Eli Eko̩ DʼO̩jo̩ 29 - O̩TAKADA O̩LA O̩JO̩ 1970

Omuko̩la Jihofa dʼef afu ibi

Eli ki Defid ko̩ dʼO̩jo̩.

¹ Ame̩, amo̩ma agbiti le̩, me̩ bumo̩ Jihofa, me̩ ki bʼojima kpai ukpahiu mo̩ Jihofa.

² Me̩ ki bʼojima odu-wñ mo̩ Jihofa; me̩ ki kʼe̩wñ efo̩ alifia nyʼo̩la adojikane̩ ñw Jihofa.

³ Omuko̩la Jihofa bʼeju omi omi ma; O̩jo̩ e-ojima ako̩la akpabana, owñ che Jihofa kʼi abʼeju omi wewe wewe ma.

⁴ Omuko̩la Jihofa chegboka, uko̩la Jihofa che̩ko̩ ñw e̩gahi.

⁵ Omuko̩la Jihofa agu oli sida che̩, i-i, Jihofa nʼoli sida e-Le̩bano̩n le̩ aguche̩ ye̩ge̩ye̩ge̩.

⁶ I aje̩ ñw ma ñwugu dab o̩mokuno̩, Le̩bano̩n kpai Sirion ache dab o̩ma e̩fa.

⁷ Omuko̩la Jihofa ada nyaa.

⁸ Omuko̩la Jihofa ami aje̩tachi ejo, Jihofa ami aje̩tachi Kede̩sh ejo.

⁹ Omuko̩la Jihofa aje̩ ñw ame̩la abi-kolo bi o̩ma, i la anyʼoli efoko rinyo̩ jalii; oñ ef unyi e̩gahi-wñ e̩wñ du jʼaka kʼOJIMA!

¹⁰ Jihofa gugu oj uwobi omi le̩; i-i, Jihofa gugu e-wñ dab Onu ogbegbele̩.

¹¹ Jihofa adʼukpahiu ñw abo-wñ! Jihofa anʼure̩do̩ de̩nyo̩ ñw amone̩-wñ!