Jo̩n 18 - O̩TAKADA O̩LA O̩JO̩ 1970

Ma fu Jisus mu

¹ Abu ku Jisus fʼe-kide̩ ka owñ kpai amako̩che̩-wñ dufu tʼudaba ukpolo Ke̩dro̩n, ugbo kʼuche̩ de̩, owñ kpai amako̩che̩-wñ mugudu tef uwñ.

² Judas, e̩ne̩ ki adʼuwñ ñwu ma mu, ño̩ chema ugbo le̩, todabu ku Jisus kpai amako̩che̩-wñ jeju o̩mo̩ o̩gbe̩nugbe̩.

³ Todule̩ abu ku Judas mʼuche̩ amiso̩jaʼka kpai abimo̩to̩ kwʼo̩wo̩ amagboji amatama kpai amaFarisi gba, i nʼomutula kpai e̩mu kpai e̩wñ ido̩na ogu awa o̩mo̩.

⁴ Todule̩ abu ku Jisus chema e̩wñ du ki awa abʼowñ ma, i ledufu oñ i ka ñwu ma kakini, E̩ne̩ me̩feju?

⁵ Madohi ñwu kakini, Jisus abo Nazare̩t. Jisus ka ñwu ma kakini, Omi de̩. Judas, e-kʼi adʼuwñ ñwu ma mu, la dago efu ma ge̩.

⁶ Todule̩ abu kʼi ka ñwu ma ka kʼomi de̩, ma lʼubi ubi oñ ma lewa nʼane̩.

⁷ Todule̩ i ño̩ dabi tʼuma ene ge̩ kaikini, E̩ne̩ me̩ feju? Oñ ma ka ñw u kakini, Jisus abo Nazare̩t.

⁸ Jisus dohi kakini, U ka ñwu me̩ ka kʼomi de̩. Todule̩ iche̩wñ ku me̩ feju mi, me̩ tʼabo-i no̩ ku ma lo ma,

⁹ todu kʼo̩la kʼi ka kakini, Abo kʼe̩ ko ñwu mi le̩ u je̩ ñw e̩ne̩ du efu ma lenyo̩ n, ki che̩ kpa.

¹⁰ Todule̩ abu ku Saimo̩n Pita nʼugbada i mʼu wo̩ oñ i fʼadu agboji amatama da, i la mʼeti-wñ awo̩to̩ la. Odu adu le̩ la ko̩ Malkus.

¹¹ Todule̩ Jisus ka ñwu Pita kakini, Mʼugbada du tunyʼako̩-wñ; ago kʼAta du ñwu mi i nʼugbo du kʼu nañmo̩ ge̩ n?

¹² Todule̩ uche̩ amiso̩ja kpai onu-ogu kpai abimo̩to̩ e-amaju le̩ fu Jisus mu, ma la fʼu ji;

¹³ taku ma mʼu du nyʼugbo Anas ejodudu, todu owñ chʼata o̩ya Kayafas, e-kʼi chʼagboji amatama o̩do̩ le̩.

¹⁴ Kayafas le̩ la chʼe̩ne̩ ki tʼohio̩la ñwu amaju ka ki chenʼile kʼone̩ okate ki leku todu amone̩.

Pita fʼaire̩ Jisus re̩

¹⁵ Oñ Saimo̩n Pita kpai ako̩che̩ omune̩ʼka tu Jisus ubi. Agboji amatama la chema ako̩che̩ e-le̩, oñ i gudu kpai Jisus tef anuku atama le̩.

¹⁶ Pita muda dago alugbana o̩do̩da. Todule̩ ako̩che̩ omune̩ le̩, e-kʼagboji amatama chemʼo̩, ledufu oñ i ko̩la ñw onobule̩ ki adʼalugbana tak i mu Pita du wʼejefu.

¹⁷ Todule̩ imo̩to̩ onobule̩ ki adʼalugbana le̩ ka ñwu Pita kakini, Uwe̩ ño̩ dʼef amako̩che̩ e̩ne̩ le̩ ge̩? Owñ le̩ kakini, U dʼefu ma no.

¹⁸ Abu ku ma fʼuna-ige̩ ko omadu kpai abimo̩to̩ dago jʼo̩mo̩ todabu kʼafu akpa, oñ ma jʼawuna; Pita la dago efu ma awuna.

¹⁹ Todule̩ agboji amatama tu Jisus ene o̩la amako̩che̩-wñ, kpai o̩la e̩wñ kʼi akone̩.

²⁰ Jisus dohi ñw u kakini, Omi te̩tako̩la ejugede ñw abile̩; omi ko̩ ma ef unyi ujeju kpai ef unyi O̩jo̩ ugbo kʼamaJu chaka wa jeju e̩gba du, u la ko̩la e̩wñ du maja n.

