Azaya 10 - Ika

Isi Nke Iri Ihiẹn Osolobuẹ K'e Mẹ Ndị Rị A Bịangbu Ndị-igbẹnnyẹ

¹ Nsọngbu rị e che ndị hụn e ti iwu mmẹgbu, ndị e tumẹ iwu wẹ gi a bịangbu ibe wẹ,

² hụn wẹ gi a napụ ndị-igbẹnnyẹ ihiẹn runi wẹ, a napụ ndị nwọnlẹni ịhịan ihiẹn runi wẹ, e mẹgbu ikpoho di wẹ nwụn, a tụnarịn ndị nwọnlẹni nẹdi ihiẹn wẹ!

³ Kị ụnụ k'e mẹ nwan ụhụọhịn o k'a jụ ụnụ ajụjụ — ogẹn nsọngbu k'a gha ebe teni bịa? Onyẹ kẹ ụnụ k'a gbaburu n'o yeni ụnụ ẹka? Elebe kẹ ụnụ k'e butọ akụ-lẹ-ụba ụnụ?

⁴ Onwọnzini ihiẹn k'a họdụnị ụnụ wezụka ịma-piripiri imẹ ndị wẹ kpụnshikọ alị ọzọ, mọbụ ịrị imẹ ndị wẹ gbu. Kanị, ihiẹnni ile arọkwọnị Osolobuẹ olulu, o wetukwọnị ẹka o gi rị e mẹshi ndị nke ẹ ikẹn.

Ikpe Chuku Ma Alị Asiria

⁵ Osolobuẹ sị, “Nsọngbu rị e che alị Asiria — hụn wụ nwan mkpịnsịn m gi rị a ghọsị olulu m, hụn bu ẹgbe m gi a ghọsị ọnụma m!

⁶ M zi ẹ d'e mẹshi alị rịlẹni e fe m ikẹn, m tumẹ ẹ d'e mẹ alị kpasu m iwe ihiẹn — ya d'a napụ wẹ ihiẹn wẹ, kwanarịn wẹ ya; zọgbu wẹ kẹ w'a zọgbu ẹjan rị ọkpụzọ.

⁷ Kanị, ẹlẹ ọhụn k'o romẹ, ẹlẹ ya rị a obi; obi ẹ wụ ntikpọ, n'o tikpọ alị bu ọda.

⁸ Ọ hụ a sị, ‘Ẹlẹ ndị-nze ndị-nze a kịnị m ndị-agha?

⁹ Ẹlẹ mmẹ mẹ obodo Kal'no ihiẹn m mẹ obodo Kakẹmishi? Ẹlẹ mmẹ mẹ obodo Hamatị ihiẹn m mẹ obodo Apadị? Ẹlẹ mmẹ mẹ obodo Sameria ihiẹn m mẹ obodo Damaskọsụ?

¹⁰ Ẹrịra ẹka m dọn weri alị-eze ndị hụ e fe mmọn, alị-eze ndị hụ mmọn wẹ kasọnmẹdẹ nke Jerusalẹm lẹ Sameria —

¹¹ kịnị k'a napụ m emẹshilẹ Jerusalẹm lẹ mmọn ndị hụ rịn'a ikẹn — mẹ ẹ ihiẹn m mẹ Sameria lẹ mmọn ndị rịn'a?’ ”

¹² Kanị Osolobuẹ sị, “M mẹgụ nwan Ugu-Zayọnụ lẹ Jerusalẹm ihiẹn m k'e mẹ wẹ, mmẹ wụ Osolobuẹ k'e ye eze Asiria afụnfụn mpache hụ rị imẹ ẹ lẹ nhọnrọn hụ ọ rị a họnrọn.

¹³ Makẹni eze Asiria sị, ‘Ẹka m mẹ ihiẹnni, ya lẹ amamihiẹn m — makẹni m nwọn nghọta. E wepụsọnmẹgụọ m ihiẹn-okẹn alị ichẹn-ichẹn, kwarị ihiẹn rị mkpa wẹ dọnmẹ; e mẹrisọnmẹ m ndị-nze wẹ rịkẹ dikẹn.

¹⁴ Kẹ ịhịan dọn e bu ẹka e che ẹkụ-nnụnụ, e bugụọ m ẹka che akụ-lẹ-ụba alị ichẹn-ichẹn; kẹ wẹ e kpọnrin ẹkwan nnụnụ latọ, ẹrịra kẹ m dọn kpọnrin alị ile; onwọnni hụn mẹhunmẹdẹ nku, onwọnni hụn shịapụ ọnụ rịa.’ ”

¹⁵ Anyụn e bushidẹ nwan enwẹn ẹ elu karị onyẹ gi ẹ e gbu osisi ra? Ihiẹn wẹ gi a wa osisi a nyandẹni onyẹ gi ẹ a rụn ọrụn isi ra? Ọ nọzị nwan kẹ ebe mkpịnsịn nọ e gi onyẹ gin'ẹ a fịan ihiẹn, mọbụ ebe ẹgbe rị nwan e fehunmẹ ịhịan hụn wụlẹni mkp'osisi!

