Azaya 13 - Ika

Isi Nke Mmẹtọ Ihiẹn Osolobuẹ Sị O Jẹnkọ D'e Mẹ Babilọnụ

¹ Ihiẹnni kẹ Osolobuẹ ghọsị Azaya nwa Emọzụ banyeni Babilọnụ.

² Nọ elu òke fọnni weshi ihiẹn-ahịma elu; hị wẹ; fe wẹ ẹka nị wẹ zụnban ọnụ-mgbọn obodo ndị nwẹn wụ okẹn-ịhịan.

³ E zigụọ m ndị m họrị; a kpọgụọ m ndị-odogun agha m nị wẹ d'a ghọsị wẹ nị iwe rị e we m — ndị agha m họrị hụn a nyan isi, e mẹkarị enwẹn wẹ.

⁴ Gọn ntịn ụzụn rị elu ugu, ọ nọ kẹ nke igunrun hi ogbe! Gọn ntịn isusu ndị alị-eze ichẹn-ichẹn — ndị alị ichẹn-ichẹn rị e zu. Osolobuẹ ihiẹn ile rị okpuru ẹ rị a kpọkikomẹ ndị-agha nị wẹ d'a lụ agha.

⁵ Wẹ ghasọnmẹ alị teni bịa, kẹ ndị ghadẹ ebe igwere ru bịa — Osolobuẹ lẹ ihiẹn-ọgụn a rọ, hụn o jẹnkọ d'e gi ghọsị ọnụma a; o wela wẹ d'e tikpọ alị ile.

⁶ Kwanmanị ụya, makẹni Ụhụọhịn Osolobuẹ e d'e ru; o k'a bịa nọkẹ ntikpọ, ntikpọ Onyẹ hụ nwọn ikẹn ile.

⁷ Ẹka ile jẹnkọ nwan d'a lịlọhị, obi jẹnkọ d'e dẹnhin ịhịan ile.

⁸ Okẹn egun k'e kwọndọn wẹ, ụfụ lẹ afụnfụn k'e kwọndọn wẹ; wẹ k'a marịrị nọkẹ okpoho imẹ rị e mẹ. Wẹ k'a rị e lee ibe wẹ egun-egun; ẹnya k'e turu wẹ.

⁹ Lee ẹ, Ụhụọhịn Osolobuẹ lala — ụhụọkịn jọgbu enwẹn ẹ, ụhụọkịn hụn ọnụma lẹ olulu k'a kpọ — hụn k'e mẹ alịnị gba okpokoro, tikpọ ndị-njọ rịn'a.

¹⁰ Kokisẹ rị igwere lẹ ọkụdụ wẹ etikọ; anwụn rị a wanị k'a gba ishi, ifọn etikọ.

¹¹ Osolobuẹ sị, “M k'e ye ụwa afụnfụn eje-ihiẹn o mẹ, ye ndị eje-omumẹ afụnfụn njọ wẹ. M k'a napụ ndị rị e mẹkarị enwẹn wẹ nhọnrọn wẹ, e welụa m ndị ẹfọ-njọ rị e mẹkarị enwẹn wẹ alị.

¹² M jẹnkọ d'e mẹ ịhịan kọkarị ezigbo goru, kọkarịdẹ goru alị Ofiri.

¹³ M sikọ nwan d'e mẹhunmẹ elu-igwere, ụwa nkẹ e zinzinru alị yeni ọnụma Osolobuẹ ihiẹn ile rị okpuru ẹ, ụhụọhịn ahụn olulu ẹ k'a dụn kẹ ọkụn.

¹⁴ Kẹ ele wẹ rị a chụ dọn a gba ọsọ lẹzi kẹ atụnrụn nwọnlẹni onyẹ e duni wẹ dọn a gbayịya, ẹrịra kẹ onyẹ-onyẹ k'a dọn gbapụ, gbaburu ndị nke wẹ; onyẹ-onyẹ a gbapụ, gbashi alị a.

¹⁵ Wẹ nwụn ịhịan ụhụọkịn hụ, e gi wẹ ọpịa zugbu ẹ; ọpịa-agha kẹ wẹ k'e gi gbu ndị ile ẹka wẹ dụ.

¹⁶ Wẹ k'a nọ idẹnya wẹ e gi ụmụ-ndu wẹ a fịan ọmụma, a fịangbu wẹ; wẹ k'e buru ihiẹn rịsọnmẹ iwe wẹ, kwọndọn inyẹnmẹ wẹ e mẹ mgba wẹ.”

¹⁷ Lee ẹ, m'e d'a kpasu ndị alị Mẹdịa d'a maye wẹ; ndị Mẹdịa nwọnlẹni ihiẹn wẹ gi siliva e mẹ, ndị Mẹdịa goru ghalẹni a sụọ.

¹⁸ Ụta wẹ k'e gbu ikorọbịa; emẹkọ wẹ omikẹn mmụ-ẹka, emẹkọ wẹ omikẹn ụmụ-ndu.

¹⁹ Babilọnụ, hụn wụ mma alị-eze ichẹn-ichẹn hụn ndị Kal'di nwọnn'ẹ gi a dụ ẹka obi, a wụrụ ihiẹn Chuku tikpọ k'o dọn mẹ Sodọm lẹ Gomora.

²⁰ Ọ rịkọzị — ọ rịkọzị, ụwa e we gụ; onwọnni onyẹ Arabụ k'e ziẹntọdẹ ebẹhụ, onwọndẹni onyẹ e du anụ k'a nị anụ a nọ ebẹhụ zu ikẹn.

²¹ Anụ a kpa imẹ atụ k'a gha e dinẹ ebahụn — anụ ndị e yi oro k'e jun mkpọkọ ụlọ ndị hụ ozuzu-uku k'e bizi ẹ ewu-ọfịa a nọ ebẹhụ a wụhunmẹ.

²² Eje-nkitẹ ọfịa wụ haịna k'a rị mkpọkọ okẹn ụlọ wẹ a gbọ, anụ-ọfịa wụ jakalụ nkẹ a nọdị mkpọkọ obi-eze ọma wẹ a gbọzịkwọ. Ogẹn w'e gi tikpọ Babilọnụ a rịgụọ nsue! O biekọzị.