Azaya 14 - Ika

Isi Nke Mmẹnọ Ihiẹn Jẹnkọ D'a Rịzịnị Alị Jekọpụ Mma

¹ Osolobuẹ jẹnkọ d'e mẹ omikẹn ebọn Jekọpụ; o k'a họrịzị ebọn Jekọpụ wụ Izrẹlụ, mẹ wẹ birizi alị wẹ. Ndị alị ọzọ k'e sọn wẹ biri ebẹhụ, wẹ lẹ ikpụnọ Jekọpụ e họnrin ohu.

² Ndị alị ichẹn-ichẹn k'e duru wẹ, dulụa wẹ alị wẹ. Ndị Izrẹlụ e nwọnrin ndị alị ichẹn-ichẹn, awụrụnị wẹ wẹ igbọn ikẹnnyẹ lẹ ikpoho imẹ alị Osolobuẹ. Wẹ k'e kwọndọn ndị te gini wẹ, a kịma wẹ ndị te rị a kịgbuni wẹ.

Eze Babilọnụ A Dan!

³ Ogẹn Osolobuẹ k'e gi ye ụnụ ezumikẹn, napụ ụnụ afụnfụn lẹ uhue lẹ ẹgbụn-igbọn rị ụnụ olu,

⁴ ụnụ jẹnkọ d'a rị a mụ eze Babilọnụ ẹmụ, a sị: Onyẹ nwẹn a kịgbu ịhịan, nke ẹ a gụgụọ! Ẹka-ikẹn ẹ hụ ile e bigụọ!

⁵ Osolobuẹ a kpagigụọ ẹgbe ndị eje-ịhịan, ọkpọ ndị-ọkịkị,

⁶ hụn gi ọnụma dụtusọnmẹ ndị alị ichẹn-ichẹn, a dụsọnmẹ wẹ ịkpa, e gi olulu e bu alị ichẹn-ichẹn e che okpuru ẹ, a maye wẹ eje-ọmaye ghalẹni e bi.

⁷ Alị ile e nwọnringụọ nwan ezumikẹn lẹ udọn; wẹ hụ a kwankpọ ẹbụ.

⁸ Kẹ nkụ kẹ okẹn osisi sida alị Lẹbanọnụ hụ e gi ihiẹn hụn kunrunn'i a ghọghọ, a sị, “Hụnnị wẹ gbutugụ ị, onwọnzini ogbu-osisi k'a bịa d'e gbutu ẹnyi.”

⁹ Alị-mmọn rị okpuru hụ a tụshịa ẹhụ, e che i; ọ kpọtiẹngụọ ndị nwụnnị rịn'a d'e kele i — ndị ile te kị elu ụwanị; o mẹ ndị-nze ile hụn te kị alị ichẹn-ichẹn e lihi ebe wẹ dịnọ.

¹⁰ Wẹ ile sikọ d'a shịarị — wẹ k'a s'ị, “Ịyụ zị! Y'a rịgụọzị alụlụa kẹ ẹnyi nwẹn! Y'a nọgụọ kẹ ẹnyi!”

¹¹ E wetugụọ wẹ okẹn-ọghọ nwẹn ile i nwọn che imẹ ili, ịya lẹ egu ile i gi ụbọ ị a kpọ; Ọhọrị e jungụọ okpuru i nọkẹ bẹdi, ndidọn a fụkpumẹgụọ ị nọkẹ ẹkwa.

¹² Euu, y'a ghagụọ elu-igwee dan, onyẹ-e-gbukeni, nwa ụtụntụn! A magụọ wẹ i ye alị — ịyụ hụn te welụa alị ichẹn-ichẹn alị!

¹³ I te sị enwẹn i, “M k'e shi elu-igwee; m k'e bushi ukpo m elu ghafe kokisẹ Chuku ile; m k'a nọ elu ugu ozuzu mmọn ndị wẹ e fe kị, mkpọnụnụ ugu ahụn rị nsọ.

¹⁴ M k'a ghafedẹ orukpu-igwere; m k'a nọ kẹ Onyẹ Ahụn Kachanrịnnị.”

¹⁵ Kanị e wetugụọ wẹ i nwan che imẹ ili, weruchanrịn ị ebe kachanrịn e mi imẹ mgbugbu hụ.

¹⁶ Ndị hụnn'ị k'a gba ị ile, e ro ihiẹnni mẹn'i, a sị, “Ụnụ sị ọnwan wụ okẹnnyẹ nwẹn zinzin ụwa, okẹnnyẹ nwẹn mẹhunmẹ alị-eze ichẹn-ichẹn?

¹⁷ Onyẹ nwẹn mẹ ụwa gba okpokoro, tikpọsọnmẹ obodo ndị shịa ẹfọ rịn'a, jụ n'ọ hatukọ ndị ọ nwụn nị wẹ la?”

