Azaya 19 - Ika

Isi Nke Mmitenẹi Ihiẹn Chuku Ku N'o K'e Mẹ Ijiptu

¹ Ọnwan wụ ihiẹn Chuku ku banyeni alị Ijiptu. Lee kẹ Osolobuẹ nyinla orukpu-igwere rị a gba ọsọ, ọ lala Ijiptu! Ẹhụ hụ a ma mmọn ile ndị Ijiptu e fe nni; obi e dẹnhingụọ ndị Ijiptu.

² “M k'e mẹ Ijiptu bunụmanị enwẹn ẹ — mẹ nwẹnẹ lẹ nwẹnẹ lụma ọgụn imẹ ẹ, onyẹ-onyẹ imẹ Ijiptu a lụsọnmẹ ndị bikunman'a ọgụn, obodo ndị rịn'a a lụsọnmẹ ibe wẹ ọgụn; alị-eze ndị rịn'a a lụsọnmẹ ibe wẹ ọgụn.

³ Ndụn k'a gụchanrịn ndị Ijiptu — makẹni m k'e wiwipụ ihiẹn wẹ rotọ; wẹ k'e buru mmọn ndị hụ wẹ kpụ lẹ ndị-mmọn d'a jụ wẹ ihiẹn wẹ k'e mẹ, kẹ ndị a gba ẹfa kẹ ndị wẹ lẹ ndị-mmọn gba e ku.

⁴ M k'e wẹ ndị Ijiptu che ẹka onyẹ ẹfọ jọ kịma; eze e mẹ ẹka-ikẹn ọda-ọda k'a kị wẹ.” Ya kẹ Di-nwọnni-ẹnyi ku — Osolobuẹ ihiẹn ile rị okpuru ẹ.

⁵ Iyi Naịlị k'a tahị, akpak'alị iyi Naịlị jẹnkọ d'a kọrọhị.

⁶ Ote-mirin ile wẹ gu k'e shinkpo; mmụ-iyi ile rị Ijiptu k'a tahị, kọrọhị. Achara lẹ ẹfịfịa mirin k'e shinwụn,

⁷ uwẹ lẹ ihiẹn ndị rị e sue mkpẹnrẹn Iyi Naịlị, ihiẹn ndị rị e sue ebe iyi Naịlị nọ e huye ohimin. Ugbo ile wẹ kụn ihiẹn mkpẹnrẹn Iyi Naịlị k'a kpọchanrịn nkụn, ufere e bupụ wẹ, arịkọzị wẹ.

⁸ Ndị e gbu azụụn k'a gha a sụn udẹn, a kwan ụya; uwẹ ile hụn gi ukpo e gbu azụụn imẹ Iyi Naịlị; ẹhụ k'a rọchanrịn wẹ ile a tụye ọga imẹ mirin.

⁹ Ndụn k'a gụchanrịn ndị gi oruru-flasị a kpa ẹkwa, ndị a kpa ẹkwa linẹni k'a kwan ụya.

¹⁰ Ẹfọ asụọkọ ndị a rụn ọrụn ẹkwa ụsụọ, obi k'e ghehi ndị ile gi ụgwọ-ọrụn e bi.

¹¹ Onwọnni ihiẹn ịhaịmẹ obodo Zụanị alị Ijiptu wụ karị ndị nzuzu; ndị nwẹn marịn ihiẹn imẹ ndị a dụn Fẹro ọdụn rịhụ a dụn a ọdụn nwọnlẹni isi! Kị ụnụ rị a dụnị ẹka obi a sị Fẹro, “M rị ndị ọka-iroro, a mụọlẹ m ihiẹn ndị-nze akan kuzi”?

¹² Ịyụ wụ alị Ijiptu, Elebe kẹ ndị ọka-iroro i rị nwan? Wẹ d'a ghọsị ị nwan; wẹ mẹ i nwan marịn ihiẹn Osolobuẹ ihiẹn ile rị okpuru ẹ rotọ o jẹnkọ d'e mẹ Ijiptu.

