Mark 15 - O̩TAKADA O̩LA O̩JO̩ 1970

Jisus dʼo̩gba Pailat

¹ Oñ ababale̩ odudu-wñ amagboji amatama kpʼabogijo kpʼamako̩takada kpʼabo̩hiala du fʼojuju nyi; taku ma fu Jisus ji, oñ ma nʼe̩ alo adʼu ñwu Pailat.

² Pailat tʼowñ ene kakini, Uwe̩ chʼOnu amaJu? I dohi ñw u kakini, Uwe̩ aka-i.

³ Oñ amagboji amatama gwʼajo̩ wewe nʼo.

⁴ Pailat ño̩ tʼowñ ene ge̩, kakini, E̩ dohi du n? Go alu kʼe̩wñ chewewe ku ma gwunʼe̩.

⁵ Jisus muda dohi du ge̩ n; Todabe̩le̩ Pailat kwoyaye.

⁶ E̩gba ujeju-ucholo i te̩tatʼe̩ne̩ unyi-ugaʼka ku ma bi ugbo-wñ no̩ tane̩ ñwu ma.

⁷ Oñ e̩ne̩ʼka do̩mo̩ kʼodu-wñ ko̩ Barabas, ma fʼu ji te̩ manyʼabo ku ma dʼane̩ utu le̩, ma chʼabo ku ma kpone̩ ef ane̩ ku ma dutu le̩.

⁸ Tak o̩wo̩ amone̩ le̩ mute̩gu nyʼugbo-wñ, ma chane̩ ebi kʼi che alu kʼi te̩tache ñwu ma.

⁹ Oñ Pailat dohi ñwu ma kakini, I dʼume̩ e̩do̩ kʼu natʼOnu amaJu no̩ tane̩ ñwu me̩?

¹⁰ Todu i chema ka kʼi chʼutodabu ku ma lie̩na-wñ oñ amagboji amatama mʼowñ du ñw u i.

¹¹ Ama amagboji amatama ko̩nyʼo̩wo̩ amone̩ le̩ efu todu ku ma ka kʼi tu Barabas no̩ tane̩ ñwu ma.

¹² Taku Pailat ño̩ dohi ñwu ma kakini, Mak e̩wñ nache e̩ne̩ ku me̩ do̩ kʼOnu amaJu le̩ ke?

¹³ Ma ño̩ kwukwa ge̩ kakini, Mʼu du kabamoli.

¹⁴ Pailat muda ka ñwu ma kakini, E̩bie̩ne̩ e̩wñ i che ke̩? Ama ma ro̩wo̩ ekwa tule kakini, Mʼu du kabamoli.

¹⁵ Tak abu ku Pailat neku eche e̩wñ ki nyʼo̩wo̩ amone̩ le̩ eju, i tu Barabas no̩ tane̩ ñwu ma, oñ i fu Jisus gwo, tak i mʼu du ñwu ma ku ma mʼu du kabamoli.

Amisoja che Jisus uke̩

¹⁶ Oñ amisoja dʼowñ alo tef anuku, owñ che Praitorio̩n; ma fʼabudala-ma chaka do̩ wa.

¹⁷ Taku ma nyi owñ otogbo odufa ekpikpa, ma la fʼikeke ta ugugu uloko, oñ ma mʼu du dʼo oji.

¹⁸ Taku ma chane̩ egwʼo̩ ugwa kakini, Agba-o, Onu amaJu!

¹⁹ Ma la du elikpo fiʼo̩ oji, oñ ma fito̩rʼowñ o̩la, taku ma kekunyane̩ adojikane̩ ñw u.

²⁰ Oñ e̩gba ku ma chʼo uke̩ kpa, ma mʼotogbo odufa ekpikpa le̩ gwo̩ kwʼo̩la-wñ, oñ ma mʼe̩wñ o̩la e-wñ ko nyʼo̩la-wñ. Taku ma mʼu du dufu ku ma dʼu kabamoli.

Ma du Jisus kaba mʼoli le̩

²¹ Oñ ma gwo̩nyʼe̩ne̩ʼka kʼi kwʼoko awa lale o̩mo̩ todu kʼi ne̩ oli uku-wñ. Odu e̩ne̩ le̩ ko Saimo̩n, abo Sairini, ata Ale̩ksanda kpai Rufo̩s.

²² Taku ma mʼu du wʼugbo ku ma do̩ ko̩ Go̩lgo̩ta, ku ma jʼomudechi-wñ ko̩ Uña Akokoloji.

²³ Oñ ma mʼomi achiwebe̩te̩ma ku mur gwe̩gwanyʼu du ñw u, i muda gba n.

²⁴ Taku ma mʼowñ du kamoli; ma la fʼe̩wñ o̩la-wñ kpe̩ ñw o̩la-ma, ma mʼu ko ato̩ko̩ ku ma ma e̩wñ kʼe̩ne̩ne̩ne̩ne̩ adu.

²⁵ Auwa e̩ke̩ta i la che, oñ ma mʼu du kamoli.

