Mark 1 - O̩TAKADA O̩LA O̩JO̩ 1970

Jo̩n kʼi ache baptism

¹ Ukadane̩ Uche̩nyo̩ Jisus Kraist O̩ma O̩jo̩ de̩.

² Owñ chʼalu ku ma ko̩ ef o̩takada Aizaya akache̩ kakini, Go, nakpe̩ onuche̩-mi uche̩ tʼo̩gba-we̩, owñ ache o̩na-we̩;

³ omuko̩la e̩ne̩ kʼi akwa ef aje̩tachi kakini, Me̩ fʼo̩na Ondu ñwo̩che, me̩ chʼo̩kpa o̩na-wñ tʼokpolo.

⁴ Jo̩n, kʼi chʼone̩ baptism ef aje̩tachi, lewa, i ño̩ takoya o̩la baptism e-uribeda kʼadure ki kwo bʼuma te̩.

⁵ Abo ane̩ Judia chaka kpai abo Je̩rusale̩m chaka ledufu wʼugbo-wñ; oñ i che ma baptism ef ohimini Jo̩rdan, ma nagbalu adure-ma.

⁶ Jo̩n le̩ la kʼukpo edudu inyakulumi nyʼo̩la, oñ año̩ lʼago-wñ de, i la nʼakubaliba kpai omiño̩ e-efoko aje̩.

⁷ I takoya kakini, E̩ne̩ ki gbiti tʼumi le i tʼubi-mi awa, omi bo̩jo̩ kʼu nate̩kpe̩ atu iku e̩da-wñ n.

⁸ Omi che me̩ baptism ef omiofo; owñ muda ache me̩ baptism ef Afu Kiafo̩.

Jo̩n che Jisus baptism

⁹ I lewa ef adiko le̩, ku Jisus kwo Nazare̩t e-Galili wa, oñ Jo̩n chʼo baptism efu Jo̩rdan.

¹⁰ Ababale̩ abu kʼi ate̩gu kwef omi awa i li efojale ki mukpana te̩, kpai Afu kʼi agwo̩ru wʼoji-wñ dabu ikede;

¹¹ oñ omuko̩laʼka kwʼefojale kakini, Uwe̩ chʼO̩ma ufe̩do̩-mi, u fʼuyo̩-mi li ef uwe̩.

Abulumone̩ jʼiJisus ma

¹² Ababale̩ Afu fʼowñ ne tef aje̩tachi.

¹³ I la dʼef aje̩tachi le̩ o̩jo̩ o̩gbo̩ meji, Setan najʼowñ ma; i la do̩mo̩ kpai ame̩la efoko; oñ amonuche̩ O̩jo̩ che e̩wñ ñw u.

Jisus chant uko̩lo̩-wñ

¹⁴ Abu ku ma mu Jo̩n du ñwu ma mu, Jisus wʼane̩ Galili atakoya Uche̩nyo̩ O̩jo̩, kakini,

¹⁵ E̩gba-wñ jo̩ me̩, o̩da onu ojane̩ O̩jo̩ me̩rane̩; me̩ ribeda ku me̩ ke̩do̩no Uche̩nyo̩.

I fʼamako̩che̩ ejodudu do̩

¹⁶ Oñ abu kʼi alale eti ohimini Galili, i fu Saimo̩n kpai Anduru o̩maye Saimo̩n li, abu ku ma jʼariga ef ohimini; todu ku ma chʼamekwuji.

¹⁷ Taku Jisus ka ñwu ma, kakini, Me̩ lewa tu mi ubi, kʼu naje̩ ñwu me̩ mud amekwuji ki amʼamone̩.

¹⁸ Ababale̩ ma tʼiga no̩, oñ ma rʼo̩ ubi.

¹⁹ Abu kʼi le tʼo̩gba pe̩, i li Jeme̩s o̩ma Ze̩be̩di kpai Jo̩n o̩maye-wñ, ama le̩ ño̩ jʼef o̩ko̩ añwʼiga che ge̩.

²⁰ Ababale̩ i la fʼuma do̩; oñ ma tʼata-ma Ze̩be̩di no̩ ef o̩ko̩ manyʼabuko̩lo̩ ku ma rʼo̩me̩ ñwu ma, oñ ma rʼo̩ ubi.

Jisus nʼebili dufu Kapanahum

²¹ Taku ma le tʼefu Kapanahum; oñ ababale̩ i mugudu tef unyi ujeju o̩jo̩ uñmi oñ i ko̩ ma e̩wñ.

²² Awuwu uko̩-o̩la kʼi ko̩ ma la fʼuma mu: todu i nako̩ ma dab e̩ne̩ kʼi nʼo̩da, i che dab amako̩takada n.

