Azaya 15 - Ika

Isi Nke Mmisẹn Ihiẹn Chuku Sị O K'e Mẹ Alị Mụabụ

¹ Ọnwan wụ ihiẹn Osolobuẹ ku banyeni alị Mụabụ: E tikpọ wẹ obodo Arẹ rị alị Mụabụ la iwi, e gi wẹ akpụ uhinhin ohu sụọ tikpọ a! E tikpọzịkwọ wẹ Kiri rị alị Mụabụ la iwi; e gi wẹ akpụ uhinhin ohu sụọ tikpọ a!

² Ndị bi Dibọnụ alị Mụabụ e shigụọ ụlọ-mmọn lẹ ebe wẹ nọsọnmẹ a chụn ẹjan d'a kwan ẹkwan; alị Mụabụ hụzị e goo alị wẹ wụ Nebo lẹ Mẹdẹba. A kọgụọ wẹ isi ile, kọpụ ẹtu ile.

³ Wẹ yihụ ẹkwa-achọ a kwan imẹ ọgbara-ogbe wẹ yeni ihiẹn mẹni wẹ; kẹ ebe ịhịan a nọdị elu ụlọ kẹ ebe ile ịhịan e kokomẹ kẹ wẹ ile nọsọnmẹ e goo; e fiẹnrinhụ a kwan.

⁴ Ndị bi Hẹsh'bọnụ lẹ Ẹlialẹ hụzị a kwan ẹkwan, olu ẹkwan wẹ rukwọrị obodo Jahazị. Ihiẹn ndịnị ile kẹ oro gi e fe ndị-agha Mụabụ isi, ndụn hụ a gụ wẹ.

⁵ Omikẹn Mụabụ e mẹgbu m; wẹ hụ a gbarukwọrị Zụa, a gbaruzi Ẹglatị-Shẹlishiya. E nyinrin wẹ elu òke shi Luhiti, kwankọ jẹnkọ; wẹ hụzị ụzọ Horonaim, a kwan, makẹni e tikpọgụọ wẹ wẹ.

⁶ Mirin wẹ wụ Nimrim a tahị, ẹfịfịa wẹ e shinwụn; ihiẹn-akụnkụn a la, onwọnzini ẹhụhụọ-oyiyi họdụnị.

⁷ Ufiri ẹ, ndị Mụabụ hụ a kwarị akụ-lẹ-ụba wẹ a pụ, e fetu Ọdanmgbugbu Osisi-pọpla.

⁸ Ẹkwan wẹ e rughọdẹ ebe alị Mụabụ ru; ogigo wẹ rị e goo e rukwọrị Ẹglaim; ụya wẹ rị a kwan e rukwọrị Biẹ-Ẹlim.

⁹ Ẹdeke e jundẹ mirin obodo wẹ Dimọnụ, kanị m'e ke mẹgụ Dimọnụ ihiẹn m k'e mẹ ẹ — ẹwọrọ ya d'a maye ndị Mụabụ — kẹ ndị hụn isi gbapụ kẹ ndị họdụ imẹ alị Mụabụ.