Azaya 12 - Ika

Isi Nke Mmẹbụọ Ẹbụ Ịja-mma

¹ O ru ogẹn ahụn, ị k'a sị: “Euu Osolobuẹ, m k'a ja ị mma! Ezioku, i te rị e buni m olulu, kanị olulu i a rọgụọ nwan; y'a rọkọgụọ m obi.

² Eziẹ, Chuku wụ onyẹ a zụọpụhanị m. M k'e gi i dọn ẹnya, egun atụkọ m. Osolobuẹ — Osolobuẹ, wụ ikẹn m lẹ ẹbụ m, ọ zụọpụhagụọ m.”

³ Ụnụ k'a rị a ghọghọ a dọrị nzụọpụha nọkẹ mirin imẹ ọmị nzụọpụha.

⁴ O ru ogẹn ahụn, ụnụ k'a sị: “Kpanmịn nị Osolobuẹ, kpọku ni ẹfan a; mẹ ni alị ichẹn-ichẹn marịn ihiẹn o mẹ, ụnụ e ku kẹ ẹfan a nwọnhan ọghọ.

⁵ Bụnị nị Osolobuẹ ẹbụ, makẹni o mẹgụọ okẹn ihiẹn; mẹ ni ụwa ile marịn ihiẹn o mẹ.

⁶ Yikẹnmẹ ni oro, ụnụ a bụ ẹbụ ịghọghọ, ụnụ ndị Zayọnụ, makẹni Onyẹ-nsọ Izrẹlụ e mẹkẹ okẹn-ihiẹn imẹ igunrun ụnụ!”