Matiu 27 - O̩TAKADA O̩LA O̩JO̩ 1970

Jisus lewa o̩gba Pailat

¹ Oñ abu kʼo̩jo̩ ñwa, amagboji amatama chaka kpai abogijo amone̩ le̩ fʼojuju nyi nyu Jisus, todu ku ma dʼowñ kpa.

² Tak abu ku ma fʼu ji ma mʼu du alo, oñ ma mʼowñ du ñwu Pailat, igo̩bina o̩mo̩.

Uku Judas

³ E̩gba le̩ abu ki Judas kʼi dʼu ñwu ma mu le̩ fu li ka ku ma fʼabi kpʼo̩, i chane̩ ejumama oñ i mʼajifa ogue̩gwa le̩ ko dabiwa ñw amagboji amatama kpai abogijo,

⁴ i kakini, U dure me̩, owñ chʼe̩bie̩ ki ma fʼudu n kʼu du ñwu ma mu le̩. Ma muda kakini, E̩wñ chʼe-wa ef uwñ? Uwe̩ nʼe-le̩.

⁵ Tak abu kʼi mʼajifa le̩ ko rikpolo jʼef unyi O̩jo̩ Ejefu, i la kwʼo̩mo̩ le namʼo̩la-wñ du lo̩.

⁶ Tak amagboji amatama mʼajifa le̩ ko, ma kakini, O̩da aje̩ ñw a kʼo jʼef e̩wñ ele O̩jo̩ n, abu kʼi chʼo̩ko̩ e̩bie̩.

⁷ Tak abu ku ma fʼojuju nyi, ma mʼu ko la ane̩ abucha kʼi mud ugbo ku ma kʼabo ononojo ji.

⁸ Lef e-le̩ oñ ma do̩ ane̩ le̩ ko̩ Ane̩ E̩bie̩ gbogbo tʼeñini.

⁹ E̩gba le̩ e̩wñ ku ma ka lefu Je̩re̩maya akache̩ le̩ che̩, kakini, Ma la mʼajifa ogue̩gwa le̩ ko, oñ chʼalaja e̩ne̩ kʼamo̩ma Israe̩l da le̩.

¹⁰ Oñ ma mʼu ko la ane̩ abucha le̩, alu kʼOndu ñwa ñwu mi.

Jisus dago o̩gba Pailat

¹¹ Abe̩le̩ Jisus dago o̩gba igo̩bina le̩; oñ igo̩bina tʼowñ ene kakini, Uwe̩ chʼOnu amaJu? Oñ Jisus ka ñwu kakini, Uwe̩ ka-i.

¹² Oñ ef o̩la kʼamagboji amatama kpai abogijo gwu-nʼowñ i dohi du n.

¹³ E̩gba le̩ Pailati ka ñw u kakini, E̩ gbo̩ ibenu e̩wñ wewe ku ma gba nyʼuwe̩ n?

¹⁴ I la dohi du ñw u n, i chaka chʼo̩laʼkate. Todabe̩le̩ oñ igo̩bina le̩ yaye tabale.

¹⁵ Oñ iko uje̩wñ uyo̩ igo̩bina te̩tatʼe̩namuʼka kʼi dʼo̩wo̩ amone̩ le̩ e̩do̩ no̩ ñwu ma.

¹⁶ Oñ e̩gba le̩ ma nʼe̩namuʼka kʼi chenʼuwohi, odu-wñ ko̩ Barabas.

¹⁷ Todule̩ abu ku ma wajo̩ le̩ Pailati ka ñwu ma kakini, E̩ne̩ dʼume̩ e̩do̩ kʼu nato̩no̩ ñwu me̩, Barabas abe̩ku Jisus ku ma do̩ ko̩ Kraisti le̩?

¹⁸ Todu i chema ka kʼi chʼutodu elie̩na ku ma lie̩na-wñ oñ ma dʼuwñ ñw u mu.

¹⁹ Oñ abu kʼowñ gugu o̩gba ede le̩, o̩ya-wñ fʼuche̩ kpe̩ nyʼugbo-wñ, kakini, O̩wo̩-we̩ ki do̩ kpʼama ugbo e̩no̩kpakpa ki de̩ n. Todu u li uwa nana ef o̩na kʼu na li owñ eñini.

²⁰ Ama amagboji amatama kpai abogijo kʼo̩wo̩ nyu o̩wo̩ amone̩ le̩ efu todu ku ma ki bi Barabas, ku ma la du Jisus kpa tinyo̩.

²¹ Abe̩le̩ igo̩bina dohi ka ñwu ma kakini, Ef ama meji-i e̩ne̩ dʼume̩ e̩do̩ kʼu nato̩no̩ tane̩ ñwu me̩? Oñ ma kakini, Barabas.

²² Pailat ka ñwu ma kakini, Mak e̩wñ nache Jisus ku ma do̩ ko̩ Kraisti le̩? O̩chaka-ma kakini, Ma ki mʼowñ du kaba mʼoli.

