Azaya 1 - Ika

Isi Nke Ohu

¹ Lee ihiẹn ndị Azaya nwa Emọzụ hụnsọnmẹ banyeni alị Juda lẹ obodo Jerusalẹm isi-alị Juda. Ogẹn ndị-nze wụ Uzịa, Jọtam, Ahazị lẹ Hezikaya gisọnmẹ kị Juda k'o gi hụn ihiẹn ndịnị.

Ikpe Osolobuẹ Rị E Kpe Ndị Nke Ẹ

² Igwere nụ a! Elu-ụwa, gọn ntịn! Makẹni Osolobuẹ sị: “Mmẹ zụn ụmụ, zụnpụha wẹ, kanị wẹ rị nwan a pa oku m.

³ Efin a marịnghọ onyẹ-nwọnn'ẹ; jaki nkẹ a marịnzịghọ ihiẹn di-nwọnn'ẹ gi e butọn'a ihiẹn-oriri, kanị Izrẹlụ amarịn, ndị nke m aghọtanị!”

⁴ Eje-alịnị! Ndịnị njọ jun ihun lẹ azụụn! Ụmụ hụn e mẹ eje-ihiẹn eje-ihiẹn; ụmụ rụnị! A gbakitọgụọ wẹ Osolobuẹ azụụn; a jụgụọ wẹ Onyẹ-nsọ Izrẹlụ, ya lẹ wẹ arịzị kaka!

⁵ Kị wẹ k'e gbumẹzini ụnụ ili? Kị ụnụ tọnị e nupụ isi? A rụgụọ wẹ ụnụ ẹhụ isi ile, onwọnzini akpụ obi ohu ndụn rị.

⁶ Gha isi d'e ru ọbụkụ, onwọnni nwan ebe rị ikẹn, ẹtẹ lẹ ugbẹnrẹn-mkpịnsịn e jun, ẹtẹ hụn wẹ chanlẹni mọbụ kẹnmẹ mọbụ buche ọgụn.

“Alị Ụnụ A Lagụọ Iwi”

⁷ Alị ụnụ a gbagụọ okpokoro; a dụngụọ wẹ obodo ụnụ rị ichẹn-ichẹn ọkụn; abịamabịa hụ e wiwi ugbo ụnụ idẹnya ụnụ, e mẹ wẹ a la iwi rịkẹ ebe itumunyẹ nọ weri ọkịkị.

⁸ A lagụọ wẹ nwagbọọ wụ obodo Zayọnụ tọ nọkẹ ụlọ-ubi rị ugbo-vaịnị, nọkẹ ụlọ-ogo rị ugbo-ogiri, nọkẹ obodo ndị-agha kehunmẹ.

⁹ Omẹni Osolobuẹ ihiẹn ile rị okpuru ẹ ete latọnịnị ẹnyi ndị ọ latọnị ẹnyi, nkẹ ẹnyi a rịgụọ kẹ obodo Sodọm, nkẹ ẹnyi a nọgụọ kẹ obodo Gomora.

“Ezi-omumẹ Kẹ M Chọ, Ẹlẹ Oyiye!”

¹⁰ Gọn ni ntịn ihiẹn Osolobuẹ rị e ku, ụnụ ndị-isi Izrẹlụ, makẹni ụnụ lẹ ndị-isi Sodọm wụ ohu! Gọn ni ntịn Iwu Chuku ẹnyi, ụnụ ndị Izrẹlụ, makẹni ụnụ lẹ ndị Gomora wụ ohu!

¹¹ “Ẹjan hụ ile ụnụ a chụnyeni m, kịnị kẹ m gi wẹ e mẹ?” Ya kẹ Osolobuẹ ku. Ẹjan w'a kpọ ọkụn a gbụgụọ m, kẹ hụn wẹ gi mmụ ebulu chụn kẹ ụtọrọ anụ ndị wẹ zụntọsọnmẹ; ẹdeke okẹn-efin lẹ ebulu lẹ ewu ara sụọ m.

¹² Ogẹn ụnụ gi a bịa ihun m d'e fe ofufe, onyẹ rịọ ụnụ ihiẹnni, ojẹnhunmẹni ile nwọnlẹni isi ụnụ rị e jẹnhunmẹ ezi-ọgwa m?

¹³ Wẹhẹbehi ni ni m oyiye nwọnlẹni-isi! Nsẹnsi ụnụ a rụgụọdẹ ẹnya m. Kẹ Mmẹmmẹ Ifọn-ọhụn ụnụ kẹ Ụhụọhịn Ezumikẹn ichẹn-ichẹn ụnụ gi e fe m kẹ Ozuzu ofufe ichẹn-ichẹn ụnụ, Asa m ẹka dinzi: e mẹ njọ e zuzi ozuzu-nsọ ndịnị!!

¹⁴ Mmẹmmẹ Ifọn-ọhụn ụnụ lẹ ndị ọzọ wẹ tumẹsọnmẹni ụnụ rị e ze m, e zeru m akpobi. A wụrụgụọ wẹ m ibu olu, ndụn a gụgụọ m m gi e din wẹ.

