Nihe̩maya 6 - O̩TAKADA O̩LA O̩JO̩ 1970

Sanbalat achʼukpahiu e-wñ kʼuko̩lo̩ le̩ ki chi

¹ Oñ i lewatu e̩gba ku ma dʼinabali ñwu Sanbalat kpai Tobaya kpai Ge̩she̩m e̩ne̩ Arab le̩ kpai ame̩nebi-wa ki bo̩, ka kʼomi fʼo̩do̩ le̩ ne ki ma ño̩ nʼugbo kʼi kpo̩fo̩ ge̩ n, (u muda kʼolugba-na dago alaku alaku iko le̩ ta n),

² taku Sanbalat kpai Ge̩she̩m kpʼuche̩ rʼumi kakini, Wa kʼa de ewo egbili Ono. Ibe la dʼef uma ku ma che mi e̩bie̩ne̩.

³ Tak u fʼamonuche̩ kpe̩ rʼuma kakini, U dʼemi ache uko̩lo̩ o̩temeje. To̩da-be̩le̩ u neke gwo̩ru wa n; tod e̩wñ uko̩lo̩-i akpachi, kʼu to̩no̩ kʼu gwo̩ru wʼugbo me̩?

⁴ Oñ ma fʼuche̩ e̩gʼe-le̩ kpe̩rʼumi onu me̩le̩; u la dohi abe̩le̩ ñwu ma.

⁵ Tak onu e̩ke̩lu-wñ Sanbalat fʼadu-wñ kpuche̩rʼumi e̩go̩ le̩, o̩takada ku ma ko̩ chʼenadala nʼo̩wo̩-wñ.

⁶ Ma ko̩ nyʼu kakini, Ma ka ef abo uche̩ichi ka kʼibe dʼef uwe̩ kpai amaJu ka ku me̩ ako̩ onu. Gashmu ka abe̩le̩. Todule̩ oñ uwe̩ do̩mo̩ an, o̩do̩, i la dʼuwe̩ e̩do̩ kʼe̩ chʼonu-ma, abu kʼa gbo le̩ de̩.

⁷ Uwe̩ laño̩ mʼamakache̩ ko jo̩ ku ma fʼakoya-we̩ ta Je̩rusale̩m kakini, Onu de̩ Juda. Fai awa la adʼinabali alu kʼo̩la le̩ de̩ ñw onu. Todule̩ e̩ lewa, kʼa nyojuju.

⁸ Tak u fʼuche̩ kpe̩ rʼu kakini, I nʼe̩ne̩ du kʼi ache e̩wñ kʼuwe̩ aka le̩ n. E-le̩ chʼakpaine̩ ibe efu-we̩ oñ e̩ ka le̩.

⁹ Todu i dʼuma e̩do̩ chaka ku ma nyʼuwa okpo, ma kakini, O̩wo̩-ma abulo̩ ef uko̩lo̩-ma, tak i awe enʼoji. O O̩jo̩, dʼukpahiu ñw o̩wo̩-mi fa-i ke.

¹⁰ Tak u nyʼef unyi She̩maya, o̩ma Delaya, ki chʼo̩ma Me̩he̩tabe̩l, kʼi fʼo̩na re nyʼo̩la-wñ tef unyi, oñ i kakini, Awa ki jeju ef unyi O̩jo̩, ef unyi lile le̩, kʼa la fʼolugbo̩na unyi lile le̩ re; todu ma awa ku ma dʼe̩ kpa; ochochi, ma awa odu ku ma dʼe̩ kpa.

¹¹ Tak u kakini, E̩gʼ e-mi-i ara? E̩ne̩ chʼe̩go̩ mi kʼi anyʼef unyi O̩jo̩ lile-i todu kʼi jadu oji o̩la-wñ? U le n.

¹² Tak i ne̩rʼumi eju, oñ u li ka ki chʼO̩jo̩ kpʼo̩ wa-i n; chai owñ kate kʼache̩-i nyʼumi; Tobaya kpai Sanbalat la chʼo̩gu ñw u.

¹³ Todu ku ma chʼogu ñw u le̩ de̩ kakini, kʼomi ki railo kʼu fʼabe̩le̩ che, kʼu dure, kʼama ki gwo̩nyʼo̩la le̩ ki mud uwohi e̩bie̩ne̩, ku ma nʼe̩wñ ku ma dʼu bʼumi ina.

¹⁴ O O̩jo-mi, e̩ narewa Tobaya kpai Sanbalat teju uko̩lo̩-ma-i kpai akache̩ onobule̩, Noadaya, kpai amakache̩ kibo̩, ki dʼuma e̩do̩ ku ma nyʼumi okpo ge̩.

¹⁵ Abe̩le̩ ma fʼodo̩ le̩ ne kpa o̩jo̩ kʼochu Elul nʼo̩jo̩ ogue̩lu, owñ chʼo̩jo̩ ooje nyoke meji.

¹⁶ Oñ i lewatʼe̩gba kʼame̩nebi-wa chaka gbo, abo uche̩ichi du ku ma lʼuwa daka le̩ kwo railo, oñ i mud e̩wñ achukata ñwu ma eju-ma; todu ma li ka kʼo̩wo̩ O̩jo̩-wa dʼef uko̩lo̩ le̩.

¹⁷ Anoji e-le̩ ge̩, iko le̩ abojima amaJu ko̩ o̩takada wewe kpuche̩ru Tobaya. O̩takada e-Tobaya la wʼugbo e-ma.

¹⁸ Todu amone̩ wewe jo̩ Juda ku ma ñmʼe̩bo̩ kpʼowñ, todabu kʼowñ nʼo̩ma She̩kanaya o̩ma Ara chʼo̩ya; Jehohanan, o̩ma-wñ la ne̩ o̩ma Me̩shulam o̩ma Be̩re̩kaya chʼo̩ya.

¹⁹ Ma ño̩ fʼe̩wñ e̩nyo̩ kʼi che ka jane̩ ñwu mi, ma la mʼo̩la e-mi du ka ñw u. Oñ Tobaya ko̩ o̩takada kpuche̩ wa kʼi nyʼumi okpo.