²⁶ O̩la e̩wñ ki chi ku ma dʼu kamoli ku ma ko̩ tʼugbo oji-wñ che, ONU AMAJU.

²⁷ Ma la kʼamadinya meji kamoli manyʼowñ, oka dʼo̩wo̩ awoto-wñ, oka la dʼo̩wo̩ awohi-wñ. [

²⁸ Abe̩le̩ o̩la ki dʼef o̩takada O̩jo̩ kʼi kakini, Ma fʼu choli tʼef ame̩nugbite̩re̩ che̩.]

²⁹ Abo ku ma lale chʼakpabie̩-wñ, ma mi oji-ma ejo, ma kakini, E̩he̩! Uwe̩ ki agu unyi O̩jo̩ lo̩ kʼe̩ ñʼadabi ko̩ o̩jo̩ me̩ta,

³⁰ fʼo̩la-we̩ jadu, kwʼoj oli tane̩!

³¹ Abe̩le̩ ge̩, amagboji amatama manyʼamako̩takada mʼowñ du tʼachʼo uke̩, ma ka ñw o̩la-ma kakini, I fʼabo ki bo̩ jadu, i neke jadu o̩la-wñ n.

³² Kraist Onu Israe̩l-i ki kwʼoj oli tane̩ fa-i, todu kʼa li kʼa ke̩do̩no. Abo ku ma ko kamoli kpai owñ ño̩ kicha ñw u ge̩.

Jisus mʼiñmi da

³³ Oñ e̩gba kʼauwa e̩ke̩fa jo̩, ane̩ chubi chaka gbogbo tʼauwa e̩ke̩la.

³⁴ Tak e̩gba kʼauwa e̩ke̩la jo̩, Jisus dʼomu dago kwa, kakini, E̩loi, E̩loi, lama sabaktani? e-ku ma jʼomudechi-wñ kakini, O̩jo̩-mi, O̩jo̩-mi, e̩wñ chi kʼe̩ tʼumi no̩ tinyo̩-i?

³⁵ Oñ e̩gba kʼabo iche̩ka efabo ku ma dago o̩mo̩ gbʼo̩, ma kakini, Me̩ go, i ado̩ E̩laija.

³⁶ Tak e̩ne̩ʼka fule adʼugbo̩che̩ tunyʼomi achiwebe̩te̩ma e̩ka ki ñmo̩ nyʼo̩la, tak i mudu tunyʼoli ikpo, oñ i dʼu ñw u kʼi ñmo̩ kakini, To̩no̩, kʼa li abe̩k E̩laija awa kʼi dʼowñ tane̩.

³⁷ Taku Jisus fʼogu kpa, oñ i mʼiñmi da.

³⁸ Oñ ukpo ugbo̩na unyi O̩jo̩ ejefu mukpana meji kwʼate̩ gbogbowa tʼane̩.

³⁹ E̩gba kʼagboji amisoja ogume̩lu kʼi dago akpejurʼu li ka kʼi mʼiñmi da abe̩le̩, i kakini, Ochochi, e̩ne̩-i chʼO̩ma O̩jo̩.

⁴⁰ Abobule̩ ño̩ jʼo̩najiji ago ge̩; Me̩ri Magdalini kpai Me̩ri iye Jeme̩s kekele kpai Jose̩s kpai Salome jʼef uma,

⁴¹ ama le̩ tʼowñ ubi achʼe̩wñ ñw u, e̩gba kʼi de̩ Galili; kpai abobule̩ omune̩ wewe kʼama kpai owñ kpe̩re̩ wa Je̩rusale̩m.

Ma dʼoku Jisus tef oji

⁴² Oñ e̩gba kʼane̩ lo̩, todabu kʼi chʼO̩jo̩ Emo̩latane̩, owñ chʼo̩jo̩ kʼo̩na-wñ bo̩ o̩jo̩ uñmi,

⁴³ Jose̩f e-Arimatia lewa, kʼowñ chʼe̩ne̩ o̩hialaʼka ku ma diba ñw u, kʼowñ onugo aneju ojane̩ O̩jo̩; i fʼe̩do̩ ji anyʼugbo Pailat, oñ i bi oku Jisus.

⁴⁴ Awuwu-wñ la je̩ ñwu Pailat n, i neke leku e̩gba-i me̩? oñ i do̩ agboji amisoja le̩ wʼugbo-wñ, i tʼowñ ene ka kʼi leku kpo̩kpe̩ me̩?

⁴⁵ Tak abu kʼi ma ugbo agboji amisoja le̩, i mʼoku-wñ du ñwu Jose̩f.

⁴⁶ Tak i fʼukpo line̩n la, oñ i mʼowñ du wane̩, i la fʼukpo line̩n le̩ wenyʼu, tak i mʼu du dachi ef oji ku ma da ef apata; tak i fʼokuta li bʼalu oji le̩ ma.

⁴⁷ Oñ Me̩ri Magdalini kpai Me̩ri iye Jose̩s li ugbo ku ma dʼu dachi.