¹³ Ịhaịmẹ Zụanị e họnringụọ ndị-nzuzu, ndị-ndu Mẹmfisi wụhụ ndị wẹ dufie; Ndị-isi nwẹn wụ ọmụma ndị Ijiptu gi dọn ẹnya e dufieọlẹ alị Ijiptu.

¹⁴ Osolobuẹ e wegụọ mmọn huye imẹ wẹ, mmọn wẹ gizilẹni a marịn ihiẹn wẹ k'e mẹ; wẹ e mẹ Ijiptu a hanfiesọnmẹ ụkụ imẹ ihiẹn ile o mẹ, kẹ onyẹ-manya a danhunmẹ ebe ọ gbọtọ ẹgbọ.

¹⁵ Onwọnni ihiẹn Ijiptu k'a saẹka mẹ — kẹ isi kẹ ọdụndụn, kẹ iguru kẹ ẹfịfịa ridi.

¹⁶ O ru ogẹn ahụn, ndị Ijiptu jẹnkọ d'a rịchanrịn kẹ ikpoho ndụn rịlẹni; wẹ k'a rị a ma piripiri yeni ẹka Osolobuẹ ihiẹn ile rị okpuru ẹ gi rị e mẹ wẹ ihiẹn.

¹⁷ Egun alị Juda k'a tụgbu alị Ijiptu — wẹ kpọhụ ẹfan Juda, obi a nahịn ndị Ijiptu, makẹ ihiẹn Osolobuẹ ihiẹn ile rị okpuru ẹ rotọ o jẹnkọ d'e mẹ wẹ.

¹⁸ Ogẹn ahụn, obodo isẹn imẹ alị Ijiptu k'a rị a sụ asụsụ Kenaanị hụn Juda rị imẹ ẹ, e kun Osolobuẹ ihiẹn ile rị okpuru ẹ, e fe ẹ. Obodo ohu imẹ wẹ k'a za Obodo Ẹnyanwụn.

¹⁹ O ruzi ogẹn hụ, ukpo wẹ nọ a chụnyeni Osolobuẹ ẹjan k'a rị etintinnaị alị Ijiptu, a rụn wẹ ihiẹn wẹ e gi a nyanhan Osolobuẹ ye ebe alị Ijiptu ru.

²⁰ O k'a wụrụ ahịma lẹ ihiẹn a shịanị Osolobuẹ ihiẹn ile rị okpuru ẹ ẹri imẹ alị Ijiptu; wẹ kwanghọsị Osolobuẹ makẹ ndị rị a bịangbuni wẹ, o zijẹnni wẹ onyẹ-nzụọpụha hụn k'a lụnị wẹ ọgụn, ọ zụọpụha wẹ.

²¹ Ẹrịra kẹ Osolobuẹ k'a dọn mẹ ndị Ijiptu marịn a ọhụnma; ogẹn ahụn ndị Ijiptu k'e kweri nị ịya wụ Osolobuẹ nke-esi. Wẹ k'e gi ẹjan ichẹn-ichẹn lẹ oyiye ọka fe ẹ; wẹ k'a gha e kwe Osolobuẹ nkwa, e mẹzu wẹ.

²² Osolobuẹ k'a tụ Ijiptu eje-emu e gbuni; o k'a tụ wẹ ya, zụọ wẹ — makẹni, ọ tụgụ wẹ ya, wẹ k'e buruhẹ Osolobuẹ, ọ za wẹ, zụọ wẹ.

²³ O ru ogẹn hụ, Ụzọ shịanị k'a rị gha Ijiptu d'e ru Asiria: ndị Asiria k'a rị e jẹn Ijiptu, ndị Ijiptu hụ e jẹn Asiria. Ndị Ijiptu lẹ ndị Asiria k'e fegbama ofufe.

²⁴ Ogẹn ahụn, Izrẹlụ k'e mẹ Ijiptu lẹ Asiria ẹtọ, wẹ ẹtịtọ a wụrụ ngọzi elu-ụwa,

²⁵ makẹni Osolobuẹ nwọn ikẹn ile k'a sị, “Ngọzi ya rịnị Ijiptu hụn wụ ndị nke m, Asiria hụn wụ ẹka-ọrụn m lẹ Izrẹlụ hụn wụ ihiẹn-ẹka m.”