²¹ E̩wñ chi kʼe̩ tʼumi ene? Tʼabo ki gbʼo̩la e̩wñ kʼu ka ñwu ma ene; go, abo-i chema e̩wñ kʼomi ka.

²² Abu kʼi fʼe-kide̩ ka imo̩to̩ʼka ki dago o̩mo̩ fʼawo ko̩ Jisus, i kakini, Abu kʼe̩ dohi ñw agboji amatama de̩-i?

²³ Jisus dohi ñw u kakini, I chʼo̩la e̩bie̩ne̩ u ka le̩ mak e̩ gbibenu e̩bie̩ne̩ kʼi che, i la chʼo̩me̩me̩le̩ e̩wñ chi kʼe̩ dʼo̩wo̩ gwo mi?

²⁴ Todule̩ Anas mʼowñ du kpuche̩ alu kʼi che̩ji le̩ nyʼugbo Kayafas, agboji amatama.

²⁵ Saimo̩n Pita la dago awuna. Todule̩ ma ka ñw u kakini, Uwe̩ ño̩ dʼef amako̩che̩-wñ ge̩? E̩ne̩ le̩ raire̩, i kakini, U dʼefu ma no.

²⁶ E̩ne̩ʼka ef amadu agboji amatama, kʼi chʼefu e̩ne̩ ku Pita mʼeti-wñ la le̩, kakini, Omi li we̩ ef uche̩ le̩ kpai owñ n?

²⁷ Todule̩ Pita ño̩ dabi raire̩ ge̩; ababale̩ aiko̩ la ko̩.

Jisus wʼo̩gba Pailat

²⁸ Todule̩ ma du Jisus kwugbo Kayafas alo tef unyi Praito̩rio̩n, odudodudu i la che. Ama le̩ la gudu tefu Praito̩rio̩n n, tode̩gba kʼo̩la-ma adaji, chai kʼama ki je̩ Elaloji le̩.

²⁹ Todule̩ Pailati ledufu wʼo̩do̩da ugbo ma, oñ i kakini, O̩la e̩wñ me̩ du dʼe̩ne̩-i ajo̩?

³⁰ Ma dohi ka ñw u kakini, Owñ le̩ ma chʼe̩ne̩ ki ache e̩bie̩ne̩ n, a ma dʼowñ ñw e̩ n.

³¹ Todule̩ Pailati ka ñwu ma kakini, A me̩ mʼowñ du ku me̩ kajo̩-wñ teju o̩lo̩da e-me̩. AmaJu ka ñw u kakini, O̩da je̩ ñwu wa kpʼe̩ne̩ du n;

³² todu kʼo̩la Jisus ki che̩, owñ chʼe-kʼi ka kʼi du jiwe alu kʼuku kʼi ache kʼi ku de̩.

³³ Todule̩ Pailati ño̩ dabi gudu tef unyi Praito̩rio̩n, oñ i fu Jisus do̩, i la ka ñw u kakini, Uwe̩ chʼOnu amaJu?

³⁴ Jisus dohi kakini, Uwe̩ gʼe̩do̩la-we̩ ko̩la kide̩? abe̩k abomune̩ kʼo̩la-mi ñw e̩?

³⁵ Pailati dohi kakini, Omi che Ju? Abuche̩ichi e-we̩ kpai amagboji amatama inʼuwe̩ du ñwu mi; ab e̩ che ke?

³⁶ Jisus dohi kakini, E̩te̩ o̩da Ojane̩ e-mi chʼile̩ kide̩ n. E̩te̩ o̩da Ojane̩ e-mi ma chʼe-ile̩ kide̩, abimo̩to̩-mi ma fʼeju gbiti ajuja todu ku ma ki we edu mi ñw amaJu; ama o̩da Ojane̩ e-mi dʼemi fa-i n.

³⁷ Todule̩ Pailati ka ñw u kakini, Mak onu we̩ che ke? Jisus dohi kakini, Uwe̩ ka kʼu chʼonu. Todu e-kide̩ ma bi mi, tod e-kide̩ oñ u lewʼef ile̩, todu kʼu gbʼochochi ibenu. E̩ne̩ du kʼe̩te̩-wñ chʼochochi agbʼomu-mi.

³⁸ Pailati ka ñw u kakini, E̩wñ chʼochochi? Abu kʼi fʼe-kide̩ ka, i dabi dufu nyʼugbo amaJu, oñ i ka ñwu ma kakini, Omi li o̩la du kʼi fe̩ n.

³⁹ I muda chenʼe̩wñ o̩gu ku ma te̩tache ñwu me̩, todu kʼu tʼe̩ne̩ʼka no̩ tane̩ ñwu me̩ ef Elaloji: todule̩ ame̩ neku kʼu natʼOnu amaJu no̩ tane̩ ñwu me̩?

⁴⁰ Todule̩ ma dabi kpogu kakini, I chʼe̩ne̩ kide̩ n, chai Barabas. Barabas le̩ la chʼadinya.