²³ Oñ i kakini, Tod e̩wñ? E̩bie̩ne̩ e̩wñ i che? Ma muda kwukwa ololo kakini, Fʼu kaba mʼoli.

²⁴ Oñ abu ki Pailati li ka ki nʼile ñw u n, chai echi oñ ekuku achi, i mʼomiofo du oñ i fʼo̩wo̩-wñ gwe̩ eju o̩wo̩ amone̩ le̩, i kakini, O̩wo̩-mi dʼef e̩bie̩ e̩no̩kpakpa-i n. Ame̩ go.

²⁵ Tak amone̩ le̩ du dohi kakini, E̩bie̩-wñ ki nʼawa kpai amo̩ma-wa oji ke!

²⁶ E̩gba le̩ i tu Barabas no̩ ñwu ma, oñ abu kʼi fu Jisus gwo, i mʼu du ñwu ma todu kʼama ki dʼowñ kamoli.

Ma fu Jisus kaba mʼoli

²⁷ E̩gba le̩ amisoja igo̩bina mu Jisus du nyʼef unyi Praito̩rium, oñ mafʼo̩gbo̩ abo oje̩go̩-ma do̩ wa adonyʼuwñ.

²⁸ Taku ma mʼe̩wñ o̩la-wñ gwo̩ jʼane̩, oñ ma mʼaliche̩ba odufa ekpikpa ko bʼo̩ ubi ma,

²⁹ taku ma fʼikeke ta uloko oñ ma mʼu du dʼo oji, taku ma mʼikpo du tunyʼo̩wo̩-wñ awo̩to̩, taku ma tʼokuku kpe̩ o̩gba-wñ, ma chʼo uke̩ kakini, Agba-oo, uwe̩, Onu amaJu.

³⁰ Taku ma tito̩ nyʼu o̩la, ma mʼikpo le̩ du agwʼo̩ oji.

³¹ Tak e̩gba ku ma fʼu gwʼuke̩ kpa, ma mʼaliche̩ba le̩ du bʼo̩la-wñ te̩, oñ ma mʼe̩wñ e-wñ ko nyʼu o̩la. Taku ma mʼowñ du alo ku ma fʼu kamoli.

³² Oñ abu ku ma dufu alo ma fʼe̩ne̩ Sairiniʼka li, odu-wñ ko̩ Saimon; ma fʼe̩ne̩ le̩ mu todu kʼi nʼoli uku Jisus.

³³ Tak abu ku ma lewa ugbo ku ma do̩ ko̩ Go̩lgo̩ta, owñ chʼe-ku ma do̩ ko̩ Uña Akokoloji,

³⁴ ma mʼomi achiwebe̩te̩ma kʼololo gwe̩gwa nyʼu du ñw u kʼi ñmo̩; oñ abu kʼi dʼu kadalu i dʼowñ e̩do̩ kʼi ñmo̩ n.

³⁵ Oñ abu ku ma fʼowñ kamoli ma fʼe̩wñ o̩la-wñ kpe̩ jo̩, ma fʼanya-wñ ro̩.

³⁶ Taku ma gugu ane̩ adejutʼowñ o̩mo̩.

³⁷ Taku ma fʼolubutu o̩la e̩wñ ki chi du tʼugbo oji-wñ ate̩ kakini: OWÑ-I CHE JISUS, ONU AMAJU.

³⁸ E̩gba le̩ ma fʼamadinya meji kamoli manyʼowñ, oka dʼo̩wo̩ awo̩to̩, oka la dʼo̩wo̩ awohi.

³⁹ Oñ abo ku ma alale chʼakpabie̩-wñ, ma miʼoji-ma ejo,

⁴⁰ oñ ma kakini, Uwe̩, kʼe̩ gu Unyi O̩jo̩ Ejefu lo̩ kʼe̩ mʼu du ko̩ o̩jo̩ me̩ta, fʼo̩la-we̩ jadu! Iche̩wñ kʼuwe̩ chʼO̩ma O̩jo̩, gwo̩ru kwʼoj oli uku wane̩ ke!

⁴¹ Abe̩le̩ amagboji amatama manyʼamako̩takada kpai abogijo gwʼu uke̩, kakini,

⁴² I fʼabo ki bo̩ jadu, i aneke jadu o̩la-wñ n; Onu Israe̩l i che, i ki gwo̩ru kwʼoj oli uku wane̩ tak a ake̩do̩nʼowñ.

⁴³ I te̩take̩do̩nʼO̩jo̩, i chʼe̩ne̩ ki dʼO̩jo̩ e̩do̩ i che, i ki mʼu gba fai ke, todu i ka kakini, O̩ma O̩jo̩ owñ che.

⁴⁴ Amadinya ku ma kamoli manyʼowñ ño̩ kicha abe̩le̩ ñw u ge̩.