¹⁵ Ụnụ kịshidẹ ẹka elu mẹ ekpere, e bupụ m ụnụ ihun; ụnụ mẹkẹnmẹdẹ ekpere, egọnkọ m ụnụ ntịn. Ẹdeke jun ụnụ ẹka;

¹⁶ wụ nị ẹhụ; kẹni ụnụ nwunchan! Wepụ nị nị m eje-ihiẹn ndịnị ụnụ rị e mẹ! Mẹbehi ni eje-ihiẹn!

¹⁷ Mụnị kẹ wẹ dọn e mẹ ihiẹn rị mma! A kwadọn ni ezigbo eṅẹn, e yeni ni ndị wẹ rị e mẹgbu ẹka. A nọ nị ndị nwọnlẹni nẹdi e ye azụụn, e kinni ni ikpoho di wẹ nwụn ọnụ wẹ.

“Nị Ẹnyi Dọn Ni Nwan!”

¹⁸ Osolobuẹ sị, “Bịa nị nwan nị ẹnyi ku: ọsụọn'a njọ e mẹgụọ ụnụ nwunmẹ ododo-ododo, m k'e mẹ ụnụ nwunmẹ kẹ ẹkwa-ọchan! Ọsụọn'a n'o mẹgụọ ụnụ nwunmẹ ufie-ufie, ụnụ k'e nwunmẹ kẹ oruru ọchan.

¹⁹ Omẹni ụnụ e wepụha obi, humẹ isi, ụnụ k'e ri ezigbo ihiẹn rị alịnị;

²⁰ kanị ụnụ jụ, nupụ isi, ọpịa-agha jẹnkọ d'e bu ụnụ ri.” Osolobuẹ e gigụọ ọnụ a ku ẹ.

“Ihiẹn M K'e Mẹ Jerusalẹm”

²¹ Ledẹ ni nị obodo nwẹn wẹ te gi e dọn ẹnya e họnringụọ nwan ịgbaraja! Ezigbo eṅẹn te jun imẹ ẹ; ezi-omumẹ te bi imẹ ẹ, kanị ndị izighẹ bi ẹ nwan!

²² Siliva ị a gbagụọ nchara, ezigbo manya ị e mẹgụọ mirin-mirin.

²³ Ndị-ọkịkị ị wụ ndị nnupụ-isi, uwẹ lẹ ndị ohin gba a wị; egho-azụụn a sụọ wẹ ile a sụọ; w'a chọsọnmẹ onyẹ k'e ye wẹ ihiẹn. W'a ra kuni ndị nwọnlẹni nẹdi ọnụ wẹ; w'a ra buchedẹ ẹnya oku ikpoho di wẹ nwụn.

²⁴ Ufiri ẹ, Onyẹ hụn nwọn ihiẹn ile, Osolobuẹ ihiẹn ile rị okpuru ẹ, Dikẹn Izrẹlụ, sị nwan, “Hmm! Ndị-iṅẹnrẹn m k'a kụrịrị ụgwọ ihiẹn wẹ mẹ; m k'e mẹgwarị ndị-iṅẹnrẹn m!

²⁵ Ẹka m k'e bitụ ị; m k'e wepụchanrịn unyin rị imẹ i, wepụchanrịn ihiẹn ile rịlẹni mma rị imẹ i.

²⁶ E yezi m'i ezigbo ndị-ndu nọkẹ hụn m ye i ogẹn mbụ, yezi i ezigbo ịhaịmẹ nọkẹ ndị hụn m ye i isi mbidọn. Omẹgụ, wẹ k'a kpọmazị ị ‘Obodo Ezi-omumẹ, Obodo wẹ gi e dọn ẹnya.’ ”

²⁷ Ezigbo eṅẹn kẹ wẹ jẹnkọ d'e gi gbarị Zayọnụ, gi ezi-omumẹ gbarị ndị Zayọnụ hụn k'e rogharịnị.

²⁸ Kanị ntikpọ kẹ wẹ k'e tikpọ ndị nnupụ-isi lẹ ndị-njọ, ndị hụn gbakitọ Osolobuẹ azụụn k'a la iwi.

²⁹ Ifẹnrẹn k'e mẹ ụnụ makẹ osisi ndị hụ ụnụ a rụa, hụn a sụọ ụnụ ụsụọ; ụnụ k'a fa makẹ ugbo-nta ndị hụ ụnụ nọ a rụa mmọn hụn ụnụ sị nị ịya ka ụnụ mma.

³⁰ Ụnụ jẹnkọ d'a nọ kẹ osisi gbụ ẹhụhụọ, ugbo-nta hụnlẹni mirin.

³¹ Ndị wụ dikẹn k'a rị kẹ ẹfịfịa-ọkpọnkụn, ihiẹn wẹ mẹ e họnrin ihiẹn wẹ gi mụye ẹ ọkụn; ọkụn k'a dụn wẹ ẹbụbụọ, onwọnni onyẹ k'e tinyụnn'a.