Eli Eko̩ DʼO̩jo̩ 40 - O̩TAKADA O̩LA O̩JO̩ 1970

Ugwa kʼi chʼe̩wñ iche̩bo̩

Tugbo Agboji Amakeli.

¹ U te̩taneju ño̩ neju Jihofa; oñ i dago afʼo̩lo̩ agbo̩ ukwa-mi.

² I mʼumi du kwef ura ugbo kʼekuku de̩, bʼugbo ki chʼe̩pio̩ te̩, i la mʼe̩re̩-mi ko dʼane̩ oj okuta, oñ i fʼelelo kpai elewa-mi lonyane̩.

³ I la mʼeli etito̩ du tʼumi alu, owñ chʼO̩jo̩-wa eñwulo̩-wñ. Amone̩ wewe aliʼu ku ma arailo, taku ma ake̩do̩no Jihofa.

⁴ E̩ne̩ ki adu Jihofa chʼuke̩do̩no-wñ gbede, kʼi ma la rida nyʼugbo abo ku ma ke n, kpai abo ku ma muna tʼugbo e̩wñ o̩lemi n!

⁵ O Jihofa O̩jo̩-mi, uwe̩ je̩ ñw uko̩lo̩-we̩ ki fiteju kpai ibe-wa kʼe̩ kpe̩ ki nana nyʼo̩gba; i jʼacholi jo̩ ñw e̩ n! U ma dʼu kadufu, kʼu ma dʼu chʼoluka, i ma tʼekaluka le.

⁶ E̩wñ e̩bie̩ kpai e̩wñ ele rʼuwe̩ e̩do̩ n; uwe̩ muda mʼeti-mi bi me̩. E̩ bi ebi e̩wñ eduwa gujo kpai e̩wñ eduwa tod adure mama ta n.

⁷ Tak u kakini, Go, u lewa me̩; o̩la-mi che̩ko̩ tef o̩takada ku ma ka le̩;

⁸ i cherʼumi e̩do̩ kʼu nache e̩wñ ki dʼuwe̩ e̩do̩, O O̩jo-mi; ochochi, uko̩-o̩la-we̩ dʼef e̩do̩-mi.

⁹ Omi fʼuche̩nyo̩ o̩kpakpa je̩rʼabo ujeju lile me̩; go, uko-mi awe ehimʼo̩ n, O Jihofa, uwe̩ chema.

¹⁰ U fʼo̩kpakpa-we̩ gwebo ef e̩do̩-mi n, omi mʼubi one̩ kʼe̩ che kpai uja-du-we̩ du ka dufu me̩; u dʼufe̩de̩nyo̩-we̩ kpai ochochi-we̩ maja ñw ujeju lile le̩ n.

¹¹ O Jihofa, uwe̩ ki do̩wo̩mʼejumomi o̩gbaje̩je̩-we̩ ñw omi n; je̩ ñw ufe̩de̩nyo̩-we̩ kpai ochochi-we̩ ki fejute̩ mi waa!

¹² Todu e̩wñ bie̩ne̩ ki ma nʼaluka n donyʼumi daka-i; udu kʼu fe̩ fumi mu, u gane̩ n; i che̩wewe tʼiloji oji-mi le̩; e̩do̩-mi la hi umi tinyo̩.

¹³ O Jihofa, i ki nyʼuwe̩ eju kʼe̩ mʼumi gba! hiane̩ wa kʼe̩ te̩ko mi, O Jihofa!

¹⁴ Je̩ ñw anyo̩ ki mu abo ku ma tene onugo-mi ku ma fʼu kpabie̩ kʼeju-ma ki kpa alukate; je̩ ñw ma rʼabo ki rʼuma e̩do̩ kʼe̩bie̩ne̩ ki ke̩re̩bʼumi da tʼubi kʼeju-ma ki kpa!

¹⁵ Je̩ ñw abo ku ma ka ñw mi kakini, Ibaa, ibaa! ku ma mud e̩nabobo tod anyo̩-ma.

¹⁶ E̩ muda je̩ ñw abo ku ma tene we̩ ki yo̩ ku ma gwoguyo̩ ef uwe̩; abo ku ma fe̩do̩ ujadu-we̩ ki ka o̩ko̩ko̩lo̩ kakini, Jihofa ki chʼinaina!

¹⁷ Omi chʼe̩no̩bata kpai e̩nale; Ondu muda adibete̩ mi. Uwe̩ chʼe̩nate̩ko-mi kpai e̩ne̩ ki agba mi; e̩ ki che̩du n, O O̩jo̩-mi!