¹⁶ Ufiri ẹ, Onyẹ-nwọnni-ẹnyi, hụn wụ Osolobuẹ Nwọn Ikẹn ile jẹnkọ d'e zi eje-emu e fie ịhịan ẹhụ ye imẹ igunrun ndị ahụn ile kin akwanran wẹ lẹ eze Asiria wị; ọghọ a jẹnkọ d'e nwunrun ọkụn nọkẹ ebe ọfịa rị e nwun ọkụn.

¹⁷ Ukpẹ Izrẹlụ hụn wụ Osolobuẹ k'a wụrụ ọkụn; Onyẹ-nsọ wẹ hụn wụ Osolobuẹ k'a wụrụ ọkụn rị e nwunni; o k'e gi akpọhịn ohu dụnpụchanrịn kẹ ogun ẹ kẹ ọkịnkan a.

¹⁸ Kẹ ọghọ ẹgboko ẹ kẹ ọghọ ugbo ẹ mẹ wokowoko, o k'e wiwichanrịn wẹ kẹ emu dọn e fie ịhịan ẹhụ.

¹⁹ Osisi k'a họdụ ẹgboko ẹ ebukọ ọda kaka — nwa-mkpodu k'a sadẹ ẹka gụnmarịn wẹ detu!

Ndị Izrẹlụ K'a Họdụnị

²⁰ O ru ogẹn ahụn, ndị Izrẹlụ k'a họdụnị — ndị ikpụnọ Jekọpụ hụn k'a hụn isi wanahịn — egikọzị onyẹ hụ e gbuni wẹ dọn ẹnya, Osolobuẹ hụn wụ Onyẹ-nsọ Izrẹlụ kẹ wẹ k'e gichanrịn dọn ẹnya.

²¹ O nwọnghọ ndị k'a họdụnị kinhẹn, o nwọnghọ mmụ Jekọpụ k'a họdụnị, lụaburuhẹ Chuku Hụn wụ Dikẹn.

²² Izrẹlụ, ọsụọn'a nị ụnụ bu nwan ọda kẹ ẹjan rị mkpẹnrẹn ohimin, ndị bulẹni ọda sụọ k'a họdụ kinhẹn. Osolobuẹ e kutọgụọ oku ntikpọ o k'e tikpọ ụnụ, ntikpọ hụn jọgbu enwẹn ẹ kanị o furu efuru.

²³ Onyẹ-nwọnni-ẹnyi, Osolobuẹ ihiẹn ile rị okpuru ẹ, jẹnkọ d'e zihẹchanrịnnị alịnị ile ntikpọ hụn o ku oku ẹ.

Osolobuẹ Sị Omẹgụ Izrẹlụ E Weri Enwẹn Ẹ

²⁴ Di-nwọnni-ẹnyi, Osolobuẹ ihiẹn ile rị okpuru ẹ, sị, “Ndị nke m hụn bi Zayọnụ, atụkwọlẹ ni egun ndị Asiria, hụn gi mkpịnsịn e gbu ụnụ, e gi ẹgbe e gbu ọnụ kẹ ndị Ijiptu dọn mẹ.

²⁵ O biekọ, olulu m rị e buni ụnụ a rọ, e bumẹni m wẹ olulu hụn m'e gi tikpọ wẹ.”

²⁶ Osolobuẹ Hụn nwọn ikẹn ile jẹnkọ d'a fịan wẹ mkpịnsịn k'o dọn fịantu ndị Midianị ebẹhụ Ọmụma-Orẹbụ rị; o k'e bu ọkpọ a zinmẹ mirin rịsọnmẹ Asiria mẹ wẹ ihiẹn o mẹ mirin rị Ijiptu.

²⁷ Ogẹn ahụn, m k'e ziẹn ụnụ ibu wẹ rị ọnụ isi-uvun, tọpụ ụnụ agbụn wẹ rị ụnụ olu; agbụn ahụn jẹnkọ d'e tibepụ, makẹni ụnụ e tutugụọ.

A Bịa Wẹ!!

²⁸ A kụye wẹ Ayatị; a gha wẹ imẹ obodo Migrọnụ; e dọnmẹ wẹ ihiẹn wẹ imẹ Mik'mashị.

²⁹ A ghashi wẹ ụzọ rị ugu, sị, “Gẹba kẹ ẹnyi k'a ranhịn.” Ẹhụ a mama ndị Rama nni; ndị Gibia wụ obodo Sọlụ a gbama ọsọ.

³⁰ Ndị Galim, yimẹ ni oro! Gọnkwọ ni ntịn, ndị Laịsha! Euu ndị obodo Anatọtụ!

³¹ Ndị Mad'mẹna a gbama ọsọ; ndị Gebim a warị.

³² Ụhụọhịn ohu hụ, wẹ k'a kụsị imẹ obodo Nọbụ, nọ ebẹhụ zin Ugu Zayọnụ ẹka, zin elu-òke Jerusalẹm ẹka — a ban mban.

³³ Lee ẹ, Onyẹ-nwọnni-ẹnyi, Osolobuẹ ihiẹn ile rị okpuru ẹ, k'e gi okẹn ikẹn kwapụ ndị ile wụ okẹn agalaba; o k'e gbutu ndị wụ okẹn-osisi, o wetu ndị wụ osisi-ka-osisi alị.

³⁴ O k'e gi anyụn gbutu wẹ ile nọkẹ ebe wẹ nọ gbutu osisi rị ẹgboko; ẹgboko Lẹbanọnụ k'a dan alị ihun Onyẹ ahụn wụ Dikẹn.