Mark 5 - O̩TAKADA O̩LA O̩JO̩ 1970

E̩nebili Gerasa le̩

¹ Ma lewʼudaba ohimini tʼoj ane̩ abo Gerasa.

² E̩gba kʼi kwef o̩ko̩ tane̩, ababale̩ e̩ne̩ kʼi nʼafu ki ma de̩hiolo n kwʼugbo ojinoji de kpʼowñ;

³ unyi e̩ne̩ le̩ chʼef ache̩ku; i chaka chʼigbaligba e̩ne̩ du la neke dʼu jiʼu ge̩ n:

⁴ todabu ku ma fʼu tʼagba o̩gbe̩nugbe̩, ma ño̩ dʼigbaligba jiʼi ge̩, i la fʼigbaligba jada, i la fʼagba kpo̩fo̩ ye̩ge̩ye̩ge̩, e̩ne̩ du la gbiti bo̩jo̩ kʼi afʼu dolo n.

⁵ E̩gba du, tʼodu tʼo̩ro̩ka, ef ache̩ku kpʼibe̩uwo i do̩mo̩ akwa. I nadʼokuta fʼo̩la-wñ na.

⁶ E̩gba kʼi fu Jisus li o̩najiji, i fule wa dojikane̩ ñw u,

⁷ i dʼomu dago kwa kakini, E̩wñ chʼe-mi kpʼuwe̩, Jisus, uwe̩ O̩ma O̩jo̩ Chamachala? Nago̩ O̩jo̩ nʼe̩ e̩ ki je̩ ñwu mi li uwa n.

⁸ Todu i ka ñw u kakini, Kwʼef e̩ne̩ le̩ dufu, uwe̩ afu ki ma de̩hiolo n.

⁹ Tak i tʼowñ ene, kakini, Ab odu-we̩ ko̩? I ka ñw u, kakini, Odu-mi ko̩ Lijio̩n, todukpe̩ kʼawa chewewe.

¹⁰ Tak i gbo̩ko̩bʼo̩ nana kʼi we ekpe̩ ma kwʼoj ane̩ le̩ alo.

¹¹ Amoko wewe la dʼujo̩ akolo uwo o̩mo̩ ajije̩.

¹² Oñ ma gbo̩ko̩bʼo̩ kakini, Fʼuwa kpe̩ ref amoko le̩ kʼa gudu nyʼef uma.

¹³ Tak i je̩ ñwu ma. Oñ amafu ki ma de̩hiolo n le̩ kwodufu, ma la gudu tef amoko, tak ujo̩ le̩ gwo̩ko̩ gwo̩ru o̩gba nyʼef ohimini, uwewe-ma dab o̩gba; oñ ma lenyo̩ ef ohimini.

¹⁴ Tak abo ku ma adejute̩ ma ra, oñ ma mʼo̩la-i duka ef ewo kpai oj oko. Abo le̩ la lewa ku ma li e̩wñ ki wache.

¹⁵ Taku ma lewʼugbo Jisus oñ ma go abu kʼe̩nebili le̩ nyi afe̩ gugu, eju-wñ mune̩, owñ chʼe̩ne̩ kʼi ne̩ lijio̩n le̩; oñ ma kwochokpo.

¹⁶ Tak abo ku ma liʼu choli e̩wñ du ki wache e̩nebili le̩ kpai o̩la amoko ñwu ma.

¹⁷ Taku ma chane̩ egbo̩ko̩bʼo̩ kʼi kwʼoj ane̩-ma lo.

¹⁸ Oñ abu kʼi alo tef o̩ko̩, e̩ne̩ kʼi nʼebili akwoubi le̩ gbo̩ko̩bʼo̩ kʼi lebʼo̩.

¹⁹ I je̩ ñw u le n, ama i ka ñw u, kakini, Lo tʼunyi-we̩ ugbo abo-we̩ kʼe̩ mʼe̩wñ lile kʼOndu che ñw e̩ duka ñwu ma, kpai ejumomi-we̩ kʼi li.

²⁰ Tak i le wñ, oñ i chane̩ etakoya De̩kapo̩lis alu kʼe̩wñ chenana ku Jisus che ñw u; amone̩ du kwoyaye.

I dʼo̩ma Jairo̩s kwane̩

²¹ E̩gba ku Jisus ño̩ tʼo̩ko̩ mudaba tʼo̩wo̩ ekeji ge̩, amone̩ wewe jeju wʼugbo-wñ, owñ la dʼeti ohimini.

