Ze̩karaya 6 - O̩TAKADA O̩LA O̩JO̩ 1970

Amanya kpʼo̩kogu o̩kogu

¹ Tak u ño̩ chʼeju-mi nyʼate̩ ago, e̩ la go, o̩kogu me̩le̩ kwʼagbagba uwo meji dufu; uwo le̩ la chʼuwo ebijeikpa.

² O̩kogu ejodudu nʼamanya ekpikpa; o̩kogu ekeji la nʼamanya edudu;

³ o̩kogu e̩ke̩ta la nʼamanya efufu; o̩kogu e̩ke̩le̩ la nʼamagelema adibabala ekpikpa.

⁴ Tak u dohi ka ñw onuche̩ ki ako̩la ñwu mi le̩ kakini, Abo-i chʼe̩wñ, odu-mi?

⁵ Tak onuche̩ le̩ dohi ka ñwu mi kakini, Afu ojale me̩le̩ ki kwʼo̩gba Ondu ile̩ du adufu le̩ jo̩-i.

⁶ E-ki nʼamanya edudu adufu rʼo̩wo̩ ane̩ o̩wo̩ o̩pata ate̩; tak e-efufu dufu atʼuma ubi; e-adibabala la ledufu rʼo̩wo̩ ane̩ o̩pata o̩gane̩.

⁷ Tak abo ki nʼukpahiu le̩ ledufu, oñ ma feju ku ma tʼalelo lewa ile̩. Tak i kakini, Kwʼemi alo, me̩ te̩ lelo lewa ef ile̩. Abe̩le̩ ma kwotʼalelo lewa ile̩.

⁸ Tak i kwado̩ mi, oñ i ko̩la ñwu mi kakini, Go, abo ku ma ledufu rʼo̩wo̩ ane̩ o̩pata ate̩ fʼumi e̩do̩ nyi ugbo o̩wo̩ ate̩ le̩ me̩.

Ike̩be̩ Jo̩shua atama

⁹ Tak o̩la Jihofa wʼugbo mi kakini,

¹⁰ Gba o̩wo̩ abo ku ma mu alo le̩, owñ che He̩ldai kpai Tobaija, kpai Jedaya; kʼe̩ lewa eñeñini le̩ kʼe̩ mugudu tef unyi Josaya, o̩ma Ze̩fanaya, ugbo ku ma kwo Babilo̩n wa jo̩ le̩.

¹¹ I-i, e̩ gba ajifa kpai o̩jamalia kʼe̩ fʼike̩be̩ ike̩be̩ gwu kʼe̩ dʼu do Jo̩shua, o̩ma Jeho̩sadak, agboji amatama le̩ oji;

¹² kʼe̩ la ko̩la ñw u kakini, Abu ki Jihofa ki nʼe̩wñ du aka de̩, kakini, Go, e̩ne̩ ku ma dʼodu-wñ ko̩ E̩pa le̩; owñ la apa kwʼuña-wñ le̩ dufu, oñ i akʼunyi Jihofa;

¹³ owñ le̩ pitii akʼunyi Jihofa; tak owñ le̩ anʼojima-wñ, i la agugu añwʼoda ñw amone̩ oj ede-wñ le̩, i lañʼachʼatama oj ede-wñ, ohi ure̩do̩ la adʼagbagba ama meji.

¹⁴ Oñ ike̩be̩ ike̩be̩ le̩ achʼutodu He̩ldai kpai Tobaija kpai todu Je̩daya kpai todu Josiaya o̩ma Ze̩fanaya, ki chʼe̩wñ urewa ef unyi Jihofa.

¹⁵ Oñ abo ku ma jʼo̩najiji awa fʼunyi Jihofa ko. Tak ame̩ ama ka ku Jihofa ki nʼe̩wñ du fʼumi kpe̩ wʼugbo-me̩. Me̩ netirʼomu Jihofa O̩jo̩-me̩ gbali mak e̩wñ-i awa che chuu.