Je̩re̩maya 33 - O̩TAKADA O̩LA O̩JO̩ 1970

O̩jo̩ katane̩ ñwu mo kʼi ako ma dabi jʼe̩gu-ma

¹ Tak o̩la Jihofa ño̩ wʼugbo Je̩re̩maya onuʼke̩ji abu ku ma fʼu dahi te̩ ologbo unyi abo ide le̩, kakini,

² Abu ki Jihofa, kʼi ache ka de̩, owñ che Jihofa kʼi fʼu bo̩ kʼi lonyane̩; odu-wñ ko̩ Jihofa; i kakini,

³ kwa do̩ mi, oñ nadohi ñw e̩, u la akʼe̩wñ inaina kʼo̩wo̩ one̩ ma tu n e-kʼuwe̩ ma mʼo̩ n ñʼuwe̩.

⁴ Todu abu ki Jihofa, O̩jo̩ Israe̩l, ka ugbo unyi unyi ewo-i kpai ugbo unyi unyi amonu Juda ku ma kpo̩fo̩ wane̩ ku ma mʼu ko chʼaku tod ugbudu ku ma du le̩ kpai o̩kwo̩chageli.

⁵ Abu ku ma wa akogu bʼabo Kaldia, ku ma ño̩ kʼoku one̩ jʼef uwñ e̩ko̩, owñ chʼone̩ kʼomi kpa ef uwe̩do̩-mi kpai ef e̩do̩fulu-mi, kpʼabo du kʼe̩wñ bibi-ma ku ma che je̩ ñwu mi dʼeju-mi maja bʼewo-i te̩.

⁶ Go nafʼikete-ma ji kʼu fʼu kpa, oñ nachʼo̩ga-ma kpa; tak u nadʼure̩do̩ kpʼochochi ololo ololo tejugede ñwu ma.

⁷ Tak u nafʼamu Juda kpʼamu Israe̩l rida, oñ nadabi ne ma alu ku ma de̩ e̩gba ejodudu le̩.

⁸ U la agwe̩ ma bʼudu du ku ma fe̩ ku ma du mi re le̩ te̩. U la atʼudu du ku ma fe̩ ku ma du mi re le̩ no̩ ge̩,

⁹ oñ ewo-i achʼodu uyo̩ ñwu mi kpʼuñwulo̩ kpʼojima eju abo uche̩ichi ane̩ ile̩-i du, ku ma agbʼinabali e̩nyo̩ du kʼu nache ñwu ma. Ma la arailo, o̩la-ma aga noji e̩wñ e̩nyo̩ du kpʼure̩do̩ du kʼomi agba wa ñw u.

¹⁰ Abu ki Jihofa aka de̩, Ugbo-i ku me̩ kʼo̩la-wñ kakini, oku ane̩ i che, one̩ kpʼe̩la abe̩re̩me̩le̩ dʼemi n, owñ chʼef ewo ewo Juda kpʼo̩na o̩na Je̩rusale̩m ugbo kʼi chʼalache̩, ugbo kʼone̩ ma de̩ n, kʼone̩ ma dodo n, kʼe̩la abe̩re̩me̩le̩ du ma do̩mo̩ n-i,

¹¹ ma adabi gbo̩ omuko̩la uyo̩ kpʼomuko̩la e̩do̩ e̩bo̩ kpʼomuko̩la o̩ko̩ya tito̩ kpʼomuko̩la o̩ya tito̩, kpʼomuko̩la abo ku ma kakini, A ki gogbodo̩ Jihofa kʼi nʼe̩wñ du, todu Jihofa che nyo̩, todu ufe̩de̩nyo̩-wñ chʼogbegbele̩, kpʼe-abo ku ma kʼe̩wñ ugwa wʼef unyi Jihofa ge̩. Todu nache kʼamu ane̩-i kʼi rida kʼi dʼalu kʼi de̩ e̩gba ejodudu le̩, Jihofa aka-i.

¹² Abu ki Jihofa ki nʼe̩wñ du aka de̩ kakini, Ef uña oku ane̩ ugbo kʼone̩ kpʼe̩la abe̩re̩me̩le̩ ma de̩ n-i, kpʼewo ewo-wñ chaka, ugbo kʼamadidala agugu, ku ma ñʼaje̩ ñw ame̩wño̩re̩-ma egini ki dachi jo̩, adabi de̩ ge̩.

