ-mirin uku wẹ gi a zụ afịa kẹ ụgbọ-mirin ile ma mma.

¹⁷ Wẹ sikọ d'a kwa ndị nhọnrọn nku, welụa ndị mpache alị; Osolobuẹ sụọ kẹ wẹ k'e ye ọghọ ụhụọkịn ahụn,

¹⁸ a zapụchanrịn wẹ mmọn-lẹ-iyi ile.

¹⁹ Ịhịan k'a gbaban okporo rịsọnmẹ ọmụma lẹ ọnụ ndị rị alị, makẹ egun Osolobuẹ lẹ ọghọ o gi wụ eze, ụhụọhịn o k'e lihi d'e zinzin ụwa.

²⁰ Ụhụọhịn ahụn, ịhịan k'a matuhu goru lẹ mmọn siliva ndị ahụn wẹ kpụ w'a rụa, tụ wẹ yeni oke lẹ ụsụ.

²¹ Wẹ k'a gbashi imẹ oghe rịsọnmẹ ọmụma lẹ ebe ọmụma nọ sụnpụhasọnmẹ elu-ugu, makẹ egun Osolobuẹ lẹ ọghọ o gi wụ eze, ogẹn hụ o k'e gi lihi d'e zinzin ụwa.

²² Gibehi ni ịhịan e dọn ẹnya, ịhịan hụn wụhụ akpụ uzun ohu rị imi. Kịnị kẹ ịhịan wụdẹ?