Emo̩s 7 - O̩TAKADA O̩LA O̩JO̩ 1970

Ane̩ ego: amimiejo kpʼuna kpʼiku ku ma du ñwa udago o̩kpakpa e̩wñ

¹ Abu kʼOndu Jihofa ña mi le̩ de̩: me̩ la go, i nabo̩ amimiejo iko kʼo̩la e̩wñ oko e-ubiane̩ chane̩ eya; me̩ la go, i chʼiko kʼe̩wñ oko aya abu kʼonu mʼuje̩wñ ejodudu ko.

² Oñ i lewa tu, abu ku ma fʼije̩ ane̩ lo̩ kpa, tak u kakini, O, Ondu Jihofa, to̩no̩, o̩ko̩ nagba bʼe̩! Abu Jeko̩b ale kʼi adago? I nya tabale!

³ E̩wñ-i wo̩ Jihofa; E-i awache n, Jihofa ka-i.

⁴ Abu kʼOndu Jihofa ña mi de̩: me̩ la go, Ondu Jihofa dʼudo̩ ku ma nʼuna wa juja; oñ e-le̩ fʼunefu lie̩ kpa, oñ i le kʼi ño̩ mʼane̩-i ko mi.

⁵ Tak u kakini, O, Ondu Jihofa, we ke, o̩ko̩ nagba bʼe̩! Abu Jeko̩b ale kʼi adago? I nya tabale!

⁶ E̩wñ-i la wo̩ Jihofa; E-i ñʼawa che ge̩ n, Ondu Jihofa ka-i.

⁷ Oñ i ña mi: me̩ la go, Ondu dago oj o̩do̩ ku ma nʼiku kʼe̩wñ ki woji ji mʼo̩ añwa udago o̩kpakpa-wñ. Iku e̩ñwa udago o̩kpakpa e̩wñ la dʼef o̩wo̩-wñ.

⁸ Oñ Jihofa ka ñw mi kakini, Emo̩s, e̩wñ e̩ li-i? Tak u kakini, U cheli iku e̩ñwa udago o̩kpakpa e̩wñ. Tak Ondu kakini, Go, Omi adʼiku e̩ñwa udago o̩kpakpa e̩wñ alumeji abo-mi Israe̩l; omi ñʼalale gu uma du ofofo ge̩ n;

⁹ oñ otete otete Aise̩k amud alache̩ te̩, ma la akʼuña kiafo̩ uña kiafo̩ e-Israe̩l chʼoku e̩wñ, oñ nakwane̩ nʼo̩kwo̩chageli akobo̩ unyi Je̩ro̩boam.

Amazaya, atama ka ñw onu ka kʼEmo̩s adʼalu nyʼu

¹⁰ Tak Amazaya, atama Be̩te̩l, fʼuche̩ kpe̩ru Je̩ro̩boam onu Israe̩l, kakini, Emo̩s fʼalo da nyʼuwe̩ alumeji abunyi Israe̩l; ane̩-i la neke nʼadu uko̩la-wñ kpa n.

¹¹ Todu abu kʼEmo̩s ka de̩, i kakini, Je̩ro̩boam akʼuku o̩kwo̩chageli, taku ma anʼabo Israe̩l lo bʼane̩-wñ te̩ tʼef amu.

¹² Amazaya ño̩ ka ñw Emo̩s kakini, O uwe̩ agane̩, lo, ra tʼane̩ Juda, kʼe̩ jʼuje̩wñ o̩mo̩, kʼe̩ laño̩ kache̩ o̩mo̩;

¹³ e̩ ki la gbe̩do̩ kache̩ Be̩te̩l ge̩ n, todu uña kiafo̩ e-onu, kpʼunyi o̩fe̩ i la che.

Emo̩s ka alu kʼi le tak i akache̩

¹⁴ Tak Emo̩s dohi ñw Amazaya kakini, Omi chʼakache̩ no, u la chʼo̩ma akache̩ n; chai adejute̩ ame̩wño̩re̩ u che kpʼe̩ne̩ ki adejute̩ oli sikamo̩r,

¹⁵ Jihofa la mʼumi du bʼetʼame̩wño̩re̩ egini ubi te̩, oñ Jihofa ka ñw mi kakini, Lo, kʼe̩ kache̩ ñw abo-mi Israe̩l.

¹⁶ Todule̩, fa-i, uwe̩ ki gbʼo̩la Jihofa. Uwe̩ kakini, E̩ ki kache̩ bʼIsrae̩l ma ge̩ n, e̩ ki la gwʼo̩la che̩ jane̩ bʼabo unyi Aise̩k ma n.

¹⁷ Todule̩ abu ki Jihofa ka de̩ kakini: O̩ya-we̩ achʼajo̩ko̩ ef ewo-i, oñ amo̩ma-we̩ e̩ne̩ke̩le̩ kpʼonobule̩ awane̩ alu o̩kwo̩chageli, ma la anʼiku fʼane̩-we̩ ko̩da ukpe̩ ukpe̩ jo̩; uwe̩ onugo aku ojane̩ ki ma de̩ hiolo n, ma anʼabo Israe̩l kwʼoj ane̩-wñ alo ef amu chuu.