²³ Oñ ababale̩ e̩ne̩ʼka kʼafu ki ma de̩hiolo n dʼef uwñ dʼef unyi ujeju-ma; oñ e̩ne̩ le̩ kwukwa, kakini,

²⁴ E̩wñ chʼe-wa kpʼuwe̩, Jisus abo Nazare̩t? E̩ wa kʼe̩ ko wa rinyo̩? Omi chema uwe̩, e̩ne̩ kʼuwe̩ che, E̩ne̩ Kiafo̩ e-O̩jo̩ uwe̩ che.

²⁵ Taku Jisus dejurʼu kakini, Fʼo̩wo̩ bʼalu-we̩ ma kʼe̩ kwʼef uwñ dufu.

²⁶ Tak afu ki ma de̩hiolo n le̩ chʼo dab ajukpakpa, i dʼomu dago akwa, oñ i kwʼef uwñ dufu.

²⁷ E̩gahi fʼuma mu chaka, todabe̩le̩ ma nʼo̩lo̩-ma ene kakini, E̩wñ de̩? Uko̩-o̩la etito̩ ku ma ko̩ one̩ de̩-i! I nʼo̩da kʼi añwa ñw amafu ki ma de̩hiolo n oñ ma gbʼo̩la-wñ gbo̩.

²⁸ Ababale̩ uwohi-wñ kwodufu lʼugbo du oj ane̩ Galili.

Jisus fʼo̩ga iye o̩ya Pita che

²⁹ Ababale̩ e̩gba ku ma kwʼef unyi ujeju dufu, ama kpai Jeme̩s kpai Jo̩n lewʼef unyi Saimo̩n kpai Anduru.

³⁰ Iye o̩ya Saimo̩n la dachi, o̩la-wñ akpuna; ababale̩ ma ka o̩la-wñ ñw u.

³¹ Tak i lewa gwo̩nyʼu o̩wo̩, oñ i mʼu du kwane̩; o̩la e̩kpuna le̩ tʼo̩ no, oñ i kwoche e̩wñ ñwu ma.

³² E̩gba ane̩ e̩gba kʼolu kwotunynʼane̩, ma mʼabo̩ga chaka ko wʼugbo-wñ kpai abo ku ma chʼebili.

³³ Abewo le̩ du jeju jʼalugbo̩na.

³⁴ I la fʼo̩ga amone̩ wewe kʼo̩ga-ma chʼojoji ojoji che kpa; i ño̩ ne amebili wewe dufu, i la je̩ ñw amebili ko̩la n, todabu ku ma chemʼo̩.

Jisus nyʼo̩wo̩ʼka achadua

³⁵ Inajo̩-inajo̩ i kwane̩ ledufu nyʼaje̩tachi, tak i chadua o̩mo̩.

³⁶ Oñ Saimo̩n kpai abo ku ma jʼugbo-wñ chi e̩re̩-wñ.

³⁷ Ma fʼu li, oñ ma ka ñw u kakini, Amone̩ du jʼafeju we̩.

³⁸ I ka ñwu ma kakini, Wa kʼa nyʼugbo omune̩ tef ewo ki me̩ro̩wo̩, kʼu natakoya o̩mo̩ ge̩; ofe-wñ kʼu dufu wa-i de̩.

³⁹ Oñ i lewa atakoya ef unyi ujeju-ma o̩gbo̩ ojane̩ Galili du, i laño̩ nʼamebili ane dufu.

Jisus fʼo̩ga eno̩ga ikpemute che

⁴⁰ Oñ e̩no̩ga-ikpemuteʼka lewʼugbo-wñ agbo̩ko̩bʼo̩, i kʼokuku nyane̩ aka ñw u kakini, Iche̩wñ ki dʼuwe̩ e̩do̩, uwe̩ neke je̩ ñw o̩la-mi fe̩.

⁴¹ Abu kʼejumomi-wñ achʼo i fʼo̩wo̩-wñ nadala kadʼo, i ka ñw u kakini, I dʼumi e̩do̩; o̩la-we̩ ki fe̩.

⁴² Ababale̩ o̩ga-ikpemute tʼo̩ no̩, oñ o̩la-wñ fe̩.

⁴³ Tak i fejukparʼu o̩me̩me̩le̩, oñ ababale̩ i mʼu du dufu,

⁴⁴ i ka ñw u, kakini, E̩ nago, e̩ ki ko̩la du ñw e̩ne̩ du n; e̩ muda lo, kʼe̩ dʼo̩la-we̩ ña atama, kʼe̩ ne̩ e̩wñ ku Mose̩s ñwa te̩ wa kʼe̩ fʼo̩la-we̩ gworinyo̩, todu kʼi gbibenu ugbo ma.

⁴⁵ Ama i ledufu oñ i chane̩ etakoya, i du o̩la-i kpogo ugbo du, todabe̩le̩ Jisus ma neke ño̩ gudu tef ewo ejugede ge̩ n, i muda dʼo̩do̩da ugbo kʼi chʼaje̩tachi, oñ ma kwʼugbo du wʼugbo-wñ.