Jisus Uku

⁴⁵ Oñ akwo agogo me̩gweji gbogbo wa agogo me̩ta e̩chubi lewa bʼugbo du ane̩ le̩ ma.

⁴⁶ Oñ i dabe̩ne̩ kʼiko agogo me̩ta Jisus dʼomu nyate̩ kwa nana kakini, Elai, Elai, lama sabaktani? Owñ che: O̩jo̩-mi, O̩jo̩-mi, e̩wñ chi kʼe̩ hi umi tinyo̩-i?

⁴⁷ Oñ abu kʼabo iche̩ka ku ma dago jʼo̩mo̩ gbʼo̩, ma kakini, E̩ne̩ le̩ ado̩ E̩laija.

⁴⁸ Tak ababa le̩ e̩ne̩ʼka ef uma fule namʼugbo̩che̩ du, i mʼu du tunyʼomi e̩ka kʼi ñmʼo̩ nyʼo̩la e̩ko̩, tak i mʼu du tunyʼoj elikpo, oñ i dʼu ñw u kʼi ñmʼe̩.

⁴⁹ Oñ abo ki bo̩ kakini, Tʼo̩ no̩, kʼa ali abe̩k Elaija awa jadu-wñ.

⁵⁰ Oñ abu ki Jisus ño̩ dabi dʼomu nyate̩ akwa nana, i tʼafu-wñ no̩.

⁵¹ Me̩ la go, ukpo ugbeju Unyi O̩jo̩ Ejefu le̩ mukpana meji akwo oji-wñ ate̩ gbogbo wa ane̩; tak ane̩ kwomiejo, apata apata la kpana.

⁵² Tak ojinoji ojinoji mʼalu chi te̩, oñ año̩la abo kiafo̩ wewe ku ma mʼolu du kwane̩;

⁵³ oñ abu kʼi kwane̩ ma kwʼef ojinoji ojinoji dufu, oñ ma mugudu tʼef ewo kiafo̩ le̩, ma la kwotejugede ñw amone̩ wewe.

⁵⁴ Oñ abu kʼagboji amisoja ogume̩lu le̩ kpai abo ku ma manyʼowñ adejute̩ Jisus le̩, li ane̩ ki amiejo kpai e̩wñ ki wache le̩, ma railo nana; ma kakini, Ochochi, e̩ne̩-i chʼỌma e-O̩jo̩.

⁵⁵ Abobule̩ wewe ku ma kwo Galili atu Jisus ubi ache e̩wñ ñw u jʼo̩mo̩ agʼo kwʼo̩najiji.

⁵⁶ Me̩ri Magdalini la dʼef uma kpai Me̩ri iye Jeme̩s kpai Jose̩f, kpai iye amo̩ma Ze̩be̩di le̩.

Ma dʼoku Jisus tef ura

⁵⁷ Oñ abu kʼane̩ lo̩, ananaʼka kʼowñ ño̩ chʼako̩che̩ Jisus, kwo Arimatia wa; odu-wñ ko̩ Jose̩f.

⁵⁸ E̩ne̩-i lewʼugbo Pailati kʼi bi oku Jisus. Taku Pailati ñwa ñwu ma ku ma mʼu du wa ñw u.

⁵⁹ Taku Jose̩f mʼoku-wñ gba oñ i dʼu tef ukpo line̩n efufu ki de̩ hiolo,

⁶⁰ tak i mʼu du dachi ef oji e-wñ etito̩, owñ chʼe-kʼi da ef apata. Tak abu kʼi fʼokuta lile li wa alu oji le̩, i le owñ.

⁶¹ Me̩ri Magdalini kpai Me̩ri ekeji le̩ la jʼo̩mo̩, ma kpejuru ura le̩ gugu.

⁶² Oñ o̩jo̩ñwa O̩jo̩ Emʼo̩latane̩ ucholo le̩, amagboji amatama kpai amaFarisi wajo̩ ugbo Pailati.

⁶³ Ma kakini, Odu, a rewa ka kʼadone̩la le̩ ka e̩gba kʼi deju ta kakini, O̩jo̩ me̩ta tak u nakwane̩.

⁶⁴ Todule̩ e̩ nañwa ñwu ma ku ma fʼoji le̩ ñwo̩che kpaka gbogbo tʼo̩jo̩ e̩ke̩ta, tode̩gba kʼamako̩che̩-wñ lewa ku ma mʼoku-wñ ji lo, ku ma la aka ñw amone̩ ka kʼi kwane̩ kwef abo ki ku me̩. Tak uko̩bi e-ubiane̩-i atʼe-ejodudu le.

⁶⁵ Pailati ka ñwu ma kakini, Ame̩ chene̩ abo ide; me̩ lo ku me̩ fʼu che kpaka alu ku me̩ ma.

⁶⁶ Oñ ma le manyʼabide le̩ nañwʼoji le̩ che kpaka, ma fʼokuta-wñ hiuko̩.