¹³ Ef ewo ewo ane̩ uwo-wñ, kpai ef ewo ewo ane̩ o̩go̩-wñ, kpʼef ewo ewo o̩wo̩ o̩pata o̩gane̩, kpʼe-oj ane̩ Be̩njamin, kpʼuña uña ki me̩ru Je̩rusale̩m kpʼewo ewo Juda, ame̩wño̩re̩ egini ñʼadabi le o̩gane̩ o̩wo̩ e̩ne̩ kʼi akʼuma aluka okoke, Jihofa ka-i.

¹⁴ Go, iko-wñ awa, Jihofa ka-i, kʼomi ache teju o̩la e̩nyo̩ kʼu ka ugbo unyi Israe̩l kpai ugbo unyi Juda.

¹⁵ Iko le̩ kpʼe̩gba le̩, naje̩ ñw Epa O̩kpakpa kʼi pa ñwu Defid; owñ le̩ ache teju alu kʼoji ajo̩ o̩kpakpa ka, i la ache e̩wñ o̩kpakpa oj ane̩-i.

¹⁶ Iko le̩ ma ajadu Juda, Je̩rusale̩m la agugu to̩ko̩o̩; odu-wñ ku ma la adʼo̩ le̩ de̩ kakini, JIHOFA O̩KPAKPA-WA.

¹⁷ Todu abuki Jihofa aka de̩ kakini, One̩ aña Defid kʼi gugu oj ede abo unyi Israe̩l ogbegbele̩ n;

¹⁸ one̩ kʼi akʼe̩wñ iche̩bo̩ e̩gujo wa, kʼi la agu e̩wñ ele ku ma ko wa jo, kʼi la ñʼachʼiche̩bo̩ o̩gba-mi o̩ko̩ko̩lo̩ la aña amatama ku ma chʼabo Lifai n.

¹⁹ Tak o̩la Jihofa wʼugbo Je̩re̩maya kakini,

²⁰ Abu ki Jihofa aka de̩, kakini, Iche̩wñ kʼame̩ neke fʼalo-mi e-o̩ro̩ka bie̩, kpʼalo-mi e-odu, kʼodu kpʼo̩ro̩ka ki we ede̩ iko-wñ,

²¹ mak e̩gba le̩ ma neke ño̩ fʼalo-mi kʼu kpe̩ kpai Defid adu-mi bie̩, todu kʼi we enʼo̩ma kʼi ajʼonu gugu oj ede-wñ; kpʼabo Lifai ku ma chʼamatama, abo ku ma che e̩wñ ñwu mi le̩.

²² Abu ku ma ma neke kʼuwewe e̩wñ ojale aluka n, ku ma ma la neke ñwa e̩lanyi ohimini n; alu le̩ naje̩ ñw ugbe̩ Defid adu-mi, kpʼugbe̩ abo Lifai ku ma che e̩wñ ñwu mi wewe nyʼo̩gba.

²³ Oñ o̩la Jihofa wʼugbo Je̩re̩maya kakini,

²⁴ Ibe-we̩ chetʼe̩wñ kʼabo-i jʼaka kakini, O̩pu meji ki Jihofa chi le̩, i mʼu ko rinyo̩ me̩ n? Abu ku ma chʼe̩de̩te̩ abo-mi de̩, kʼama ki we echʼuche̩ichi amone̩ eju-ma.

²⁵ Abu ki Jihofa aka de̩ kakini, Iche̩wñ kʼalo-mi e-o̩ro̩ka kpʼodu ma dago n, kʼi ma chʼomi fʼuhio̩me̩ efojale kpʼane̩-ile̩ ñwa te̩ n;

²⁶ mak e̩gbale̩ omi ñʼakʼugbe̩ Jeko̩b kpʼe-Defid, adu-mi, rinyo̩, kʼu we echi ugbe̩-wñ ku ma chʼame̩nuto̩gba ugbe̩ Ebraham kpʼAise̩k kpai Jeko̩b in; todu narʼamu-ma da bʼuma te̩, oñ nali uma ejumomi.