Azaya 16 - Ika

Isi Nke Mmisin Ụya K'e Ri Alị Mụabụ

¹ Wejẹn ni ni eze alị Juda atụnrụn, gha nị Sẹla we wẹ fetu atụ alị-ọkpọnkụn, shi ugu Zayọnụ Jerusalẹm.

² Kẹ nnụnụ wẹ chụpụ ẹkụ a dọn efejẹn-efelụa, ẹrịra kẹ ikpoho Mụabụ dọn nọdịsọnmẹ ebẹhụ wẹ nọ e gi ụkụ e fetu mirin Anọnụ.

³ “Dodo, bucheni ni ẹnyi ọnụ; kuyeni ni ẹnyi! Wụrụnị nị ẹnyi igungun ogẹnni anwụn rị a ma ẹnyi ọda-ọda. Zuemẹ ndị nkẹ ẹnyi gbakọ ọsọ agha, erekwọlẹ ni ẹnyi ye ndị rị a chụnị ẹnyi.

⁴ Nị nị ndị Mụabụ ẹnyi gba ọsọ-agha sọn ụnụ nọdị. Anịlẹ ni onyẹ rị e tikpọnị kunrun wẹ.” Onyẹ a bịangbuni a dan! Ntikpọ e bi; nke ndị rị a maye ọgụn, a zọgbu ịhịan, a gụ!!

⁵ Ukpo ohu hụn k'e gi ihiẹn-ọsụsụọ turu k'a gbọrị; onyẹ furu wẹ gi e dọn ẹnya k'a nọ a kị: onyẹ ikpụlọ Defidi, onyẹ k'a han ezigbo eṅẹn, a kwadọn ezi-omumẹ.

⁶ Ẹnyi a nụgụọ mpache ile alị Mụabụ rị a pache — e mẹkarị enwẹn ẹ, lẹ k'o dọn e bọnmẹ, e kukarị enwẹn ẹ — kanị wẹ rịhụ a ban mban mmaka.

⁷ Ya kẹ ndị Mụabụ gi nwan rị e goo, wẹ ile e goni alị Mụabụ. A kwan nị; a kwan nị ụya; sụkụrụ nị (gbusuru ni) — makẹni ogbe-vaịnị wẹ pịngbama kikọ wẹ gi marịn alị Kiri-Harẹsẹti alị Mụabụ arịzị a.

⁸ Ugbo Hẹsh'bọnụ ile e shinwụn, ya lẹ alị vaịnị rịsọnmẹ Sibma. Ndị rị a kị alị ndị ọzọ a zọgbugụọ alị vaịnị ndị kachanrịn mma, hụn te rukwọrị Jaza, shịarudẹ ibẹka atụ, hụn agalaba wẹ te shịapụ, shịarukwọrị Ohimin.

⁹ Ya haịn m gi rị e sọn Jaza a kwan ẹkwan a kwannị vaịnị ndị rị Sibma. Euu, Hẹsh'bọnụ! Euu, Ẹlialẹ! Ẹnya-mirin m e guhuchanrịn ụnụ! Makẹni oro ndị rị a ghọghọ nị ọka a kagụọ arịzị a lẹ ndị rị e yi ebe wẹ nọ e we ihiẹn-ugbo.

¹⁰ Ịghọghọ lẹ anwịnrịn arịzị ugbo mkpụrụ-osisi; w'a ra nụzị ẹbụ lẹ oro ịghọghọ imẹ alị vaịnị; onwọnzini onyẹ rị ebe wẹ nọ a pịnpụha manya. Makẹni e mẹgụọ m oro ịghọghọ kụsị.

¹¹ Obi m hụ a kwannị Mụabụ ẹkwan nọ kẹ ụbọ rị a kpọ ẹbụ ẹkwan, obi m hụ a kwanzịnị Kiri-Harẹsẹti ẹrịra.

¹² Ọsụọn'a nị ndị alị Mụabụ e jẹn d'a chụn ẹjan, wẹ rịhụ e gbu enwẹn wẹ mmaka; wẹ shidẹ ụlọ-mmọn wẹ d'a rịọ a n'o yeni wẹ ẹka, ọ bankọnị wẹ erere.

¹³ Ịya kẹ Osolobuẹ ku mbụ banyeni Mụabụ.

¹⁴ Kanị, kikẹnni Osolobuẹ sị nwan, “Ọ karịkọ ahụa ẹtọ daị — ahụa ẹtọ wẹ gụn kẹ odibo rị e che n'o weri enwẹn ẹ dọn a gụn ahụa — okẹn ọghọ ile Mụabụ nwọn enwọnkọzị ihiẹn ọ k'a wụ, ndị Mụabụ ile hụn bugbu nwan enwẹn wẹ ọda k'a họdụhụ ndị bulẹni ọda ndụn rịlẹni.”