¹⁸ Ndị-nze alị ile e fiẹnrin nwan — onyẹ-onyẹ imẹ ili ẹ.

¹⁹ Kanị a gha wẹ imẹ ili i tụpụ yụ nwẹn, nọkẹ agalaba wẹ jụ; e kpọn wẹ ozun ndị ọzọ wẹ gbu imẹ agha kwasị ị, ozun ndị wẹ gi ọpịa-agha zugbu, ndị wẹ shikọ d'a tụye mgbugbu ọmụma; e mẹ wẹ i kẹ ozun wẹ zọgbu,

²⁰ elikọ wẹ i kẹ wẹ dọn li ndị-nze ibe i, makẹni y'e tikpọgụọ alị ị, gbu ndị nke i. Ahịkọzịdẹ wẹ ẹfan ụmụ ị, ịyụ, onyẹ eje-omumẹ.

²¹ Kwademẹ ni ebe wẹ k'a nọ gbu ụmụ a ikẹnnyẹ makẹ njọ ndị nẹdi wẹ; elihikọzị wẹ d'e nwọnrin alị, tụnsọnmẹ obodo elu ụwa ile kẹ w'a tụn.

²² Osolobuẹ ihiẹn ile rị okpuru ẹ sị, “Mmẹ wụ Osolobuẹ k'e mẹ wẹ ihiẹn. M jẹnkọ d'a napụ alị Babilọnụ ẹfan a lẹ ndị te k'e bikinn'ẹ — kẹ ụmụ kẹ ụmụ-ụmụ.” Ya kẹ Osolobuẹ ku.

²³ “M k'e gi ẹ họnrin ebe anụ ọfịa e bi lẹ alị ịkpọtọ la iwi: m k'e gi ẹzịza-ntikpọ zahu ẹ,” ya kẹ Osolobuẹ ihiẹn ile rị okpuru ẹ ku.

Ihiẹn Osolobuẹ Sị O K'e Mẹ Alị Asiria

²⁴ Osolobuẹ hụn nwọn ikẹn ile e kunọlẹ enwẹn ẹ, ọ sị, “Ihiẹn k'e mẹrịrị kẹ m dọn chọ a; ihiẹn m rotọ k'a bụnrịrị.

²⁵ M jẹnkọ d'a nọ alị m tikpọ alị Asiria; elu ugu m rị ichẹn-ichẹn kẹ m k'a nọ zọ a ye alị. M k'a tọpụ ndị nke m ẹgbụn a, ziẹn wẹ ibu ẹ hụn rị wẹ uvun.”

²⁶ Ọnwan wụ ihiẹn m rotọnị ụwa ile; ọnwan wụ ẹka m k'e gi sọn ndị alị ile.

²⁷ Ẹghẹẹ, Osolobuẹ ihiẹn ile rị okpuru ẹ e rotọgụọ ihiẹn. Onyẹ jẹnkọ d'a saẹka kagbu ẹ? Ọ tịnpụgụọ ẹka n'o mẹ ihiẹn, onyẹ jẹnkọ d'a saẹka sekin ẹ ẹka azụụn?

Ihiẹn Osolobuẹ Sị O K'e Mẹ Alị Filistia

²⁸ Ahụa eze Juda wụ Ahazị nwụn kẹ Osolobuẹ zi m ozini banyeni alị Filistia:

²⁹ Ụnụ ndị Filistia ile, aghọghọkwọlẹ ni nị mkpịnsịn wẹ gi fịan ụnụ a kpagipụgụọ nwan; makẹni, eje-agwọ pụla d'a nọkin ẹnya agwọ hụn tanị ụnụ — eje-agwọ a tụhunmẹni hụn nwọn eje-ẹdide.

³⁰ Ogbẹnnyẹ kachanrịn ogbẹnnyẹ e mẹ k'a hụn ihiẹn-oriri rijun ẹfọ, ndị elu rịdẹ a fụ k'e dinẹ, ihiẹn emẹkọ wẹ. Kanị ụnwụn k'e gbupụ mkpọgụn ị, gi ẹ gbupụ ụmụ ị họdụnị.

³¹ Yụ wụ ọnụ-mgbọn, gomẹkwọ! Yụ wụ obodo, kwanmakwọ! Ụnụ ndị Filistia, tụmakwọ nị egun! Wẹ gha ibe ugu lala nọkẹ ẹnwụnrụn lọtọnị d'a lụsọn ụnụ agha, onwọnni onyẹ-agha a la azụụn imẹ wẹ!

³² Kịnị kẹ wẹ jẹnkọ d'a shịarị ndị ụkọ alị hụ zila? “Osolobuẹ e tumẹgụọ Zayọnụ; imẹ Zayọnụ kẹ ẹhụ a nọ fu ndị nke ẹ wẹ rị e mẹkpa ẹhụ.”