Emo̩s 6 - O̩TAKADA O̩LA O̩JO̩ 1970

¹ Atogwo ñw abo ku ma jo̩ Zayo̩n añmi ofo, kpʼabo ku ma ke̩do̩no ejo̩ ku ma jo̩ oj uwo Samaria no̩ko̩o̩, owñ chʼame̩nuwohi ku ma jʼef uche̩ichi ki tʼo̩gba, e-kʼabo unyi Israe̩l awʼugbo ma!

² Me̩ lale nyi Kaine ku me̩ li; akwʼo̩mo̩ me̩ ki lo tu Hemat lile, taku me̩ ki gwo̩ru nyi Gat e-abo Filistia. Ama nyo̩ tʼabo ojane̩ ojane̩-i le? Alo̩me̩ e-ma nʼabe̩ tʼalo̩me̩ e-me̩ le?

³ Ame̩ ku me̩ hi o̩jo̩ e̩bie̩ne̩ tʼubi tʼo̩najiji, ku me̩ la je̩ ñw ugugu e̩wñ akpulu ki te̩ wa.

⁴ Ame̩ dachi oj ate̩ ku ma nʼenyi adagba che, me̩ fʼo̩la-me̩ nadala oj e̩wñ ugugu-me̩ lile, me̩ la kpʼamo̩mala kwʼef ame̩wño̩re̩ egini je̩, kpʼamo̩mokuno̩ kwʼalumeji iga;

⁵ me̩ nʼumolo akʼeli ibe̩te̩, ku ma chʼo̩na e̩wñ eli ki dab e-Defid ñw o̩la-ma;

⁶ ku ma la nʼugba ñmo̩ omi achiwebe̩te̩ma, ku ma la fʼekpo ki nʼojima ba tʼo̩la-ma, ma muda chʼe̩do̩dudu tod o̩bata Jo̩se̩f in!

Udu kʼi abu ñwu ma abailo

⁷ Todule̩, fa-i ama le̩ anyʼef amu manyʼabo ku ma nyʼef amu ejodudu, oñ ekuku abo ku ma fʼo̩la-ma no̩ miyaa achiya e̩fule̩fu alale rinyo̩.

⁸ Ondu Jihofa fʼo̩la-wñ go̩, Jihofa, O̩jo̩ ki nʼe̩wñ du ka-i: Oji Jeko̩b ki dufu chʼe̩wñ ihie̩ne̩-mi, unyi unyi ojima-wñ chʼe̩wñ ula-ka-mi; omi la akʼewo le̩ kpʼe̩wñ du ki jʼef uwñ chele.

⁹ Tak i awate̩ kakini, Iche̩wñ kʼone̩ me̩gwa bo̩ jʼunyiʼka, eku ama aku.

¹⁰ Oñ e̩gba kʼone̩ mʼe̩ne̩ ki chʼefu-wñ du, i chaka chʼe̩ne̩ ki jo, kʼi kʼachiku-wñ kwʼef unyi, kʼi la aka ñw e̩ne̩ ki dʼejefu ejefu unyi le̩ kakini, One̩ bo̩ ugbo we̩ ta? ki la akakini, O̩da! tak i akakini, Chechi ke! todu i nʼugbo kʼa hiʼalu mʼodu Jihofa n.

¹¹ Todu go, Jihofa aka, oñ ma agwʼunyi lile alache̩, ma la akpʼunyi kekele fo̩.

¹² Amanya afule oj apata okuta? One̩ anʼamokuno̩ luche̩ o̩mo̩? Ame̩ la mʼoji ajo̩ o̩kpakpa rida chʼololo, kpʼe̩ro̩ e̩wñ o̩kpakpa chʼo̩ge̩le̩!

¹³ Ame̩ ku me̩ yo̩ ñw e̩wñ o̩wai, ku me̩ kaikini, I chʼukpahiu-wa che oñ a nʼigba ñw o̩la-wa n?

¹⁴ Todu go, omi akʼabuche̩ichiʼka wa akobʼume̩, O abunyi Israe̩l, Jihofa, O̩jo̩ ki nʼe̩wñ du aka-i; tak abo le̩ akpa me̩ ma akwʼugbo ku ma gudu nyi Hemat le̩ gbogbo wʼukpolo Araba.