²² Tak e̩ne̩ʼka ef amagboji unyi ujeju lewa, odu-wñ ko̩ Jairo̩s; abu kʼi fʼu li, i lewane̩ e̩re̩-wñ,

²³ oñ i gbo̩ko̩bʼo̩ nana, kakini, O̩ma-mi onobule̩ kekele ache kʼi ku; kʼe̩ lewa kʼe̩ kʼo̩wo̩-we̩ nʼo oji, todu kʼo̩ga-wñ ki takpa, kʼi deju.

²⁴ Tak i lebʼo̩, amone̩ wewe wewe darʼo̩ ubi, ma muke̩che̩ abʼowñ ma.

O̩ga onobule̩ kʼi rʼe̩bie̩ o̩do̩ me̩gweji le̩

²⁵ Oñ onobule̩ʼka, kʼi dʼef e̩bie̩ eru o̩do̩ me̩gweji,

²⁶ kʼi la li uwa nana ugbo amobochi wewe, kʼi laño̩ mʼe̩wñ du kʼi ne̩ ko kpabie̩ kpa, kʼi ma nʼile du ñw u n, ama o̩ga-wñ nabie̩ne̩ nyo̩gba;

²⁷ abu kʼi la gbo̩ inabali Jisus, i lef amone̩ ki tinyo̩ le̩ wa ubi-wñ, oñ i do̩wo̩kado afe̩-wñ.

²⁸ Todu i kakini, I chaka chʼafe̩-wñ kate u dʼo̩wo̩ kado, i ajadu mi.

²⁹ Ababale̩ ugbo kʼe̩bie̩-wñ abikwo le̩ gbe̩, oñ i fu ma ef año̩la-wñ kʼo̩la-wñ takpa.

³⁰ Ababale̩ abu ku Jisus chema ef onugo-wñ ka kʼukpahiu le̩ kwʼef uwñ dufu me̩, i murida ef amone̩ ki tinyo̩ le̩, i kakini, E̩ne̩ do̩wo̩kado e̩wñ-o̩la-mi?

³¹ Tak amako̩che̩-wñ ka ñw u, kakini, Uwe̩ go amone̩ ki tinyo̩-i abu ku ma ke̩che̩ bʼuwe̩ ma, oñ uwe̩ kakini, E̩ne̩ do̩wo̩kado mi?

³² Tak i rejuda koolo kʼi li e̩ne̩ kʼi che e̩wñ-i.

³³ Onobule̩ le̩ muda railo, o̩la-wñ naga todu i chema e̩wñ kʼi chʼo, oñ i lewa fiane̩ o̩gba-wñ, i ka ochochi le̩ du ñw u.

³⁴ Tak i ka ñw u kakini, O̩ma-i, e̩do̩-ekono-we̩ fʼuwe̩ jadu me̩; lo kpai ure̩do̩, ache̩ka ki chʼuwe̩ kwef o̩pe̩cha-we̩.

³⁵ Abu kʼi nʼo̩la aka ta, ma kwʼunyi agboji unyi ujeju le̩ wa kakini, O̩ma-we̩ onobule̩ leku me̩; e̩wñ chi kʼe̩ che Akone̩wñ akanya ta?

³⁶ Jisus muda nyʼo̩la ku ma ka-i eti n, i ka ñw agboji unyi ujeju kakini, E̩ ki railo n, eke̩do̩no e̩ ke̩do̩no kate.

³⁷ Oñ i je̩ ñw e̩ne̩ du lebʼo̩ n, chai Pita kpai Jeme̩s kpai Jo̩n o̩maye Jeme̩s.

³⁸ Taku ma lewa unyi agboji unyi ujeju le̩; oñ i go abu ku ma jo̩ achekuku, ma raku, ma la dinaku nana.

³⁹ E̩gba kʼi mugudu tʼejefu, i ka ñwu ma, kakini, E̩wñ chi ku me̩ chekuku, ku me̩ la raku-i? O̩ma-i ku n, olu i ale̩-i.

⁴⁰ Ma dʼoke anyi rʼo̩ oji. Ama e̩gba kʼi fʼuma ne dufu chaka, i mʼata o̩ma kpai iye-wñ kpai abo ku ma jʼugbo-wñ ko, oñ i le tʼejefu ugbo kʼo̩ma le̩ de̩.

⁴¹ Tak i gwo̩nyʼo̩ma le̩ o̩wo̩, i ka ñw u kakini, Talita kumi; ku ma jomudechi-wñ kakini, O̩ma igbe̩le̩, uwe̩ naka ñw u, kwane̩.

⁴² Ababale̩ o̩ma igbe̩le̩ le̩ kwane̩ oñ i kwolule̩; todu o̩do̩-wñ chʼe̩gweji me̩. Ababale̩ ibe-ma mukpatuka tabale.

⁴³ Tak i hi ma owu nana kʼone̩ du ki ma e-i n. Tak i ñwa ñwu ma ku ma du e̩wñ ñw u je̩.