Azaya 17 - Ika

Isi Nke Mmẹsa Ihiẹn Chuku Ku N'o K'e Mẹ Damaskọsụ

¹ Ihiẹnni kẹ Osolobuẹ ku Banyeni Damaskọsụ: Ọ sị, “Lee ẹnya, Damaskọsụ awụkọzị obodo; o k'a wụrụ ikpọn mkpọkọ-ihiẹn mkpọkọ-ihiẹn.

² Ịhịan arịkọzị obodo ndị rị imẹ Arụa; anụ sụọ k'a họdụ imẹ wẹ — anụ ndị ahụn k'e ri, makpuru, onwọnni onyẹ k'e rọn wẹ egun.

³ Obodo uku wẹ tụnhunmẹ mgbọn arịkọzị Ifrem wụ Izrẹlụ Ẹbamịn-ugu; Damaskọsụ alị Aram enwọnkọzị eze. Ndị Aram k'a họdụnị k'a nọhụ kẹ ndị Izrẹlụ Ẹbamịn-ugu họdụnị ọghọ wẹ lagụ.” Ịya kẹ Osolobuẹ ihiẹn ile rị okpuru ẹ ku.

⁴ “O ru ogẹn ahụn, ọghọ ebọn Jekọpụ wụ Izrẹlụ k'a la, o fiechanrịn ẹhụ.

⁵ Ọ gba okpokoro kẹ ugbo ọka wẹ begụ, huepụchanrịn ihiẹn ile rịn'a kpọnpụ, nọkẹ ebe ịhịan nọ ghọkwama ọka wẹ ghọhọdụ ugbo imẹ Ọdanmgbugbu Rẹfa.

⁶ Kanị o nwọnghọ ndị k'a họdụnị, kẹ ogbe olivu dọn a họdụ wẹ fịanrịngụ olivu: akpụrụ ẹbụọ mọbụ ẹtọ mkpọnụnụ osisi, ẹnọ mọbụ isẹn elu agalaba ndị mị ọda-ọda.” Ịya kẹ Osolobuẹ wụ Chuku Izrẹlụ ku.

⁷ Ogẹn hụ, ịhịan e lemẹ nwan Onyẹ hụ keni wẹ, ịhịan e bu ẹnya zinmẹ Onyẹ-nsọ Izrẹlụ.

⁸ Ebukọzị wẹ obi tụkwasị ihiẹn ẹka wẹ kpụ: kẹ ukpo-mmọn kẹ osisi ndị hụ wẹ zumẹni mmọn wụ Ashẹra kẹ ukpo nsẹnsi.

⁹ Ogẹn ahụn, obodo uku wẹ wẹ gi dọn ẹnya sikọ d'e mẹ ọfịa-ọfịa lẹ ogun-ogun rịkẹ ndị hụn ndị Kenanị gbatọsọnmẹ kẹ wẹ gbakọnị ndị Izrẹlụ ogẹn mbụ. Wẹ ile k'a gba okpokoro.

¹⁰ Kị haịn? Makẹni y'a zọgụọ Chuku ahụn a zụọpụhanị ị; y'a nyanhannị Ọmụma hụ y'a gbaban imẹ ẹ. Ọ sụọkwọ ị nwan kụn ihiẹn-akụnkụn rịgbu enwẹn ẹ mma, kụndẹ vaịnị pụ ichẹn wẹ gha alị ọzọ wẹhẹ;

¹¹ kụndẹ wẹ tannị, mẹ wẹ sue tannị, mẹdẹ wẹ mị mkpụrụ ụz'ọtụntụn hụ ị kụn wẹ, onwọnni hụn k'e nwọn isi ụhụọhịn lalanị, ụhụọhịn ụfụ lẹ emu nwọnlẹni ọgụn.

¹² Euu, lee ọnụma ndịnị ile rị a kpọ-o! Ọ nọkẹ ohimin rị a zụn ụzụn! Euu, lee ụzụn alị ichẹn-ichẹn rị a zụn-o! Ọ nọkẹ ụzụn okẹn-mirin!

¹³ Ọsụọkwọn'a ndị alị ichẹn-ichẹn rị a zụn ụzụn kẹ okẹn-mirin rị e huni, Osolobuẹ k'a jụgbọ wẹ hụ a gbate wẹ, nọkẹ ẹfịfịa ọkpọ-nkụn ufere bukọ elu òke, nọkẹ ukun-ẹfịfịa ufere bukọ.

¹⁴ Ẹnyasị, okẹn egun a tụma wẹ idẹnmizi; eki gini d'e fọn, arịkọzị w'a! Ịya e mẹ ndị a kwanarịn ẹnyi ihiẹn ẹnyi, ya wụ ihiẹn rịnị ndị e gbu ẹnyi e weri ihiẹn ẹnyi.