Eli Eko̩ DʼO̩jo̩ 148 - O̩TAKADA O̩LA O̩JO̩ 1970

E̩wñ du kʼO̩jo̩ nyi ki gwʼowñ ugwa

¹ Me̩ je̩nyu Jihofa! Ame̩ ku me̩ jʼefojale me̩ ki je̩nyu Jihofa, me̩ jʼugbo ki gbo̩gba le̩ aje̩-nyu ñw u!

² Amonuche̩-wñ chaka, me̩ ki je̩nyʼowñ, abogu-wñ chaka, me̩ je̩nyʼowñ!

³ Olu kpai ochu, ki je̩nyʼowñ, ilawo ki agane̩ le̩ chaka, me̩ je̩nyʼowñ!

⁴ Efojale e-efojale le̩ ki je̩nyʼowñ, kpai omiofo ki dʼate̩ ñw efojale le̩!

⁵ Abo le̩ ki naje̩nyu ñw odu Jihofa! Todu eka i ka oñ e̩wñ le̩ chʼe̩nyi jo̩.

⁶ I la fʼe̩re̩-ma lonyane̩ gbogbo alo ogbegbele̩; i fʼo̩me̩-wñ hi te̩ i nʼugbo du ku ma adaba n.

⁷ Ame̩ ame̩la lile ki jʼef ohimini kpai o̩lo̩ulu du ku me̩ jo̩ ile̩-i, me̩ je̩nyu Jihofa,

⁸ una kpʼokuto̩mo̩jo̩cha, sno kpai atula, afu ki aju gbogbogbo ki ache tʼej o̩la-wñ kpa!

⁹ Uwo uwo lile kpai uwo kekele du, oli e̩ro kpai oli sida chaka!

¹⁰ Ame̩wñ egini kpai ame̩la abe̩re̩me̩le̩ du, e̩wñ ki afa ane̩pe̩te̩ kpai ame̩we̩ ku ma wu!

¹¹ Amonu ile̩ kpai amone̩ ojoji du, amagboji kpai amakajo̩ ane̩-ile̩ chaka!

¹² Tʼabokolobia tʼabigbe̩le̩ ki ma mʼe̩ne̩ke̩le̩ n, tʼabogijo tʼabimo̩to̩!

¹³ Ama le̩ ki je̩nyu odu Jihofa, todu odu-wñ kate tʼo̩gba atate̩; ojima-wñ la dʼatate̩ ñw ane̩-ile̩ kpai efojale.

¹⁴ I la mʼigba du kwane̩ tod abo-wñ me̩, owñ chʼuñwulo̩ abo-wñ ku ma kpe̩do̩rʼowñ chaka, owñ chʼabo Israe̩l ku ma me̩rʼowñ le̩. Me̩ je̩nyu Jihofa!